USUKUYONY 18
18
Imamika lya Babilony
1Naasa numa ya vayo shalollya nnsu ungyi, esholokaa ooka iruve-u, atiri ushilyi uniini; na ulana lukamikyo ni itumbe lyakwe. 2Kafua na unyanga uniini kaamba, “Wammbwa, Babilony wammbwa, muri yeto nniini. Mmbo uleva kyeny kwa vammbishwa, na turuve ya wo mumuyo ntefusu, na turuve ya wo ndeye shiravi ivavisaa nrima. 3Mashika vandu va masanga moose mmbo valena mfinyo wa unyafi lwa utuusi lwakwe, na vamangyi va uruka mmbo valetuusa nawe, na vekapa mbusha va uruka mmbo valewonisa masaa kwa umbafu lwa finya yakwe.”
4Numa sheeta unyanga lungyi luuka iruve-u, lwishambaa, “Ukeny kwakwe yeni vandu vakwa, mulaakani ulyamari lwakwe-fo, nta mulawarye ngapo takwe-fo. 5Mashika ngyulyamari takwe mmbo tilemfika iruve-u, na Iruva kakummbwa maravi akwe.” 6Ntaeny shaasa we aletaa, muntaa kavii kiinani na mashora akwe. Efo upateny elo alesasandya, nsansandyeny nawe kavii. 7Shaasa alekurosa we muni na ilanga findo fya ulana, nningyeny mavavyo na ting'wa kiinani indo-da. Mashika mmbo akeamba efo nriminy wakwe, yeny mmbo shikee nka wa mangyi, nta shi nka wa ding'u-fo, nta nshishelolyaa ting'wa-fo. 8Kimmba ni indo ngapo takwe tishensheyaa nkonu umwi, ufu, na ting'wa, na shaa, nawe mmbo asherumatwaa deny ni muro. Mashika Nndumi Iruva yeto alemwaanduya mmuni finya shoose.
9Na vamangyi yewo va uruka, valetuusa nawe na ilanga findo fya ulana nawe, mmbo vaiyaa nenkapya kiiyo, kyeeri vashelolyaa nnsu kyeeri vakeeiya. 10Vasalale kwaasha veereiye kyeendwa mmavavyo akwe, veshambaa, “Woshiny, woshiny, lwa muri ulya nniini to Babilony ukee muri utiri finya mashika ando a saa imwi uvingo lwawo mmbo lushaa.” 11Na vekapa mbusha va uruka mmbo vasheiyaa na inkapya kiiyo, mashika nkwiefo-se nndu muura findo fyawo-fo; 12findo fya saabu, na fesa, na mawe a wuuru, na mafwaa mesha a moonri na soori tidodorye; na wo nri ufwamaa nisha, na wo kiiya kya wombe, na wo kiiya kya kitima kitiri wuuru uniini, na kya arera, na kya minya, na kya fimawe fya maru maru. 13Na mdalasini, na iliki, na kifwaamu kisha, na mafura afwamaa na ubani, na mfinyo, na mafura a seituni, na nswa nsha, na nganu, na ng'umbe na maanri, na frasi, na makari, na miili na mimuyo ya vandu. 14Na ndunda tisenyi nrima wafo mmbo kwantisokwa, na findo fyoose fimamiri na findo fya usuri mmbo fyankurekya; nta vandu mmbashefilolyaa-se nta-fo.
15Na veekapa mbusha na findo efyo, vakawonisa-fo masaa, mmbo vashesalalaa kwaasha, veshereyaa mavavyo akwe vakaiya na ikapa kiiyo, 16vakaamba, “Oshiny, oshiny, lwa muri yeto nniini! Ukeemmbike soori shisha, na soori ta fwana ya sambarau, na soori idodorye, na ishopwa na saabu, na mafura afwamaa, na lulu.” 17Mashika na lyimwi nsi usimba uniini sha elo lwammeeva ukyiva. Na wo nteteri wa ngalava na wo yeto ateterwaa ni uraato na verunda ngalaveny, na yewo woose varundaa yeeveny, vakasalala kwaasha. 18Vakafua nnu llya valelollya nnsu eto wa iiya lyakwe, veshambaa, “Mmuri ungau uvakye muri yeu nniini?” 19Vakafwallya kiluulyi efo mirweny yaawo, vakafua, vesholotaa misoru na ikapa kiiyo, veshambaa, “Woshiny, woshiny, lwa muri yeto nniini! Yeto nnang'ani ya vayo yewo vatiri ngalava yeeveny, valewonisa masaa ooka usimbeny lwakwe, mashika elyi ando a saa imwi uvaa nrapu. 20Fureny nawe, yeni va iruveu, na yeni veele na vasu na vakisuku; mashika Iruva mmbo oota uvingo lwany uwe yakwe.”
21Naasa nnsu umwi atiri finya kaipoo iwe, sha iwe lya isewe, kalyeerya yeeveny, kaamba, Ni indo, na finya niini, Babilony usheerwaa, nto muri yeto nniini, nta mbushekilolyoo-se-fo. 22Nta unyanga lwa vekapa finanda, na vekapa fivale, na vekapa maranda, ntisheitiwa-se-fo. 23Nta sa ya taa nyishekilolyoo-se kwafo-fo, nta unyanga lwa nndumi wa walyi nta lwa nka wa walyi llusheitiwaa efo kwafo-fo, mashika veekapa mbusha yewo vafo mmbo vekee vaniini va uruka, ni llya vandu woose va masanga valelembwa ni usavi lwafo. 24Na nnang'ani ya vayo ikalollyo-fo samu ya veele, na ya vakisuku na ya valya woose valewaawa urukeny.
Currently Selected:
USUKUYONY 18: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
