FYAASO 31
31
Ufundo kwa mangyi
1Marero a mangyi Lemueli. Ngyufundo alefundwa m maye.
2Shakuvia inda mwanakwa,
Shakuvia inda mwanakwa shikuirye,
Shakuvia kyoki yewe shekutereva kwa Iruva.
3Kulamaye finya tafo vakeny-fo,
Kulavaninngye masaa afo yewo velyamara vamangyi.
4Nkivaa-fo woi Lemueli, nkivaa vamangyi ina wari.
Nta vaniini ilanga unangwa.
5Vakana mmbo varekkywaa mavavaso,
Veemi vandu vatiri ukiva usumanu lwawo.
6Niinga nndu akeefwa kindo kinangaa,
Na wari valya varovyo mfyoova nnu.
7Vani varekyo uturi lwawo
Valakikummbwe-se ukiva lwawo.
8Indi yewe kuti kurere ando a woose vakee mbimbi;
Na iwaannya usumanu lwa woose valya valakuidimmyi.
9Rera kimaruma kyawo na irummbwa kya usumanu,
Ringa usumanu lwa ngwera na vaturi.
Nka nsaari
10Nka nsaari dede, nkwi awonikaa?
Eto atiri usha ngota wo kindo kya uuru uniini.
11Mmi wakwe mmbo ammbikaa nsia na nrima moose,
Kwakwe awonaa mbusha fyeeri fyoose.
12Nnyatannya mmi wakwe ukasha ttwa-fo
indi mmbo antannyaa mesha fyeeri fyakwe fyoose.
13Mmbo aruuya ruu ta yooka,
Na irunda mashora akwe a maako na finya shoose deny.
14We mmbo avakkye ngalava ya mbusha;
Mmbo eendee shoonga yakwe auta kwaasha.
15Mmbo alavaa ikupoo ngama shuru
Kadesya shoonga ya mmba yakwe
na ivavasya varundi vakwe mashora.
16Mmbo akusaraa iura kyaamba, numa kaura,
Na irema-fo findo fyakwe fya mbusha na nrike wakwe.
17Mmbo akudeesye irunda na finya,
Na ikaarisa maako akwe.
18Mmbo amanyaa kwakooya mashora akwe atiri mbusha;
Naakwa ni kio mmbo arundaa mashora akwe emikkywa ni taa yakwe.
19Mmbo aokaa ruu na maako akwe muni,
Na kwa mini yakwe muni kaoka soori.
20Mmbo ashoorrwaa maako akwe kaniinga ngwera findo,
Kaorwa maako akwe kaniinga vaturi.
21Nnyeereiyye laura kya va mmba yakwe-fo,
mashika yewo va mmba yakwe mmbo varee soori ta finya
22Mmbo asongosia soori takwe ta yaala.
Soori takwe n ta sambarau na ruu ta uuru.
23Mmi wakwe mmbo amanyikaa,
Kyeeri akee ando amwi na vaniini va uruka.
24Nka yeto mmbo asongosyaa soori katikumba
Mmbo akummbyaa vandu va mbusha ngova ta kisiny.
25Finya na wiindi nto kirumi kyakwe,
mmbo asekaa kyeeri akummbwaa ndesi na nrondo.
26Mmbo atarammbwaa kana kakwe karera marero a urango usha,
Kaolongya vengyi kya usha.
27Mmbo asalalyaa nisha wo kindo kishuutikaa efo kyeny kwakwe
Nta kyeeri kyimwi akaa ruu nalarunda-fo.
28Vana vakwe mmbo vakupoo vamwaani.
Mmi wakwe mmbo eembaa usha lwakwe kanrumisha:
29Mmi kaamba, “Vaka veengyi mmbo valetana findo fya wende,
Indi yewe kwavairya woose.”
30Ikushela mmbo lulembaa na usha nshi kindo-fo;
Indi nndu nka mwiindya ashiitikiswaa.
31Nrike wakwe usumani iindyo.
Mashora akwe nkuti naindywa ando koose.
Currently Selected:
FYAASO 31: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
