SABURI 103
103
Ikunda lya Nndumi Iruva
1Woi nrima wakwa arafuma Nndumi Iruva;
Ee-da, fyoose fikee nnang'ani yakwa,
Fyaarafumi irina lyakwa yeele.
2Woi nrima wakwa arafuma Nndumi Iruva,
Nta kularekyo ilyillya lyakwe lyoose-fo.
3We mmbwe akufwaayaa ulyamari lwafo loose
Kakushiisa ndwari tafo toose.
4Kakyira muu wafo ulandeerekya kifuny
Kakuvika ureto lwa ilyillya na ikukyiyya.
5Kawuutisa ukuu lwafo mesha.
Kwavauka kwawuya nkoo sha ngoru!
6Nndumi Iruva mmbwe atanaa findo fya usumanu
Na yewo vafote kwavarumbuya mwaandu.
7Alerambuya Mose shia takwe
Kaora vana va Israeli mashora akwe.
8Nndumi Iruva eeshwe isarya na ikiiya;
Nnyarooywa nngoo uviny-fo, mmbo eeshwe ilyillya.
9We nnyasakyaa mikonu mmyoose-fo,
Na nnyarooywa nngoo llung'anu-fo.
10Nta nnyalelutyannya kiinani na urekwa lweru-fo,
Nta nnyalelutaiya kinani na maravi eru-fo.
11Mashika shaasa ngina irooye uwe ya uruka
Ni indo da ilyillya lyakwe lyikee iniini kwa yewo vamwereiye.
12Na shaasa taari ya ngama ikee kwaasha na taari ya nkwaany
Nnyendo avikye ngyulyamari teeru kwaasha neese.
13Na shaasa ndeye wa nndu alyillya vana vakwe,
Nnyendo Nndumi Iruva alyillya yewo vamwereiye.
14Mashika We mmbo eeshi yumba lyeru;
Na ikummbwa sheelyi yese mmbo lukee kiluulyi.
15Mwana wa nndu suku takwe tivakye mare;
Sha kivaro kya mbuveny nnyendo ashiininaa.
16Uraato lukaira-u, ate nkikiiyo-fo
Nta ando a vayo nkukyimanyikaa-se-fo
17Indi ilyillya lya Nndumi Iruva lyikee kwa yewo vamwereiye
Pookya llung'anu kufike llung'anu
Na usumanu lwakwe kukafikkya vashuku.
18Mashika yewo veeringa nkundanu wakwe,
Mmbo vakummbwa mavavaso akwe vakaatana
19Nndumi Iruva mmbo avikye kitima kyakwe kya usuri efo iruveu;
Na umangyi lwakwe lukaitorya findo fyoose.
20Arafuminy Nndumi Iruva, yeni vasu vakwe,
Yeni vasero va finya veetana ekyo avavasye,
Mwiishaarannya unyanga lwakwe.
21Arafuminy Nndumi Iruva, yeni matorito akwe moose
Yeni varundi vakwe veetana nsia wakwe!
22Arafuminy Nndumi Iruva, yeni mashora akwe moose,
Kundo koose efo ashillyaa.
Ee-da, nrima wakwa, arafuma nndumi Iruva.
Currently Selected:
SABURI 103: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
