SABURI 89
89
Kyiimbo kya Kyeeri kya Ukiva Urukeny
1Mmbo nshiimba ilyillya lya Nndumi Iruva llung'anu!
Kana kyakwa mmbo kyishevyaa marika moose usaari lwafo.
2Mashika mmbo shaamba, Ilyillya lyafo lyiiyo llung'anu.
Usaari lwafo llwa llung'anu sha ngina.
3Kwaamba, “Mmbo shavika mma na nsauwe wakwa,
Mmbo shilellyiya nndundi wakwa Davidi mboo.
4‘Ngyeeri yafo nsheiselesaa llung'anu;
Kitima kyafo kya umangyi kishekaa-u llung'anu.’”
5Woi Nndumi Iruva, ngina tishaarafumaa nngyende tafo
Na usaari lwafo efo ikwaanuny lya veele.
6A mmbi efo iruvee-u amanyaa inaniswa na Nndumi Iruva?
A mmbi avakye Nndumi Iruva nnang'ani a vasu?
7Iruva mmbo eereywa nnu efo ikwaanuny kya veele.
Ni wa yerewa mmwasi ngota yewo vanringitye.
8Nndumi Iruva, Iruva wa matorito!
Woi Yaave, mmbi akee nkaari sha Yewe?
Na usaari lwafo llukuringitye.
9Mmbo kushilyaa finya ta yeeve.
Kyeeri yarosa matundulu, Yewe kwaaferisa.
10Nyewe kwepeeta nrwe va shoka ilya Rahabu, kwaiwaa.
Woko lwafo lwa finya lukutarakanisa vakyiduva vafo.
11Ngina ni masaa afo, nalo uruka ni masaa afo;
Uruka loose na efyo fiishwe-fo,
Nyewe kulevika-u uvasha lwa vayo.
12Taari ya ndoo na sinde, nyewe kuleumba.
Mafumbu a Tabori na Hermoni akee ikwaarafuma kwa ifura.
13Woko lwaafo ni woko lutiri wiidimi!
Woko lwafo lutiri finya!
Woko lwafo usha lilemaarafumwa!
14Usumanu na udede mfyo uvasha lwa umangyi lwafo,
ilyilya na usaari mfyo fikee ikwiirya mbee.
15Ngoma vandu valya veeshi ikurumisha
Yewo vakee yeenda seny ya kisangu kyafo.
16Kwa irina lyafo mmbo vafura nsanyiny moose.
Kwa usumanu lwafo vakakung'anisa.
17Mashika utore lwa finya tawo ni Yewe.
kwii ilyillya fyafo mmbo luvingaa.
18Mashika ngoo yeeru ni Nndumi Iruva,
Na umangyi lweru ni lwakwe we Mweele wa Israeli.
Kyaasa kya Iruva kwa Davidi
19Llyony kulevia veele vefo wa yoorya,
Kwaamba, “Shileniingya yeto atiri finya ngarami.
Shilenganisa yeto alesauwa nnang'ani a vandu.
20Shilelollya nndundi wakwa Davidi.
Shilemwaamba mafura akwa meele.
21Yeto woko lwakwa luvaa na ikaari uwe kwakwe,
Na woko lwakwa lunningaa finya.
22Nkyiduva nnyashensisya-fo,
Nta mwana wa uravi nnyashellyisaa ukiva-fo.
23Indi mmbo nshekapaa vakyiduva mbee yakwe
Shishekapaa yewo vansuuye.
24Mmbo shinkundaa deny, usaari na ilyillya lyakwa fikee nave,
Na kwa irina lyakwa mmbo avikyoo mbora.
25Mmbo mmbikaa woko lwakwe uwe ya yeve
Na woko lwakwe usha uwe ya mira.
26We mmbo ashivaangaa, ‘Yewe ni baba wakwa
Iruva wakwa na mbanga ya ukiro lwakwa.’
27Neeny shishemwiiikya ave mwana wakwa wa urisasi,
Ave uwe nnu ngota Vamangyi wa ulana.
28Mmbo shinniinga ilyillya lyakwa llung'anu;
Na mma yakwa mmbo shiivikaa kya dede kwakwe.
29Udeena lwafo shisheluseleesau llung'anu;
Na kitima kya umangyi lwakwe mikonu myoose sha ngina.
30Vana vafo vakara vatira mavavasyo akwa
Vakara yeenda na udede lwakwa,
31Vakarekkywa mavavasyo akwa
Vakara itira mavavasyo akwa,
32Llyony shishevakapaa mbiri kya marekyo awo,
Na uravi lwawo kwa ngapo.
33Indi ilyillya lyakwa nshillutaa kwakwe-fo,
Nta nshishallwa usaari lwakwa luve wongo-fo.
34Yeny nshisherekywaa mma yakwa-fo;
Nshishalashaa irero lyauka kaniny kakwa-fo.
35Irero lyimwi shalyiya mboo ya veele lwakwa,
Nkyisumani nshishevia Davidi wongo-fo
36Ngyeri yakwe ikaa-u llung'anu;
Na kitima kyakwe mmbo kyivakaa mwi mbee yakwa,
37Kitima kyakwe mmbo kyikaa-u llung'anu sha mwiri,
Nkureekyi nsaari akee ireveu!”
Ilooka Kyimaruma kya Ivingo lya Mangyi
38Kya indi Yewe kwamweera sakyeny na illema.
Kwannyasika uwe ya mesiya wafo.
39Mma ya nndundu wafo mmbo ilekwengye iswa,
Mmbo kulerindisa ureto lwakwe.
40Nkulewundwa mifiri yakwe myoose
Kwaallwa turuve takwe tikava sama.
41Yewo woose vashiira shia mmbo vepoo masaa akwe
Ammba mwiteendwa ni vannyanuny vakwe.
42Mmbo kwannganisa woko usha lwa vakyiduva vakwe
Kwafurisa woose ewo vamushuiye
43Lingyi mmbo kuleallwa usu lwakwe utushu
Nta nkulemweenya ikapana fireny-fo.
44Mmbo kulemandisa usuri lwakwe
Kitima kyakwe kya umangyi nkulekyeera sumbai.
45Nkuleangura mikonu ya ukoo lwakwe
Kwansikya na usutu.
Kyiterevo kya Ukyiro
46Woi Nndumi Iruva, a kufike indi?
Nkukusurumaa llung'anu?
A unyafi lwafo mmbo lushaakaa sha muro fika indii?
47Kummbwa shaasa yeny shilakee mwiisinda-u
A mmbo kuleumba ufyari lwa vana va vandu kya ruu!
48Ni nndu ungau wa womi ashekaa-u nalafwaa.
Asheturunyaa muu wakwe na finya ta ufu?
49A Nndumi Iruva ilyillya lyafo lya mapookyony nkwi lyikai?
Elyo kulelyisya Davidi mboo kya usaari lwafo.
50Woi Nndumi Iruva, kummbwa shaasa varundi vafo vakee iinyalwa!
Shaasa shisisirye fyaararo fya vandu veengyi yewo valakwiishi.
51Woi Nndumi Iruva, vakyiduva vafo vakee iteenda;
Ee-da, vakee iteenda mesiya wafo wo ando asheendaa.
52Nndumi naarafumwa llung'anu!
Amen amen!
Currently Selected:
SABURI 89: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
