SABURI 105
105
Iruva na vandu vakwe
(1 Fye 16:8-22)
1Aniny Nndumi Iruva, vambiseny irina lyakwe.
Ongeyeny vandu mashora akwe.
2Imbeny, imbieny Nndumi Iruva fiimbo.
Kusareny ngyende takwe toose.
3Kurumisheny kimaruma kya irina lyakwe;
Yewo weindya Nndumi Iruva ngoo tawo tifure!
4Kundyeny iruuya weekyi kwa Nndumi Iruva atiri finya,
Nruuyeny mikonu myoose.
5Kummbweny ngyende takwe aletitana,
Ngende takwe na mirumbuye myaandu yakwe.
6Yeni ngyeeri ya Abrahamu, nndundi wakwe,
Yeni vana va Yakobo vasauwe vakwe.
7Nndumi Iruva, We mmbwe Iruva weeru.
Ulaniny koose kwiifo mirumbuye yakwe.
8Akumbuye mma yakwe llung'anu
Irero llya alevavasya marika kyiku.
9Mma alevika na Abrahamu
Na mboo alelyiya Isaki.
10Akeyoora Yakobo kyaasa kyakwe paa
na Israeli kansukuya mma yakwe llung'anu.
11Aleamba, “Shimuniinga uruka lwa Kanaani
Nayo ive ding'u yaany muveni.”
12Kyeeri vekee vaangu vevaa yekena,
Ee-da vandu vaangu na veny urukeny lwa Kanaani.
13Valera-raa uka isanga kufike isanga lyingyi,
Kuuka umangyi lumwi kufike kwa vandu vengyi.
14Indi Iruva nnyalelotora nndu avafote-fo,
Lyingyi alekyeemya vamangyi kwa kimaruma kyawo.
15Evavia, “Mulapaani mesiya wakwa-fo,
Nta kulavavise nkisuku wakwa-fo.”
16Iruva keende shaa urukeny,
Kalamara shoonga shoose vevikye nsia.
17Indi kadeesya nndu umwi kaira mbee
Yosefu ulya alekumbwa ushingeny.
18Ulya valemfinga marende na nse,
Na singony vakanfinga na nnyororo.
19Fyeeri fikainana kya kilya aleawuya kisuku,
Irero lya Nndumi Iruva lyikainukya sheelyi alerera usumanu.
20Mangyi wa Misri kaamba naporomuwe;
Nshilyi wa vandu kamporommwa.
21Kamwallwa nave mwisalallya mmba yakwe;
Na iva uwe ya masaa akwe moose.
22Nashilye vashilyi shaasa kyinsenyi
Na ilosha vamiku vakwe waarya.
23Llony Israeli kaenda urukeny lwa Misri;
Yakobo kava mwuny urukeny lwa Hamu.
24Iruva kavikya vandu vakwe mbora vakafyarika kyuumu
Kavaekya vakava na finya ngota vakyiduva vawo.
25Kaallwa vandu va Misri vasue vandu vakwe,
Vakatannya varundi vakwe kyiila.
26Karuma Mose, nndundi wakwe,
Amwi na isauwa Aron.
27Vakatana ngyende nnang'ani a Vamisri,
Na nngyende-da efo urukeny elo lwa Hamu
28Iruva keede ireema urukeny,
Indi Vamisri vakalema iindya mavavaso akwe.
29Kaalwa mira ya kwawo ikava samu,
Kawaa makunga moose.
30Filwa fikasha fikafumbuka urukeny lwawo,
Fikaishwa naakwa ni efo mmba ya mangyi.
31Iruva karera, kukasha maronda a makuru avaangwaa nri,
Na engyi avaangwaa sava tikaishwa uruka pafu.
32Ando a ivaniinga mmbwa yei ya mikonu myoose kavaniinga mmbwa ya masaawe,
Na muro nniini urukeny lwawo.
33Kalyamara misabibu na miri yaawo ya mafura
Lyingyi kafisha-fisha miri ya urukeny lwawo.
34Iruva karera, kukasha nrye,
Na mafiku a mashanga nalavayekena.
35Myooro myoose ikalyiwa mfyo,
Na fimu efo nreminy na kiwo.
36Kawaa vana vavee woose urukeny lwawo,
Ee, uvee lwa Vamisri.
37Veerye fesa na saabu,
Nta umwi waawo alewonisa nsindara-fo.
38Vamisri vakafura elyi vandu ewo valeuka kwawo,
Mashika mmbo vetirwa mmberei kimaruma kyawo
39Iruva kaala ifishi uwe ya vandu vakwe
Na muro wa imikya elyi kio.
40Vakantereva, nawe kaveengye ngwale;
Kavaniinga mikate miingyi yuuka iruveu.
41Kakapa iwe, kavawonisya mura ushekaa
Yakasoka na kasa ng'alo sha mura.
42Mmbo alekummbwa kyaasa kyakwe kyeele
Kilya aleteerya Abrahamu nndundi wakwe.
43Naasa, kautany vandu vakwe kulya Misri,
Vasauwe vakwe veshiimbaa na ifura.
44Kavaniinga uruka lwa vandu va masanga,
Kavarambikya marema a vandu va uruka elo.
45Naambo vandu vakwe vendye mavavaso akwe,
Na ilatya nsia wakwe.
Haleluya.
Currently Selected:
SABURI 105: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
