USUKUYONY 17
17
Ntuusi nniini
1Umwi wa vasu valya mfungare kasha, valya vatiri fipete filya mfungare, nnsu yeto karera na yeny kaamba, “Osho kunu, nshekora uvingo lwa ntuusi eto akayaa mura mwiingyi. 2Mmbwe yeto vamangyi va ulana valetuusa nawe, na yewo vakee urukeny vakanangyiswa mmbwari wa utuusi lwakwe.” 3Kashiipoo na Mumuyo kashifita kasa koomu, shalollyafo nka, ekee uwe ya ifisi lyidodorye deny, lyireiye marina a fyaararo, lyitiri mirwe mfungare na mbembe ikumi. 4Na nka ulya mmbo ekee mmbike soori ya king'ang'ari, na idodorye, akee nshope na saabu na mafura afwamaa, na lulu, nawe katira upata lwa saabu wokony lwakwe, lukaishwa uravi na ukasha lwa utuusi lwakwe. 5Na yoo kisanguny kyakwe mmbo akee nreiye irina lyisurumi, “Babeli muri nniini, maye wa vaka vatuusi na uravi lwa uruka.” 6Shalollya nka ulya enangyo nsamu ya veele na samu ya vakureekyi va Yesu. Kyeeri shilellollya shaawukwa nnu. 7Naasa nnsu ulya kashivia, “Nkyiki elyi kwaawukwa? Shikuviaa kyama kya nka yeu na kya ifisi elyo lyinrie, lyitiri mirwe mfungare na mbembe ikumi. 8Ifisi llya kulelyilollya lfa efo, llyo lyikiefo-fo, lyo mmbo lyikudeesye isaama lyuuka si kwa vafu na yeenda urumatony. Neewo vakee ulaniny, mmbo vasheawukwaa elyi valollyaa ifisi elyo, elyi lyeiyo lyo lyilakiyo, lyo lyishekaa-fo. 9Yoo ng'u kukee urango lutiri waarya. Mirwe ilya mfungare ni fidooro mfungare akaaye nka yeto. 10Nafyo ni vamangyi mfungare. Varaanu valemmaa iwa. Na umwi aiyo, na ungyi nnyalesha-fo. Na elyi asheshaa mmbo kinkooye nakae-u fyeeri fyaangu. 11Na ifisi elyo lyeiyo lyilakiyo, yelyo llya nyanya, nalyo llyimwi lya alya mfungare, nalyo mmbo lyikeevingya urumatony.”
12“Na mbembe tilya ikumi kulelollya ni vamangyi ikumi valandewarye umangyi, lyo mmbo vakewarya ushilyi sha vamangyi ando a saa imwi ando amwi na ifisi llya. 13Yaa mmbo akee kindo kimwi nsi, nawo vakeniingya ifisi llya finya tawo na ushilyi lwawo. 14Yeva mmbo vashekapaa fira na Ngurana ya Iruva, na Ngurana ya Iruva mmbo asheavingaa, mashika we ni Nndumi wa Vanndumi, na Mangyi ya Vamangyi na yewo variyani nawe mmbo valya vavaange vakee vasauwe, vairikye.” 15Kawuya ishivia, “Mura ulya kuleulollya, yoo ntuusi ullya akee rembo, ni mmba ya maronda a masanga a vandu na fishomu. 16Na mbembe tilya ikumi kulelollya na ifisi elyo, yewo mmbo vasheswaa nka yeto ntuusi, kutani vashenraa ruu na mbereto, vallye nyama, vashemmamitaa na muro deny. 17Mashika Iruva ambika miriminy yaawo ikusaro lyakwe, na ivika ikusaro lyimwi, na yeninga ifisi llya umangyi lwawo kutani marero a Iruva ainutyo. 18Na nka ulya kulelollya ni muri ulya nniini, utiri umangyi lukee uwe ya vamangyi va uruka.”
Currently Selected:
USUKUYONY 17: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
