SABURI 10
10
Kiterewo kya ilyillywa
1Woi Nndumi Iruva nkyiki elyi kwasalala kwaasha?
A nkyiki elyi kwakusuruma kyeeri ekyi kya ukiva?
2Yewo vakee mbafu vakalamya yewo vanana;
Ni kisha mireiyo yaawo ivatire wo veni.
3Nndu nravi kakushombya filya ngoo yakwe ilanngye,
na nndu nnyoku kya lango kadenga na ilema Nndumi Iruva.
4Nndu nravi kenyala Nndumi yoo usanguny,
kaamba we nnasarye-fo;
Na makusaro akwe moose kaamba, Nkwiifo Iruva-fo.
5Shia takwe kyeeri kyoose tikaoroka
kamina mirumbuye yafo,
vakiduva vakwe woose kavasela.
6Nriminy wakwe kaamba, Nshishutwaa-u-fo,
marika na marika, Nshiwona ukiva-fo.
7Marero akwe akaishwa kidengo,
ntambo na uravi,
marero a ulumi lakwe akavavisa.
8Kava mwaala shia na ikunda iwaa;
nndu nalatiri nta mbese;
Miso akwe akalaaya nndu mfwafwa.
9Kanlaaya ando kwa kirika, sha miiso mbangeny,
kalaaya nndu yeto nnana nantire,
Yee natire nndu nnana,
Namfuruye neefo nreiyony wakwe.
10Nndu mfwafwa mmbo asheringitywa na ituulwa si,
na vandu vafwafwa vakatuulwa ni finya takwe.
11Nriminy wakwe kakusara mmbo Iruva anrekywa,
Kasikya kisangu kyakwe nalaidima ilollya.
12Kwiipoo woi Nndumi Iruva,
woi Iruva ipoo woko lwafo,
kularekyo yewo vanana;
13Ankyiki nndu nravi nainyale Iruva
nriminy wake eshambaa nnyasarye-fo?
14Yewe mmbo kulollye mavavio na ngapo
kuvatarami na woko lwafo.
Nndu nnana kakweera ngundeny tafo,
mashika ni mwikira ngwera.
15Fisha woko lwa yewo vakee varavi na valyamari,
nta ukasha lwawo lulalollywa lyingyi.
16Nndumi Iruva mmbwe mangyi llung'anu na llung'anu;
Masanga asherumakaa urukeny.
17Woi Nndumi Iruva arannya kiiyo kya vanana,
kuvaarannyi na ivaviirya muu.
18Ngwera na ewo vafote kuvarumbuye kyawo
na nndu yeu aukye ndaleny,
nalasheiwonnywa lyingyi.
Currently Selected:
SABURI 10: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
