USUKUYONY 15
15
Fiting'aa finiini fya ifurumya
1Naasa shaorwa wende lungyi kulya iruveu, lung'ani, lweeresye, vasu mfungare varye ngapo mfungare ta ifurumya, mashika kyeendwa nto ng'u unyafi lwa Iruva lushemandaa. 2Shaorwa-se kindo kivakye yeeve lya kilola isasangyi na muro na valya veevinga, vaukye kwa ifisi lyilya, na ifwanu lya vayo, na efo yekeneny lya irina lya vayo, nawo mmbo vesalalyi yoo mbai ya yeeve yeyo ya kilola varye fivale fya Iruva. 3Nawo vakee iimba kiimbo kya ishinga lya Iruva we Mose, na kiimbo kya Ngurana ya Iruva veshambaa, “Mashora afo ni maniini na a ngyende, Woi Nndumi Iruva mwaafinya, Ni ta usumanu, na ta dede shia tafo nta usumanu woi Mangyi ya vandu va masanga. 4Ni vi yeto nalakwindyaa Woi Nndumi na irumisha irina lyafo? Mashika ni yewe kumuni kukee Mweele; mashika masanga moose ashefiryaa ndi mbee yafo, mashika mashora afo a usumanu ammaa yoorwa paa.”
5Numa ya efyo shalollya lyingyi mmba ya Iruva ya yeema lya ukureekyi iruveu ikaruwa; 6na vasu valya mfungare varye ngapo mfungare vakauka efo mmba ya Iruva, veree soori shaa timika-mikaa, nawo vafingye mikanda ya saabu yoo mbafuny. 7Na umwi wa valya vatiri muu mfungare kaniingya vasu valya mfungare fipete mfungare fya saabu, fiishwe unyafi lwa Iruva yeto akee na muu llung'anu fika llung'anu. 8Mmba ya Iruva ikaishwa nnsu uleuka itumbeny lya Iruva na wiidimi lwakwe. Nta nkwiefo nndu aleidima yaanga efo mmba ya Iruva-fo. Kutani mbele ngapo yeto mfungare tinutyo ni vasu valya mfungare.
Currently Selected:
USUKUYONY 15: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
