SABURI 18
18
Kyiimbo kya Davidi Kyeevinga
(2 Sam 22:1-51)
1Mmbo shikukundye, Ee Nndumi Iruva,
Mashika kukee finya yakwa.
2Nndumi Iruva mmbwe isimamba lyakwa,
Mmbwe turuve yakwa na mwiikira wakwa,
Iruva wakwa ni isimamba lyakwa mmbwe shikeenrishya ashiringe.
Ngawo; yakwa, finya ya ukiro lwakwa na turuve yakwa.
Kashiringa nta kuleefo kindo kishipaana.
3Shavaanga Nndumi Iruva yeto akwaani irumishwa,
Kashuuta vakiduva vakwa.
4Sharingitywa ni nrenga ya ufu taari toose,
Na shashingyilyo ni fyuure.
5Sharingitywa ni fyoove fya ufu,
Na mireiyo taari toose.
6Kya ukiva lwakwa loose shavaanga Nndumi Iruva,
Shavaanga Iruva wakwa nashitarami.
Keeta unyanga lwakwa efo mmba yakwe,
Kaarannya kiiyo kyakwa.
7Iruva kanyafukwa, kidina-si kyikasha,
Mafumbu na misuka ya vayo ikaringina.
8Nsu ukasomuka na mmbwen,
Kipala-pala kya muro kyuuka kaniny kyakwe,
Amwi na makaa,
9Kainyika ngina ikaoloka,
Kukava-fo na ireema iniini kwasi ya ngyayo takwe.
10Kaalukya uwe ya Kerubi karumbuka;
Karumbuka na uraato eekaaye maaru a uraato.
11Kaalwa ireema ando akwe kwa yoovya,
Mafishi maroo a mura akansikya.
12Ekisomukya ukova lukamika; m-mbwa ya mawe na kipala-pala kya muro;
Fikasomuka fyuuka mafishiny maroo.
13Naasa Nndumi Iruva karuruma ooka nginii-u,
Unyanga lwa yeto Nniini lukaitiwa luuka uwe.
14Kyeerya vafiduva vakwa mife kavanyanyata,
Karumbuta ukova kavarishisa.
15Llya kulekyeemya fikasukuwa,
Misingyi ya ulana ikalollywa.
16Nndumi Iruva kaorwa woko ukya uwe kashuuta,
Kashuuta ndilyiny nniini
17Kashikira vakiduva vakwa
Vatiri finya shiingyi,
Kashikira yewo vashisuuye
Mashika vetiri finya vakashiilannya,
18Vakashaarama shikee ngatareny,
Indi Nndumi Iruva kashiringa.
19Kashivika ando kutiri mwaanya,
Kashikira kimaruma shilensennya.
20Nndumi Iruva; kashininga findo fya pya,
Kimaruma shilerunda fya usumanu,
Na maako akwa alatiri ukasha.
21Yeny nshilelatya shia ya Nndumi Iruva kashitaa,
Nta shilere Iruva wakwa kyeendwa ni ulyamari-fo.
22Shileinndya mavavaso akwe moose,
Shalatya ushilyi lwakwe.
23Mbee yakwe shilatiri ukasha,
Shakwiisa iitana makasha kya nkuushu.
24Kya indi Nndumi Iruva kashiraa yaambo,
Kyeendwa ni mashora akwa
We eeshi maako akwa nnatannyi makasha-fo.
25We mmbo akee wa dede,
Kwa ewo vakee va dede kwakwe,
Nsha kwa vandu vakee vesha.
26Yewe kwatima kwa vandu vatimye,
Na nnyasi kwa vandu veesi.
27Yewe kwakyira valya vekunyiisa,
Na iwunndwa yewo vekutuula.
28Ee Nndumi Iruva, Yewe kukeshimikya,
Ee Iruva wakwa kwashuuta ireema.
29Kwashiidimisya ikapana na vakiduva,
Kwashiniinga finya ya ikillya isimamba.
30Mirundye ya Iruva yeu alatiri mbese,
Nndumi Iruva marero akwe ni dede.
We ni kisiiko kya valya vanrishyaa.
31Ni vi akee Iruva,
Kuuta-fo Iruva weeru?
Ni vi akee isimamba, Kuuta-fo Iruva weeru?
32Iruva mmbwe ashisimmbye finya,
Neeringa shia yakwa.
33Kavangisa marende akwa sha kinamburi,
Kashiseleesa kipwa efo ifumbu-u.
34Kashilosha ikapana fira,
naambo shiwoni finya ya yoommwa ura lwa arera.
35Ee-Nndumi kwashiniinga ngao ya ukiro lwafo,
Woko lwafo usha lukashivangisa,
Na weekyi lwafo lukashing'anisa.
36Koota misindara efo shia,
Nta kulaore shilemmbwa ando.
37Sharuuya vakiduva vakwa kutani shavatira,
Kulaore nshiimuyaa kutani shavarumata.
38Shivatuule sumbai valashiidimase ikwiipoo,
Mbee yakwa vammbwa sumbai na ilemwa.
39Yewe kwashiniinga finya ya ikapana fira,
Na vakiduva vakingwa kwasi yakwa.
40Kwarishisa vakiduva vakwa,
Na valya vashisuuye shavarumata,
41Vakakapa kiiyo kulave nndu avakira,
Vakafuuya Nndumi Iruva,
Indi nta nalavarouwe.
42Shilevakakapa vakava sha kiluulyi
Kikevivitwa ni uraato;
Shaveera poo sha ipwashi lya shia.
43Kwashuuta maakony a vaafinya,
Kwashaallwa mangyi ya masanga,
Mashinga a vandu shilaveeshi vakashirundya.
44Vakashiita indi, vakashiindya,
Veny vakashisheyaa vereremyaa.
45Veny nawo vakafwa nrima,
Vakasuma turuveny tawo vererema.
46Nndumi Iruva eefo na muu,
Narumishwa isimamba lyakwa,
neetikiswa Iruva wa ukiro lwakwa;
47Kashikapannya kwa vakiduva vakwa,
Kavika masanga sumbai yakwa;
48Ee, kashikira vakiduva vakwa;
Kashiniinga uvingo uwe ya yewo vashisuuye,
Kashiringa yewo vakee mbafu.
49Naasany Nndumi;
Shikurumishaa nnang'ani a masanga,
Shikwiimbyaa fiimbo fyekwaarafuma.
50Iruva mmbo akundya mangyi yakwe uvingy uniini,
Yeto akee nsauwe
Kamoora ikunda lyilasyaa;
We Davidi na vana va vana vakwe
Fika llung'anu.
Currently Selected:
SABURI 18: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
