SABURI 90
90
Kya Iruva na Vandu
1Yewe Nndumi Iruva kuviiye mbanga (Kirishony) yeeru kira marika na marika!
2Meendi mafumbu nalandevikwa, nta ulana lulandeveiywa,
Ni Yewe Iruva, kweiyo pookya llung'anu na llung'anu.
3Mmbo kwaviira nndu efo kiluulyiny,
Kwaamba, “Kyevewuyeny yeni vana va vandu!”
4Kwafo myaaka kyiku sha nkonu umwi nsi!
Nsha nkonu wa ukoowu uleira!
Kwafo nkimwi nsha ikamba lyimwi lya iringa elyi kio.
5Shaasa mura washa mwiingyi kyikava sha ilala rony,
Ngama ikava sha mare amya.
6Ngama akamya na ilambara,
Nkwaany akasemwa na yuuma.
7Mashika lwasarumya kyuuka na unyaasi kwafo;
Na unyafi lwafo lukalwaantya kwaasha.
8Mmbo kuvikue meesi eru yoo mbee yafo
Na findo fyeru fya kyama kwafivika yoo seny ya miso afo.
9Mashika mikonu yeeru myoose mmbo yeera veru kyuuka na unyaasi lwafo.
Myaaka yeeru ikeera sha irosa uuwo.
10Myaaka yeeru ni makumi mfungare!
Kwakooya lutiri finya ikava makumi nyanya,
Utore lwa vayo lukava ukyiva na waataruso.
Mashika fyaira veru lukasarummya uviny;
11A mmbi nndu eeshi wiidimi lwa unyaasi lwafo?
Na uniini lwa unyafi lwafo shaasa kyikwaani.
12Woi Nndumi lumanyisye lwiidimi yekyena mikonu yeeru,
Luwoni nrima utiri urango.
13Woi Nndumi Iruva kulore kulawuya-fo!
Kuvelyilya varundi vafo?
14Luwuutise shapu na ilyillya lyofo kyeeri kya ngama,
Neese lushelooka na ifurya mikonu yeeru myoose.
15Lufuriseny ando a mikonu yeyo kulelulyisa ukyiva!
Sha mashika ando a myaaka ilya lulewonisa makasha.
16Mashora afo alolywa kwa varundi vafo;
Na itumbe lyafo livelolywa ni vana vawo.
17Na ilyillya lya Nndumi Iruva, Iruva weeru lyilukaaye
Mashora a maako eru naavirise.
Ee-da mashora a maako eru kuivirise!
Currently Selected:
SABURI 90: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
