SABURI 19
19
Itumbe lya Iruva yeto oommbye Iruveeu na ulana
1Iruveeu mmbo lyaloora usuri lwa Iruva,
Ngina ikavambisa mashora a maako akwe.
2Nkonu ukavia nkonu ungyi,
Na kio kikavia kio kingyi mbony.
3Ekyo mmbo kyautika kirumwa,
Kulaifo unyanga lushiitiwaa.
4Indi naakwa ni indo,
Mbony tikakwaana ulaniny koose,
Marero akafika mbai ya uruka,
Efo iruveeu Iruva kaallwa-fo ando ekaa nkyeere
5Nato ukasomuka poo sha nsero wa walyi,
Sha nsero ammekufinga asheenda shia takwe na sina
6Nkyeere ukafuma ukya taari imwi ya ngyina,
Neerunguka fika taari ingyi,
Nta kulaifo kindo kishiidima,
Ikwiisa nkukumi wa vayo.
Ivavaso Lya Nndumi Iruva
7Uvavaso lwa Nndumi Iruva ni lwa dede-deny,
Mmbo lwaviirya vandu muu,
Ukureekyi lwa Nndumi Iruva ni lwa toki,
Lukavaniinga waarya valya vakunyiisye.
8Mirumbuye ya Nndumi Iruva ni ya usumanu;
mavavaso a Nndumi Iruva
Lyikaniinga miso ilollya,
Na valya veinndya vakafura.
9Iindya Nndumi Iruva ni mbony shisha uka nlung'anu,
Mirumbuye ya Nndumi Iruva ni ya dede deny moose mmbo akee a usumanu.
Kyeeri kyoose ni a usumanu.
10Ilangwa kilanya ya saabu; kilanya ya ironda lya saabu shisha,
Ikamuya kilanya ya ukyi, kilanya ya lakwa ya ukyi.
11Mmwasi akashiniinga wiikimbi yeny ishinga lyafo,
Yiirikya lyakwa shaona-fo mbusha.
12A mmbi ashiidimaa ilollya ukasha lwakwe muni?
Nndumi kushiliilyise na efyo fya kirika.
13Kushitarame yeny ishinga lyafo,
Shilakooye ilyimbwa finya ni ikurosa.
Neefyo fya ishilimba finya kufiite kwaasha.
14Marero akana kyakwa yeerikywa nyewe mbee na makusaro a nrima wakwa,
Kushaarannyi na iirikya kiterewo kyakwa.
Woi Nndumi Iruva isimamba lyakwa na ukiro lwakwa.
Currently Selected:
SABURI 19: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
