SABURI 9
9
Kyaanu kyeyoora ilyillya lya Iruva
1Woi Nndumi Iruva; shakwaana na ngoo yakwa shoose!
Shishaamba mbony ta mashora afo moose a wende.
2Mmbo nshefura na ikwaarafuma Yewe,
Mmbo nshiimba kya iitikisa irina lyafo.
3Vakiduva vakwa vakawuya numa,
Vakawonisa nsindaraa wakamamika mbee ya usanguny lwafo
4Kwakureeka ando akwa na ishitannya usumanu,
efo kitiminy kya ushilyi kwashirumbuya kya usumanu
5Kwakyeemya vamasanga,
kwarumata valyamari
vakamamika llung'anu na llung'anu.
6Vakiduva veru vakamanda na irewa ngwera llung'anu,
na miri yawo kwaillwa
nta ilakikumbuwa lyingyi.
7Indi Nndumi Iruva ashillyaa llung'anu,
akee ideesya kitima kyakwe kya umangyi narummbwe mwaandu.
8Ushilyi na mirumbuye yakwe ni ya usumanu.
Masanga moose kaarumbuya kya usumanu.
9Nndumi Iruva ni kirishyony kya eto akeemfote,
kirishyony kyeeru kyeeri kya ngatara.
10Valya vakwiishi vakakusirya kwafo,
mashika nkulemmyi nta umwi eto akuruuya-fo.
11Arafuma Nndumi Iruva yeto mwishillya Sioni,
masanga moose namanyi mashora akwe.
12Iruva mmbo akeemwitaiya kiduva kya vepuswa samu;
nta nalarekywa kiiyo kya vanana.
13Woi Nndumi Iruva kushilyillye,
lola valya vashisuuye findo vakeshitannya,
Ewe mwishikira ngatara ta ufu.
14Neeny shaambe usha lwafo loose,
efo muriny wa vefu va Sioni,
neeny shifure kya ukiro lwafo.
15Vandu va masanga vammbwa
efo kiroriny valekisuma wo veni
na nreiyo valeureiya ukatira marende awo.
16Nndumi allollya paa efo mashoreny akwe,
na vandu valyamari vakamanyika
kyuuka na mirundye a maako akwe.
17Kya valyamari woose mmbo vashemamitwaa,
yewo woose valema shia ya Iruva.
18Kya-indi yewo vaturi nnyashevarekywaa-fo
na vafwafwa woose mmbo vafuryaa nsia waawo
19Kwipoo woi Nndumi Iruva,
Kuvaimi finya yewo vakutuula
kurummbwe myaandu ya masanga moose.
20Woi Nndumi Iruva woore wende lwafo,
naambo wakooye imanya sheelyi Wo ni vandu tupu.
Currently Selected:
SABURI 9: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
