FYAASO 3
3
Ufundo kwa vakoo
1Mwanakwa, kularekyo ufundo lwakwa.
Indi tira mavavaso akwa na nrima wafo moose,
2Mashika ashekuniingaa mikonu miingyi
Muu mwaasha na iviiri.
3Wiindi na usaari filalakani neewe!
Kufifingye singony yafo;
Fireiye ngoony yafo.
4Llyo kushiirikywa na iitikiswa mbee ya Iruva na ya vandu.
5Vika Nndumi Iruva nsia na nrima wafo moose;
Nta kulavike nsia urango lwafo-fo.
6Manya Iruva mashoreny afo moose,
Nawe asheorrwaa miko yafo myoose.
7Kulakulollye yewe kumuni sheelyi kutiri urango-fo;
Indya Iruva kukwiise na uravi.
8Nkyo kishevaa nri nyaminy tafo
Na kiimurisyo mafueny afo.
9Indya Nndumi Iruva na masaa afo
Na fimu fya mbee fya marema afo moose.
10Llyo mbeshe tafo tishiishwaa shoonnga,
Na mindi yafo iishwe fyeena.
11Mwanakwa, kulainyale ikoomyo ni Nndumi Iruva
Nta kulasue isakirwa mmbwe,
12Mashika Iruva llimbi mmbo akyeemyaa ulya ankundye,
Sha ekyi ndeye a nndu akyemyaa mwana ankundye.
13Ngoma nndu ammiitumuso urango usha
Nndu yeto akooya imanyisywa
14Urango usha ni kindo kinuru ngota fesa,
Mmbo lutiri mbusha ngota saabu.
15Urango usha ni kindo kisha ngota wo kindo kya uuru;
Nkwiifo kindo kulangaa kiilanyi-fo.
16Woko usha na urango usha lukuwonisya muu mwaasha,
Na woko umuso lukuniinge masaa na utore.
17Miko yakwe mmbo isenyi nnu,
Toose tikasora unapwe.
18Urango usha ni nri wa muu kwa yewo woose vammbonisaa;
Vakatira ngoma yewo woose vakutiraa nawe.
19Na urango usha Nndumi Iruva mmbo evika uvasha lwa ulana;
Na urango katumarisa iruveeu.
20Kwa urango lwakwe soka tikaruka,
Na mafishi akaolota laura.
21Mwanakwa, soongya nnu kya urango usha na utele.
Kulafire firekye mbee yafo-fo,
22Nafyo fishekuviiyaa ushu muuny wafo,
Na utore usha singony yafo.
23Llyo kushiidima yeenda na ufoo
Nta kulakapaa urende lwafo.
24Kwakaa rembo kulatirwaa mbwerei
Kwalala kuwonisaa rrwe shisha.
25Kulaire werei lwa tiny
Nta ngapo ya varavi,
26Ni elyi Nndumi Iruva we aluvikyaa ngarami.
Akuturunyaa kulatirwa ni nsoori.
27Kulaimi nndu akundye weekyi lwafo ngarami
Kwakooya kutiri wiidimi lwa itana indo.
28Kulavie nndu wafo wa nnyanu, “Enda kushe-se ndesi,
neewe kweshiidimaa inrouwa inu.”
29Kulaokye nndu wafo wa nnyanu ntambo,
Yeto akee kufii neewe nalatiri werei.
30Kulasakye na nndu kulaifo kiteve
Kwakooya kulaore ankutannya nta kindo.
31Kulalange ngaa ya nndu nriiti;
Nta kulasore myeengye yakwe.
32Mashika vandu veesi Iruva Lyimbi mmbo avasuuye,
Indi kavaallwa mbuya takwe valya vakee vasaari.
33Nndumi Iruva mmbo adengaa mmba ta varavi,
Indi kavikya mbora mmba ta yewo vasaari.
34We mmbo ainyalaa vandu va kiila,
Indi kang'anisa valya vakunyiisye.
35Vandu vasaari vakooya iindywa
Indi varung'ani vashesutwaa!
Currently Selected:
FYAASO 3: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
