SABURI 37
37
Weesi lwa Yewo Vasaari na Valyamari
1Kulaatarike kimaruma kya vandu vakasha.
Yewo vetana uravi kulavatirye nkuushu.
2Mashika wo mmbo vavivika swany sha nyasi.
Mmbo vashumaa sha mare mavisi.
3Kusirye Nndumi Iruva na itana mesha.
Kuidimi ikaa yaa ulaniny kulatiri mbese.
4Kuruuye ifura lyafo kwa Nndumi Iruva,
Nawe akuidimisyaa fya nriminy wafo.
5Rambikya Nndumi Iruva muu wafo.
Nkusirye nawe akweekye.
6Ashallwa usha lwafo lumike sha sa,
Na usaari lwafo sha mwi elyi nkwaany.
7Sya-do yoo usanguny lwa Iruva Nndumi,
Mmbereye kuloote-pa,
Kulasare kya ewo veefo vavesywaa,
Ao elyi vavinga efo mirundyeny yaawo mikasha.
8Kulasavae nta irooywa ni ngoo!
Mashika itana indo ni ukiva tupu kusheende!
9Vandu vetana makasha mmbo varumatwaa,
Indi ewo vakusirye na Nndumi Iruva mmbo vasheningwaa uruka.
10Irisha kyivero kyaangu, nravi ulya nkukyillolyaa-fo,
mmbo kunnduyaa alya kundo ekai, nta nkushellolyaa-fo.
11Indi ewo vafoo vasheningwaa uruka;
Nawo vashefuryaa uruka elo kikwaani.
12Nndu nravi kasuuya ulya awonisywa;
Na irafunnya mayoo etirwa ni unyafi.
13Indi Nndumi Iruva mmbo aseka nndu nravi,
Mashika mmbo eeshi ni kufii nafike ufishyony.
14Veekapana ni vandu varavi
Usu na ngyura ni fisha fyawo
Naambo vaidimi irumata ngwera na vakiva,
Veedimi ishisha vandu vasaari.
15Indi ngyupanga tawo mmbo tivalyamara wo veni,
Na ngyura tawo mmbo tifishwa-fishwaa.
16Masaa maangu a nndu nsaari na mbora
Kilanya ya masaa meengyi a nndu nravi.
17Mashika Nndumi Iruva asherumata finya ta vandu varavi,
Indi asheidimisyaa ewo vasaari.
18Nndumi Iruva ashetetera vandu vasumanu,
Ni dingu yaawo ni ya llung'anu.
19Fikashesha fyeeri fikasha mmbashaatarikaa-fo,
Mmbo vashevaa na shoonga nkuka kyeeri kya shaa.
20Indi vandu varavi varumakaa.
Na vakiduva va Nndumi Iruva
Mmbo vashuumaa sha fivaro fyangoroshyony,
Ee-da mmbo varumaka sha nsu.
21Nndu nravi mmbo ashaakkwa nalaviraa,
Indi nndu nsaari mmbo aviraa na ngyerya.
22Vashewonisaa uruka ni valya,
Vakee vaniinge mbora ni Nndumi Iruva.
Indi valya vakee vadenge, vasherumatwaa.
23Nndumi Iruva ateteraa nndu.
Na iringa ulya asennyo mmbwe.
24Nakwaa awa sumbai nnyakaau-fo,
Mashika Nndumi Iruva ashenselesaa.
25Yeny mmbo sheekee mwana nkoo na ulaalu ni nndu nkuu,
Na myaaka yakwa ni miingyi,
Shindelollye Iruva are nndu nsaari-fo
Ao nta mwana wakwe eterevaa shoonga-fo
26Kyeeri kyoose mmbo eefo ashakuyaa,
Na vana vakwe vakava vambora.
27Lakana na varavi kutani fya usha,
Naambo kukee urukeny kyeeri kyaasha;
28Mashika Nndumi iruva mmbo akunndye usaari,
Nta nalareyaa valya vasumanu vakwe.
Wo mmbo avaringaa llung'anu;
Indi ufyari lwa varavi lusherumatwaa.
29Vasaari mmbo vaniingwa uruka
Nawo vashekaa-fo llung'anu.
30Nndu nsaari marero akwe ni a urilali,
Na ulumi lwakwe lukarera fya dede.
31Kainndya dede ya Iruva efo nriminy wakwe;
Na mirunndye yakwe ikasongova.
32Nndu nravi kaleveya nndu nsha,
Naambo naidimi immbwaa;
33Indi Nndumi Iruva nnareyaa,
Nndu nsaari efo maakony a vakiduva-fo,
Nta nnyasheniingya mwaanya wa insisya-fo.
34Vika nsia efo kwa Nndumi Iruva!
Na ilatya ngyayo takwe,
Nawe akuvikye ngaya kuwone uruka,
Na yewo kushelollya varavi verumatwaa.
35Shilelollya nravi ngata ekekushuuwa;
Eoroye singo uwe sha mieresi ya Lebanoni,
36Numa shandeira na alya ekai shilankooye!
Shannduya indi shilaidimi illollya-se!
37Lola nndu nsaari, nndu nrilali,
Nndu akunndye ufoo, kavikywa mbora.
38Indi valyamari wo mmbo varumatwa;
Na mbora tawo tilalollyo-se lyingyi.
39Ewo varilali Nndumi Iruva asheveekya na ivakira,
nawe ashevaekyaa kyeeri kya ukyiva.
40Nndumi Iruva ashevatarama na ivakira,
Kuuka efo maakony a varavi ashevakira,
Mashika mmbwe vammbikya nsia navakapannye.
Currently Selected:
SABURI 37: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
