SABURI 39
39
Ikurya lya Nndu Nnrovye
1Shilaamba, “Mmbo shiringa muu wakwa
Shilashetana ulyamari nnang'ani yakwa.
Naakwa shalollya yewo vetana makasha,
Vekee kufii na yeny nshishambaa kindo-fo.”
2Mmbo shilemlalya sau
Shilaambe kindo
Indi ukiva na mavavyo akwa akeendereka,
3nrima wakwa ukarovyo mfyoova,
Ndesa shileengera ikusara,
Ni indo shilekooya yaatarika,
Mafurumyony sharera indi,
4“Woi Nndumi Iruva,
Ufishyony lwakwa ni indii,
Ni mikonu yiinga isae-u.
Shimanyisya fyeeri fya muu wakwa:
5Ate fyeeri fya muu wakwa ni fyaangu deny.
Muu wakwa nshi kindo mbee yafo-fo.
Ee, wo nndu ni sha kirishe nsi.”
6Kya dede wo nndu mmbo akeeira veru sha kirishe,
Yaatarika lyakwe lyoose lya nruu.
Mmbo akesangirya umasi nalaishi muni.
7Ale Nndumi, ulaalu nkyoki shikevereya?
Ni kwafo yewe shivikye nsia.
8Kushuute efo ulyamariny lwakwa loose,
Kulairilye shisekwa mmatondo.
9Shammalallya nshikyaamba kindo lyingyi-fo.
Kimmba ni yewe kuletana indo.
10Kulakishikape lyingyi-fo!
Ngapo tafo tikeshivavisa,
11Elyi kwakapa nndullyamari na insakira,
Kwalyamara usha lwakwe sha kiseso,
Kya dede, wo nndu ni sha mumuyo tupu!
12Arannya kiterewo kyakwa, woi Iruva!
Kwaarannye kiiyo kyakwa!
Elyi shifua kulamalallye sau,
Mashika yeny nsha mwiny-da akeiira,
Ni nndu wa kyaaro kyimwi sha vakuu vakwa woose.
13Shilekeya shikooye ifura
Kulare shansama ulana na irumaka deny.
Currently Selected:
SABURI 39: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
