SABURI 5
5
Kiterewo kya iringwa
(Saburi ya Davidi)
1Woi Nndumi Iruva, arannya marero akwa;
na yeesa mavavyo akwa.
2Kwaarannye kiiyo kyakwa
Woi Iruva mangyi yakwa,
Mashika yewe Mmbwe shikuterevaa.
3Woi Nndumi Iruva,
nraasi kwammita unyanga lwakwa,
ngama shakweengye kiraso kyakwa
numa shavereya kushirouwe.
4Mashika Yewe ni Iruva kulakunndye ukasha,
Kwafo kulashidimaa ikaafo nndu nkasha.
5Yewo vekushela mmbasalalaa mbee ya usangu lwafo-fo,
mashika kusuuye yewo vetana findo fya nguya
6Yewo vaamba wongo woose mamita,
vewaa na valembi mmbo kuvasuuye.
7Indi yeny kwa ikunda lyafo iniini,
nshaanga efo mmba kwafo kwa wiindi;
shishe shinreremyaa.
8Woi Nndumi Iruva,
shitetera efo usumanuny lwafo,
Mashika vakiduva vakwa ni veengyi,
kushoore shia yafo efo mbee yakwa.
9Mashika nkwiifo udede kaniiny kyawo-fo,
ngoo tawo tiishwe urumato,
ekyo varera ni ulembi,
Ngyulumi tawo ntiishwe ntambo.
10Varumate woi Iruva,
vareeye mirikosi yaawo ivatuule,
vaante kyeendwa ni mirunndye yaawo myeesi,
woombute mashika vankura
11Indi valya woose vakurishyaa yewe vafuraa,
Vashiimba kyeeri kyoose noomale,
valooka kyeendwa ni irina lyafo.
12Mashika yewe Iruva, mmbo kuvikyaa mbora yeto atiri usumanu,
Nndumi Iruva ikunda lyakwe nlyivaringityaa sha ngawo.
Currently Selected:
SABURI 5: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
