MWIILOSHA 1

Muu Mmaariso

1Yaa mmarero a Mwiilosha, mwana wa Davidi, mangyi ekee muriny mmbwa Yerusalemu.

2Mmuukeekwarisa deny,

Ni yeny Mwiilosha shamuvia.

Wo kindo mukeetana mmbo mukeekwarisa!

3Ni mbusha-kyi mutiri,

Kwa sina yei shoose yaa ulaniny?

4Ngyeeri mmbo ikeeira, ngyeeri ingyi ikasha;

Indi ulana llushaalashika-fo.

5Nkyeere mmbo ukeefuma,

Nkyeere mmbo ukeyaanga;

6Uraato lukafuma taari ya sinde,

lukarunguka fika taari ya ndoo,

Uraato lukarunguka neerunguka-se,

Lukawuya yoo rungusweny yavayo, kyeeri kyoose.

7Ngyusoka toose tikapusukya yeeveny,

Indi yeeve nnyillemmishwa-fo,

Efo kundo ngyusoka tipusukyaa,

Mfo kundo tipusukyaa lyingyi na lyingyi.

8Mbony shoose mmbo tikeyeende maariso,

Alawaa yaambawa,

Iriso llyikeyaara ilola,

nta yaarwi yaarannya-fo.

9Filya fiyo mfyo fishekaa-u,

Filya filentanwa mfyo fishetanyikaa,

Mashika nkwiiyo kyindo kyimwi kyiiya yaa ulaniny-fo.

10A nkwiiyo kyindo kishambawa, “Lola, ni kindo kyiiya?”

Oode, mmbo kilemma itanyika kupookya mbee, kulaore yese lwammbonika.

11Nkwiifo nndu akumbuye filya fya kasha-fo,

Nta nkwiifo ashekummbwaa efyo fisheshaa numa-fo.

Filya Mwiilosha alelollya

12Yeny Mwiilosha, mmbo shilemmba mangyi ya Israeli kunu Yerusalemu. 13Mmbo shekunda iruya neesununda kwa urango lwakwa wo kindo kyikeetanyika yaa kwasi ya ngina. Shakooya ni ukiva na maariso Iruva aleengye vana va vandu. 14Shakooya wo kindo kyikeekyitani kwasi ya ngina ni maariso na nndu akeerishisa uraato. 15Kindo kyikulemmilemmyi nkushiidimaa ikyoorwa-fo, nta kilya kilaiyo nkishiidima yeekyenwa-fo. 16Shakummbwa, yeny shimuni mmbo shilemmba nndu atiri urango shailannya vashilyi woose valenshillya Yerusalemu mbee yakwa, makusaro na urango shitiri lweerunndya vandu llwa mikonu miingyi. 17Nshekunndye yaavanisa nnang'ani ya urango, ukwale na utondo, numa yavayo itana indo, ni kyimwi sha nndu akeerishisa uraato.

18Mashika iva na urango nnu, na isaukwa niindo lyikooya ing'ana.

Neeto engera imamya mmwasi, mmbo eengera ting'wa mmwasi

Currently Selected:

MWIILOSHA 1: MAS2

Highlight

Copy

Compare