FYAASO 2
2
Weesi lwa urango usha
1Mwanakwa, arannya ufundo lwakwa
Na iindya mavavaso akwa.
2Kwaloota kuri kafo kwarannya urango usha,
Na irua ngoo yafo kuwonise imanya.
3Ee, kwa tereva kuwonaa utele
Kwa erera kuniingwa imanya.
4Kwaruuya urango usha sheelyi kusyaa fesa
Na ikunda sha kindo kya uuru uniini kikee kisurumi.
5Llyo kushitumusoo iinndya Iruva nkyoki
Kumanyi nisha Iruva;
6Kimmba Iruva llimbi mmbo aniinga vandu urango usha!
Kaniny kakwe kukauka-fo urango na imanya.
7Mmbwe asurumyaa vandu vaarya urango usha lwa dede.
We ni ngoo ya vandu vakee vasaari.
8Mmbwe aringaa mikaaye ya vandu vetana fya songosiny
Na iringa shia ta vandu vakwe va usumanu.
9Kwa shaaranya mmbo kumanyaa utele, na usumanu,
Kumanyaa kindo kya urango na kikee kisha.
10Mashika urango usha llushaangaa ngoony yafo,
Na imanya lyisheangaa muuny wafo.
11Utele lukuringaa,
Imanya lyikushukuraa;
12Fikuringaa kulaange uraviny,
Na marero a vandu varavi.
13Vandu vareeye shia ya usumanu
Na ilatya shia ta ireema.
14Vandu mmbo vasennywa ni itana uravi,
Na ilatya uravi na urekwa;
15Vandu mikaye yaawo irekye,
Na shia tawo tilavaa ikusirya
16Urango usha lukuidimisyaa iturunya nka ntuusi,
Nka mwaala shya atiri marero arolaa a ntambo.
17Nka ashiisityo-u mmi wa ukoo lwakwe
Na irekyo mma ya Iruva wakwe.
18Mmba yakwe ikeenda nnakwa varumu;
Shia takwe tikeenda na kwa vafu.
19Yeto wo moose ansoraa nnakaa awuye tusu-fo.
Nta nnyakaa awuiye shia ya muu-fo.
20Kwa yekyo kulatye ngaa ya vandu vasaari,
Na ilatya myengye ya usumanu.
21Mashika vandu vasaari mmbo vawaryaa ding'u,
Na va usumanu valung'annyaa-fo.
22Kya indi varavi varumatwaa urukeny,
Na va ntambo vasheiluwaa-fo.
Currently Selected:
FYAASO 2: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
