USUKUYONY 21
21
Iruveu na ulana wiiya
1Numa ya vayo shalollya ngyina shiiya na ulana wiiya, ni elyi ngyina ya mbee na ulana lwa mbee fyemmaa iira, nta nkulekikaa-fo yeeve-fo. 2Naasa shalollya muri ulya mweele, nto Yerusalemu shiiya wiisholokaa wuuka iruveu kwa Iruva, nato wamaa ideesyo, uvakye mwalyi wa walyi ammaa ideesyo mmi wakwe. 3Shaita unyanga uniini lwishuukaa alya kitiminy kilya kya itumbe lwiishambaa, “Loleny-te, ando a Iruva ulaalu ni efo vanduny nawe mmbo ashekaa nawo, nawo vasheva vandu vakwe. Nawe Iruva muni ashekaa nawo. 4Nawe asheangataa misoru myoose efo misony awo, nta ufu llushekyikaafo-fo, nta ikapa kiiyo-fo, nta ivavyo llyikyikaa-fo-fo, mashika elyi findo filya fya mbee fikoyaa fyammaa iira.” 5Na yeto akee rembo yoo kitiminy ekyo kya itumbe kaamba, “Loleny-te, mmbo shaallwa fyoose fikava fiiya.” Kawuya kashivia, “Yewe reiya sheelyi marero yaa ni dede na songosiny.” 6Kashivia, “Kyammaa iva. Yeny ni Alfa na Omega. Mapookyony na mafurumyony. Yeto atirwa nnyura mmbo nshenningaa ishena mura yoo usokeny lwa muu ruu. 7Yeto mwivinga mmbo ashevaa muya ding'u wa efi, na yeny mmbo nshevaa Iruva wakwe nawe nave mwana wakwa. 8Lyo yewo veerei na yewo valairikye, newo veende unyafi, na veewaa, na vasavi, na vatuusi, na veindya maruva a wongo, na vaongo woose, waavi lwawo ni kulya iruveny llya lya muro wa kibiriti. Yelu llo ufu lwa kavii.”
Yerusalemu Shiiya
9Umwi wa vasu valya mfungare kasha mmbo valya verye fipete filya fyeiishwe ngapo tilya mfungare teefurumya, nawe karera na yeny kashivia, “Nkyeosho na kunu shikoore Mwalyi yeto wa Walyi, akee nka wa Ngurana ya Iruva.” 10Kashiipoo shikee na Mumuyo kashifita ifumbuny yaasha, kashoora muri ulya mweele, nto Yerusalemu, wisholokaa wuuka kwa Iruva muni finya toose. 11Nato mmbo utiri itumbe lya Iruva, na sa ya vayo ikava sha iwe lya wuuru uniini llya lyivangwaa yaspi, isha sha bilauri. 12Mmbo wetiri isimamba nniini waasha lutiri myaango ikumi na ivii, na marina mmbo akee mareiye, ng'u marina a ngyufyari ikumi na ivii ta Vaisraeli. 13Taari ya ngaminy myaango iraru, taari ya ndoo myaango iraru, na taari ya sinde myaango iraru na taari ya nkywaany myaango iraru. 14Isimamba lya muri mmbo lyetiri ngyuvasha ikumi na ivii, na efo ngyuvasheny yeto kukareiyo-fo marina ikumi na avii a vakiloshyony valya ikumi na vavii va Ngurana ya Iruva. 15Na yeto alerera na yeny mmbo etiri irere lya saabu, lya yeesa muri yeto, myaango ya vayo na isimamba lya vayo. 16Na muri yeto mmbo wiinani taari toose, waasha lwa vayo na ivari lya vayo. Keesa muri yeto na irere llya, nato wetiri waasha lwa kilometa 2400, waasha lwa vayo na ivari na yeenda uwe mmbo fiinani. 17Kawuya keesa isimamba lya vayo kakooya mmbo utiri mita 60, kwi fyeeso fya kivandu, nkyo kya vasu. 18Nato mmbo wekee ntani na yaspi isimamba lya vayo na muri yeto mmbo wetiri saabu shisha, ivakye kilola kisha. 19Na efo uvasheny lwa muri yeto kukashopwa na mawe a wuuru a wo ngata. Efo uvasheny taari imwi kukava yaspi, taari ingyi ni yakuti ya buluu, ya kararu ni kalkedoni, ya kaana sumaridi; 20ya karaanu sardoniki ya karindaru akiki; ya mfungare krisolito, ya nyanya ni sabarajadi, ya kyeenda ni yakuti ifwani sha kyeri, ya ikumi krisopraso, ya ikumi na lyimwi ni hiakinto, ya ikumi na kavii ni ametisto.
21Na myaango yeyo ikumi na ivii ni lulu ikumi na ivii na wo mwaango ni lulu imwi. Na wo shia ya muri ni saabu shisha ivakye kilola kimikaa. 22Lyo nshilelollya-fo mmba ya Iruva-fo; mashika Nndumi Iruva muni finya toose na Ngurana ya Iruva niwo mmba ya Iruva.
23Na muri yeto nta mmbutinnyo ni nkyeere nta mwiiri wuuvaiye-fo, mashika itumbe lya Iruva llyo lyikewumikya na taa ya vayo ni Ngurana ya Iruva. 24Na vandu va masanga mmbo vasherua-ruaa efo seny ya vayo. Na vamangyi va ulana mmbo vende-u itumbe lya vayo. 25Na myaango ya vayo nsanyiny nnyisheraywaa-fo, mashika lyo nkushekaa-fo kio-fo. 26Nawo mmbo vashendee itumbe na wiindi lwa vandu va masanga efo muriny eto. 27Nafo nkusheangaa-fo kindo kyikee kifwafwa, ao yeto mweende unyafi na wongo-fo, kuuta yewo veni vakee vareiye efo kyitabuny kya muu kya Ngurana ya Iruva.
Currently Selected:
USUKUYONY 21: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
