USUKUYONY 20
20
Myaaka kyiku kimwi
1Naasa shalollya nnsu akee oloka auka iruveu, arye ufunguo lwa kwa vafu, na nse wa minya nniini arye efo wokony lwakwe. 2Katira shoka lya, shoka ilya shikuu, mmbwe Nkumbi na Satana, kaifinga myaaka kyiku. 3Kayeera si kwa vafu, kaifinga, kavikya-u kiringyisyo lyilakiidimi-se ilemba vandu va masanga, kutani myaaka yeyo kyiku yasia; na numa ya vayo iruwa ando a kirambo kyaangu.
4Numa shalollya fitima fya itumbe, vakakaau rembo, vakautyo uvingo, na yeny shalollya mimuyo ya valya valerumbuwa mirwe kimaruma kya ukureekyi lwa Yesu, na kimaruma kya irero lya Iruva, na yewo valashiindyaa ifisi llya nta ifwanu lyakwe. Nta valandewarye wende lulya yoo fisanguny fyawo, nta efo maakony awo; nawo vakakaa na muu, vakashillya ando amwi na Kristo ando a myaaka kyiku. 5Vafu yewo valesaa-u mbalekaa na muu-fo, kutani myaaka yeyo kyiku yasia. 6Yelyo llyo iruka lya mbee. Ngoma, mmweele yeto atiri waavi efo irukeny lya mbee. Kwa yewo ufu lwa kavii llutiri finya-fo, llyoony vashevaa vakohani va Iruva na Kristo, nawo vashekooya ishilya nawe myaaka yeyo kyiku.
Urumato lwa Satana
7Naasa myaaka yeyo kyiku ikisia, mmbishwa kaporomuwa, neekyi nkifingyony kyakwe. 8Nawe mmbo asheukaa-fo nashelemba vandu vakee wo ando ulaniny, Gogu na Magogu, navasanyirye kya fira, na yeekyena lyawo mmbo lyifye sha nsanga wa mbai ya yeeve. 9Vakasaama vakarumbusa uruka, vakaringyitya ulale lwa veele na muri yeto ukundikye. Muro ukaoloka wuuka iruveu ukavakomba kombi. 10Na nkumbi yeto llembi keerwa iruveny lya muro na kibiriti, kundo ifisi llya lyikai ando amwi na nkisuku ulya wa wongo. Nawo mmbo vasheorotwaa kio na nsanyiny llung'anu na llung'anu.
Mwaandu wa ifurumya
11Numa shalollya kitima kya itumbe kiniini, kyaa, na yeto akyikaaye mmbwe yeto iruveu na ulana valeovya kisangu kyakwe, na ando awo nnyalelollyo-fo. 12Shalollya vafu, vaniini na vadu, vesalalyi yoo mbee ya kitima kilya kya itumbe; numa fitabu fikatarambuwa, na kyitabu kingyi kikatarambuwa, nkyo kilya kya muu; na vafu yewo vakautyo uvingo kiinani na filya fikee fireiye efo fitabuny, shaasa mashora awo akai. 13Yeeve ikaraaka vafu valya veifo, na ufu na kwa vafu, vakalotora vafu yewo veefo. Wo nndu kautyo uvingo kiinani na mashora akwe. 14Ufu na kwa vafu fikaletwa iruveny llya lya muro. Yelu llo ufu lwa kavii, llyo iruva elyo lya muro. 15Na nndu yeto nalandereiywa efo kyitabuny yekyo kya muu mmbo aleerwa iruveny llya lya muro.
Currently Selected:
USUKUYONY 20: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
