SABURI 17
17
Kiterewo kya nndu Nsaari
1Woi Nndumi Iruva; kushaarannyi kya usumanu,
Elyi shiifo shikuterevaa,
Kwaaranyi kiiyo kyooka kaniny kyakwa,
Kuwarye kiterewo kyuukye nriminy,
2Kurummbwe kyakwa kisha,
Mashika usumanu ni kwafo luukye.
3Yewe mmbo kushiishi nnu,
Kuleshisununda shilele rweny,
Nta nkulelollya ntambo nnang'ani yakwa-fo.
4Mmbo shilekaa efo usumanuny,
Shaindya ivavasyo lyafo,
Shalakana na vaala shia.
5Shia yafo mmbo shileilatya kyeeri kyoose,
Nta nshilelakana nayo-fo.
6Woi Iruva shiifo shikuvaangaa,
Mashika kushiitye,
Kushilootye yaarwi lyafo,
Kushaarannyi marero akwa.
7Ora ikunda elyo lyafo iniini,
Yewe mwikira valya vakuvikye nsia,
Na valya veefo vakurishyaa,
Kuvakire na woko lwafo usha.
8Shiringa sha elyi kuringaa nyinyiri ya iriso,
Kushisurumi efo kwasi ya kirishe kya maaru afo.
9Kwaasha na ngapo ta yewo valyang'a,
Vakiduva yewo vashiringitye.
10Vareraa marero awo ekutuula,
Nta mirima yaawo ilatiri usari.
11Ulaalu vamma ishiringitya wo taari,
Naambo vakooye ishituula si.
12Vanshilaaya sha miiso, vashiratwe-ratwe,
Sha mwana wa miiso alaaya kyeekya kyakwe.
13Woi Nndumi Iruva, kwiipoo!
Kwa finya yafo kushitarame kuvavinge,
Vandu yeva veesi.
Shuuta maakony a varavi na usu lwafo.
14Woi Nndumi Iruva, kwa woko lwafo
Shikira vandu yeva,
Vandu valasarye kindo kyingyi,
Kulaore ni fya ulana yelu tupu.
Iwutisa ndeu tawo na filya kuvadeesye
na vana vaavo vave na fiingyi mmwa-si
Nawo vareeye vakoku vavo kindo
15Indi yeny mmbo shishekulollyaa yewe,
Kimmba nkee wa dede mbee yafo,
Shankwipoo mmbo nshishywaa ifura yo mbee yafo.
Currently Selected:
SABURI 17: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
