SABURI 106
106
Usha lwa Nndumi kwa vandu vakwe
1Haleluya!
Aniny Nndumi Iruva kimaruma we ni mfoo!
Mashika ilyillya lyakwe ni lya llung'anu.
2Mmbi ashiidimaa kya mashora maniini a Nndumi Iruva?
Na yaamba nnduma wakwe moose?
3Ngoma yewo vatana dede yakwe
Na itana fya usumanu mikonu myoose.
4Woi Nndumi Iruva, kushikummbwe, kyeeri kukeeilyillya vandu vafo;
Kusheekye meendi kukeeivakyira.
5Naambo shilollye mbora ya vasauwe vafo,
Shiidimi yaakana ifura lya vandu vafo;
Shikurumishe shimuni amwi na vandu vafo.
6Mmbo lulekullyamarya amwi na vande veru.
Lluletana maravi, ee lluletana makasha!
7Vande veru kulya Misri
Mmbalekusara mashora afo a wende-fo.
Nta mmbalekummbwa ilyillya lyafo iingyi-fo.
Vakalyang'aa alya yeeveny, yeeve lya Shamu.
8Indi kavakyira kimaruma kya irina lyakwe,
Kavaora mashora akwe maniini.
9Kakyeemya yeeve ilya ya Shamu ikaumya.
Kavaita yeeve sha uruka wuumu.
10Kavaturunya wokony lwa valya evasuuye
Na ivakyiraa wokony lwa vakyiduva vawo.
11Mura ukammila vakyiduva vawo;
Nnyalesaa-u nta umwi waawo-fo.
12Llo valekusirya marero afo.
Vakeemba nnduma wafo.
13Uviny-da vakarekywa mashora akwa!
Vakara ilatya ivavaso lyakwe!
14Vakavika nnu shoonga mbee kulya nng'alo,
Kutani vaata Iruva kyeesony kulya kasa koomu.
15Nndumi Iruva kavaniinga ekyo veekundye,
Llyo kavika ndwari shiroo nnang'ani yaawo.
16Vakatirya Mose kyififi kulya ulaleny,
Na Aron mweele wa Nndumi Iruva.
17Llo sumbai ikavauka ikamira Datani;
Na irika Abiram na vandu vakwe woose.
18Muro ukaaka yoo ikwaanuny lyawo;
Sise ta muro tikarumata valya vakasha.
19Vakasongosya ifwanu lya ngashe wa saabu kulya Horebu,
Vakainndya ifwanu elyo lya saabu.
20Vakaalasha weele lwa Iruva,
Kwa ifwanu lya ng'umbe ilyee mare.
21Vakarekywa Iruva, Nkira waawo,
Yeto aletana finiini kulya Misri
22Mashora a wende kulya urukeny lwa Hamu,
Findo fya wende alya yeeveny ya Shamu.
23Kaamba mmbo avamamitaa kuuta llya Mose alemoolokya.
Kasira unyaasi lwa Iruva nalavamamite.
24Vakateenda uruka llwa usha lusenyi-dwa,
Nta mmbalekusirya kyaasa kya Iruva-fo.
25Vakakunung'una efo yeemyeny,
Na unyanga lwa Nndumi Iruva.
26Naasa Iruva kaorwa woko lwakwe, kalya mboo
Sheelyi mmbo avarumatyaa kulya ng'alo,
27kanyanyata ngyeeri tawo efo vanduny va masanga,
Nawo kavararata ngyurukeny tingyi.
28Naasa vakakulunga iindya Baali kulya Peori;
Vakalya firaso fya varumu.
29Mashora awo akaenngye Nndumi Iruva kasswa,
Ndwari shiroo ikavasheya
30Llo Finehasi alesalala kafywerisa,
Naasa ndwari ilya ikamanda.
31Mbony yei ikava ikumbuwaa kwa wiindi lwakwe
Uka kyeeri ekyo na fyeeri fyoose.
32Mmbo valeengye Iruva unyafi alya mureny wa Meriba,
Mose karooyo nngoo kyimaruma kyawo.
33Mashika mmbo valevavisa nrima wa Mose,
Kumande arera marero wore akusara mbele.
34Mmbalewaa vandu va masanga engyi-fo,
Shaasa Nndumi Iruva evavavasya.
35Indi mmbo valesasanga na vandu va masanga
Vakakulosha mashora awo.
36Vakainndya mafwanu a maruva awo,
Mafwanu yoo akava nreiyo wawo.
37Ee-da, mmbo valeniingya vana wawo va kyuumi na va kyika
Vakarosywa kwa mmbishwa.
38Vakairita samu ilatiri mbese,
Samu ya vana vawo va kyuumi na va kyika
39Ni indo valetefuwa ni mashora awo,
Vakava vatuusi mbee ya Iruva wawo.
40Nndumi Iruva karwaywa nngoo uwe ya vandu vakwe,
Nndumi Iruva kasswa ding'u yakwe.
41Kavarambikya maakony a vandu va masanga,
Na valya vevasuuye vakavashillya.
42Vakasisywa mmbakyiduva vawo
Vakavaalwa mashinga awo.
43Keengyi Iruva aletirisha vandu vakwe,
Indi wo vakankapa mungo velatyaa nsia wawo.
Vakaengera irekya uraviny lwawo.
44Naakwa ni indo Iruva alelollya makiva awo
Elyi aleeta kiiyo kyawo.
45Kakummbwa mma yakwe,
Kavakyiiya kwa ilyillya lyakwe iingyi,
46Kavawonisya ikyiiywa
Ni vandu valya woose vevakamara mifungwa.
47Woi Nndumi Iruva, Nndumi weeru kulukyire,
Kulusanyirye, kuluute efo kwa vandu va masanga
Lwaani irina lyafo yeele,
lukapye ndoro nnduma wafo.
48Naarafumwa Nndumi Iruva, Iruva wa Israeli,
Pookya llung'anu na llung'anu,
Vandu woose waambe, “Amin!”
Haleluya!
Currently Selected:
SABURI 106: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
