SABURI 107
107
Irumisha kimaruma kya usha lwa Iruva
1Aniny Nndumi Iruva kimaruma we ni mfoo!
Mashika ilyillya lyakwe ni lya llung'anu.
2Yewo vakeevakyire ni Nndumi Iruva, vaambe indo!
Valya alevakira wooka wookon lwa vetuurwa.
3Kavaugiria wooka ngyuruka toose,
Uka taari ya ngama ya nkwaany, taari ya ndoo na ya sinde.
4Maata valera-raa kulya nng'alo shia ya kasa koomu,
Mmbalewonisa muri wa ikaafo.
5Vakatirwa nshaa na nyura,
Vakafwa nrima deny.
6Vafuuya Nndumi Iruva! Efo ukyiveny lwawo,
Kavashiisa makyiva awo.
7Kavatetera veshiira shia shoorotu
Vakooye yeenda vawonise muri wa ikaa.
8Vaani Nndumi Iruva kya ilyillya lyakwe
Na ngyende takwe kwa vana va vandu.
9Mashika we mmbo anirisaa vatirwa nyura
Na yewo vatirwa nshaa kavavuutisa mesha akwe.
10Maata valya valekaa ireeminy na kyirisheny kya ufu,
Mmbo vakee vainive ni ukyiva na mise ya minya.
11Mashika valelema marero a Iruva,
Vakateenda ivavaso lya We Akee Uwe.
12Vakaruvyo ni mashorra moomu;
Vakawa si, kulakaa-fo wa ivaekya.
13Llyony vekee ukyiveny lwawo vakafuuya Nndumi Iruva,
Kavatirisha ukiva wawo.
14Kavanta efo ireeminy na kirisheny kya ufu;
Kafisha-fisha efyo fyevafingye.
15Vaani Nndumi Iruva kya ilyillya lyakwe
Na ngyende takwe kwa vana va vandu.
16Mashika mmbo alefisha-fisha myaango ya arera;
Na imamanya rungo ta minya.
17Maata vakafulukywa kimaruma kya illyamara lyawo;
Na kwa kimaruma kya ikuvavisa na uravi lwawo.
18Mirima yaawo ikasswa shoonga ta wo ngata,
Vakafika afii na ifwa.
19Vakafuuya “Nndumi Iruva efo ukyiveny lwawo.”
Kavashiisa makyiva awo.
20Mmbo arumaa irero lyakwe, lyikavashiisa
Kavauta efo urumatony lwawo.
21Vaani Nndumi Iruva kya ilyillya lyakwe
Na ngyende takwe kwa vana va vandu.
22Vautye Iruva faanu fya ikora na muro,
Na yaamba mashora akwe kwa iimba.
23Maata valeira yeeveny na ngalava,
Vakarunda mashora awo efo mureny eto mwiingyi.
24Efo valelollya mashora a Nndumi Iruva,
Na ngyende efo ngyurony ta yeeve.
25Mashika mmbo arera, keende uraato uniini nnu,
Lukaipoo matundulu a yeeve uwe.
26Mmbo valeerwa uwe nginii-u, numa sumbai efo ngyurony
Finya tawo tikavasya efo ngapweny yeyo.
27Vesinga-singaa na iwa sha vanangwa
Vakasiiyo ni urango lwawo loose.
28Vakafuuya Nndumi Iruva! Efo ukyiveny lwawo,
Kavashiisa makyiva awo.
29Mmbo alekyeemya uraato yeeveny kukava kyimamya
Matundulu a vayo akamalallya.
30Nawo vakafura mashika yeeve ilemalallya
Nawe kaveende mbai ya yeeve alya ando velanngye!
31Vaani Nndumi Iruva kya ilyillya lyakwe
Na ngyende takwe kwa vana va vandu.
32Vanng'anise efo ikwaanuny lya vandu
Na imwaarafma efo mabaraseny awo.
33Mmbo aleallwa mira ikava nng'alo,
Na ngyusoka ta mura tikaumya.
34Uruka lwa uteri unuru kaalwa kipoo kya mmbala,
Kimaruma kya makasha a vandu ewo veifo.
35Kaalwa nng'alo kukava irrwa lya mura,
Na uruka uumu akava ngyusoka ta mura.
36Kasamisya-fo yewo vetirwa nshaa
Vakatana muri wekaa-fo.
37Vakarema nemaa na ivakya-fo misabibu,
Vakailula fimu fiingyi.
38Kavikya vandu vakwe mbora vakafyarika!
Keengera yekena lya findo fyawo fya ivikya.
39Numa maata vakaangwa na iva vafwafwa
Kwa isisywa, ilyillyiswa na unaari
40Keela vaniini yewo vekeeivasisya,
Kavarunguta nng'alo kundo kuleefo shia.
41Indi kakyira vanana ukyiva lwawo
Kafwarisha mmba tawo sha ironda lya moonri.
42Woorotu miriminy mmbalollya vafure
Na uravi lwa wo ngata mmbo luraya kana kyawo.
43Yeto atiri urango nalole findo efyo,
Vaumburani ilyillya lya Nndumi Iruva.
Currently Selected:
SABURI 107: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
