USUKUYONY 19
19
1Elyi numa ya efyo shaita unyanga sha lwa nkuka wa vandu, unyanga uniini iruve-u, lwishambaa, “Haleluya, Ukiro na Itumbe na finya mfya Nndumi Iruva weeru. 2Kimmba mirumbuye yakwe ni ya dede na ya usumanu, mashika mmbo anrumbuya ntuusi eto nniini ekeekasheesa uruka na utuusi lwakwe, na itaiya samu ya mashinga akwe efo wokony lwakwe.” 3Vakawuiya lya kavii yaamba, “Haleluya.” Na nnsu wa vayo mmbo urwaa uwe llung'anu fika llung'anu. 4Na vamiku valya makumi avii na vaana na valya vatiri muu vaana, vakafiirya ndi na iindya Iruva, yeto akee rembo kitiminy kilya kya itumbe, veshambaa, “Amen! Haleluya.”
Nndumwa wa Walyi lwa Ngurana ya Iruva
5Unyanga lukauka kulya kitiminy kilya kya itumbe, lukaamba, “Rumisheny Iruva weeru, yeni mashinga akwe, yeni mumwirikye, vadu na vaniini. 6Shaita unyanga sha unyanga lwa nsemu mwiingyi, sha yoona lya mura mwiingyi, na lyingyi sha iruruma lya finya, lukaamba, Haleluya; mmbo Iruva Nndumi weeru muni finya asheshilyaa. 7Nndeny lufure, lukese, lundeniingya nnduma, kya walyi lwa Ngurana ya Iruva, kyimmba nka wa walyi ansha.” 8Nawe kawona iraa soori shisha, shaa imikamikaa, mashika soori yeyo shisha ni mashora a usumanu a veele.
9Nawe kashivia, “Reiya, ‘Ngoma ni yewo vakee vavaangye nndumwa wa walyi lwa Ngurana ya Iruva.’” Kashivia, “Marero yaa ni marero a dede ya Iruva.” 10Naasa shawa yoo marendeny akwe, naambo shimwiindye, nawe kashivia, “Lola, kulatani indo-fo. Yeny mmbo shikee nndu amwi na vana va mau yewo vatiri ukureekyi lwa Yesu. Indyeny Iruva. Mashika ukureekyi lwa Yesu llo mumuyo wa ukisuku.”
Frasi shaa na yeto aisaamyi
11Naasa shalollya kulya iruve-u kurauka, shalollya-u kwiiyo frasi shaa, na yeto aisaamyi, avangwaa wa dede wa va-dede, nawe kyikee kya usumanu mmbo arumbwa nisha na ikapana fira. 12Miso akwe akava sha kipalapala kya muro, na efo nrony wakwe karaa ngyureto shiingyi, nawe mmbo atiri irina lyikee ireiye, kulaefo nndu alyiishi kuuta we muni. 13Nawe mmbo aree soori ikee shikape efo samuny, na irina lyakwe kavaangwa, “Irero lya Iruva.” 14Na maronda yoo akee iruveu akansora, vesaamyi frasi shaa neraa soori shisha tisenyi. 15Na usu woovi mmbo luukye efo kaniny kakwe naambo nakape nalo vandu va masanga. Nawe mmbo ashevesaa na nsengye wa minya, nawe mmbo ashevavaraa muungu wa mfinyo ya saabu yeyo ya unyafi lwa Iruva muni finya. 16Nawe mmbo atiri irina lyikee ireiye yoo sooriny yakwe na yoo kinaminy kyakwe indi, MANGYI YA VAMANGYI, NA NNDUMI WA VANNDUMI.
17Numa shalollya nnsu ungyi eselelyi efo nkyeereny, kafua na unyanga waasha, kavia ndeye toose ta efo ngyiniiu, oshony-te mushewona nndumwa nniini wa Iruva. 18Mushelya nteera wa vamangyi, na nteera wa vashilyi va vasikari, na wa vandu vatiri finya, na wa frasi na wa yewo vatisaamyi, na nteera wa vandu woose, wa valeke na wa mashinga vaniini na vadu.
19Numa shalollya ifisi llya, na vamangyi va uruka, na maronda awo a vasikari, vakakusanyirya naambo vakape fira na yeto akee uwe ya frasi yeyo, na ando amwi na maronda akwe. 20Ifisi llya lyikawarwa, ando amwi na nkisuku ulya wa wongo, yeto aletana ngyende tilya elollye, nato nto alevalemba nato vandu valya valewarya wende lwa ifisi elyo, na iindya ifanu lyakwe, yewo ve vavii vakeerwo veefo na muu kulya iruveny lya muro lyishakaa sha kibiriti. 21Na valya valesaa-u mmbo valewaawa ni usu lwa yeto iesamyi frasi ilya, llo usu yelo lukee efo kaniny kakwe, na ndeye toose tikawuutiswa nnyama tawo.
Currently Selected:
USUKUYONY 19: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
