USUKUYONY 16
16
Ndeeva wa Nyashi ya Iruva
1Shaita unyanga uniini luuka efo mmba ya Iruva, lwiviaa vasu valya mfungare, “Endeny mukandepusuya fipete filya mfungare firye unyafi lwa Iruva efo ulaniny.” 2Yeto wa mbee keenda kapusuya kipete kyakwe ulaniny, kukasha yuure ikasha, iroo, lyikatira vandu valya vatiri wende lwa ifisi llya, na yewo veindya ifwanu lya vayo. 3Na yeto wa kavii kapusuya kipete kyakwe efo yeeveny, kukava-fo samu sha samu ya nying'a, na findo fyoose fyetiri mumuyo wa muu fikafwa.
4Na yeto wa kararu kapusuya kibete kyakwe efo mireny na ngyusokeny ta mura, tikava samu. 5Naasa sheeta nnsu yeto wa mura eshambaa, “Ni yewe muni usumanu, yewe kuiyo na kweefo, Mweele, mashika elyi kwarummbwa indi. 6Mashika elyi valepusua samu ya vandu veele na ya vakisuku, na yewe kwavaniinga samu vani, nkyo kivasumanyi.” 7Sheeta kiraso ekyo kyeerasya kishambaa, “Ee, Nndumi muni finya toose, Mirumbuye yafo ni ya dede na ya usumanu.”
8Na yeto wa kaana kaletya kipete kyakwe efo nkyeerony, nato ukakora vandu na muro wa vayo. 9Vandu vakaya iya iniini, nawo vakaarara irina lya Iruva yeto atiri wiidimi na ngapo yeto, nawo nta valakurye nta inninga nnduma.
10Na yeto wa karaanu kapusuya kipete kilya kyakwe yoo kitiminy kya uniini kya ifisi llya. Umangyi lwakwe lukasheyo ni ireema vakarafuna ngyulumi tawo kimaruma kya ivavyo. 11Vakaarara Iruva wa iruveu kimaruma kyeevavio, na kimaruma kya moore awo, nta mmbalekurya kya mashora awo-fo.
12Na yeto wa karindaru kapusuya kipete kyakwe kulya mureny ulya nniini uvaangwaa Frati; mura wa vayo ukoomya, naambo kukee shia ya yeende vamangyi vauke taari ya ngaminy. 13Shalollya mimuyo iraru mitefusu ivakye filwa, fishukaa kaniny ka shoka ilya, na kaniny ka ifisi lyilya, na kaniny ka nkisuku ulya wa wongo. 14Yeto nto mimuyo ya vambishwa, veetana ngyende tikee indya vamangyi woose wa ulana, na ivasanyirya kya fira ya nkonu ulya wa Iruva muni finya toose. 15(Lola, mmbo nshaa sha inyinyi. Ngoma yeto mwiilala shoovi, na ikallya soori takwe, naleende ruu na yoora sony takwe.) 16Vakavasanyirya vakafika ando avangwaa kwa Kiebrania, Har-magedoni. 17Na yeto wa mfungare kapusuuya kipete kyakwe efo ngyinii-u. Unyanga uniini lukauka efo mmba ya Iruva, alya kitiminy kya itumbe, lwishambaa, “Kyammaa iva.” 18Kikasha kimwii na iruruma na kidinasi kiniini, kulore uka elyo vandu valekaa-fo kilellollyo kyingyi sha ekyo, shaasa kidinasi ekyo kyeng'ani. 19Na muri yeto nniini ukakwaava kararu. Na miri ya masanga ikawa. Nato muri yeto nniini wa Babilony ukakumbuwa mbee ya Iruva, iniingwa upata lulya lwa unyafi lwakwe. 20Naasa wo kyuuruka kikarisha, nta mafumbu a vayo nalakilollyo-se. 21Na mmbwa ya masaawe, niini nnu, ya masaawe maroo nnu, kyikava kyiroo kyuumu. Ikasha yuuka iruveu ikasheya vandu. Vandu vakaarara Iruva kimaruma kya mmbwa ilya ya masaawe; mashika elyi ngapo yeyo yekee niini nnu.
Currently Selected:
USUKUYONY 16: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
