SABURI 38
38
Kiterewo Kyeeri kya Ngapo
1Woi Nndumi Iruva, Kulashisakire kwirooyo nngoo!
Kulashikape kyeeri kwatuluka nnu!
2Mife yafo ikeshivavisa,
Woko lwafo lukashirovya.
3Mwiili wakwa mbutiri muu-fo,
Kimaruma kya isua lyafo;
4Mafua akwa akatura muroro,
Ni kimaruma kya ikulyamarya.
5Ulyamari lwakwa ni wiingyi,
Lukashirovya sha irio iroo.
6Fyaasha fyakwa mmbo fipooye pururu,
Kyeendwa ni utondo lwakwa.
7Shakwinyika shafika sumbai shikunyiisye.
Shiifiraa nkonu piti.
8Malungo akwa anrovyo ni ndwari,
Mwiili wakwa mmbutiri ng'waani-fo.
9Mmbo Nndumi kwiishi makusaro akwa.
Kavemanya na kiiyo kyakwa.
10Nrima wakwa mmbo ukesaukwa, na finya tikashisiyya,
Na miso akwa akaishwa ireema.
11Vanavama na mbuya takwa mmbo vanshirisha kyeendwa mmaronda yoo akwa.
Na ewo va mmba yakwa sheni nawo vakaveshirisha.
12Valya vakundye ishuuta muu vakareiya mereiyo;
Vakeshekyerya makasha vekundye ishuuta muu.
Vakasinda nkonu piti vevikaa kyama uwe yakwa.
13Indi yeny shava mbimbi sha nndu shilaitye.
Shavaka nndu nalaishi irera nta shilaidimi yaamba kindo.
14Ee-da shavaka nndu nalaitye,
Shavaka nndu nalashiidima ikweekya.
15Indi yeny mmbo shikuvikye nsia, ewe Nndumi Iruva.
Nndumi Iruva shaarannya, woi Iruva wakwa.
16Ewo vashisuuye, “Valashefurya ukiva lwakwa,
Na ishiseka elyi shatura finya.”
17Mikonu myoose mmbo shikevavyo,
Na ulalu ni kufii shilemmyo.
18Mmbo shakurya makasha akwa;
Mashika anshengye tingwa.
19Vakiduva vakwa mmbo vatiri finya;
Ewo vashisuuye ni veengyi,
Nta valatiri kimaruma.
20Mmbo vakeshitannya makasha
Kyeendwa ni yoo akwa mesha.
21Kulashitiye woi Nndumi Iruva.
Kulashekaa kwaasha na yeny woi Iruva wakwa.
22Iluya swany kusheekye,
Yewe Nndumi Iruva mwishikira.
Currently Selected:
SABURI 38: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
