FYAASO 23
23
Nrerye va Karindaru
1Kwakaa rembo ilya na Nshilyi,
Kulasherekyo nta kinnywa mmbi kukee nawe.
2Fiisa uroo lwafo,
Kwakooya kukee nndu kutewiyo n ndeu.
3Kulalange shoonga takwe shisha
Mashika fishiidimaa ikuwara.
Nrerye wa mfungare
4Kwakooya kukee nndu nsuri,
Kulalange nnu iengera masaa-fo?
5Sha ikyafya da masaa mmbo amamikaa,
Nnyavee sheelyi amya maaru,
Akarumbuka akamaya sha ngoru ng'iniu.
Nrerye wa nyanya
6Kulashelya shoonga ya nndu muumu,
Nta kulalange fyeelya fyakwe fisenyi,
7Mashika nriminy wakwe mmbo akee iekena kindo kwalya.
Akuvia, “Kuliiye, kuniiye!”
Indi ngoony yakwe nnyariani neewe-fo.
8Nkuti kusheraaka;
Fyaanu fyafo fyoose fishefwaa ruu.
Nrerye va Kyeenda
9Kulasherera mbony yafo mbee ya nrung'ani,
Mashika asheing'ashaa urango lwafo usha.
Nrerye wa Ikumi
10Kulakillye nnyanu wa kasha
Nta kulawaanyi nnda wa vana va ngwera,
11mashika Iruva Nkira waawo atiri finya.
Nawe ashevaviyyaa ngaya.
Nrerye wa Ikumi na Lyimwi
12Runda na a urango lwafo ilatya ngyufundo;
Loota maarwi afo iarannya umanyo.
Nrerye va Ikumi na Kavii
13Kulare ikyemya mwana.
Kwankapa mbiiri nnyafwaa-fo.
14Kwansaara mbiiri,
Mmbo kunkiraa muu wakwe na kwa warumu.
Nrerye wa Ikumi na Karaaru
15Mwanakwa, nrima wafo ukammba nrango
Ngoo yakwa neeny ishetiraa ifura.
16Ngoo yakwa ishekyesaa,
Kyeeri kana kafo karera marero akwaani
Nrerye wa Ikumi na Kaana
17Ngoo yafo ilalange vandu valyamari,
Indi engera iva mwiinndya Nndumi Iruva mikonu myoose.
18Nkya dede kwiifo ndesi ya llung'anu,
Nta nsia wafo mmbufwaa ruu-fo.
Nrerye wa Ikumi na Karaanu
19Arannya mwanakwa, kutire urango usha
Soongya deny shaasa kukai.
20Kulasheeva umwi wa venangwa mmbwari,
Nta vaafu lwa nyama,
21mashika vanangwa na vaafu mmbo vashiinukya iva ngwera,
mwisinda erengeaa asheraa firami.
Nrerye wa Ikumi na Karindaru
22Arannya ndoo akuirye,
Nta kulainyale mau kammikwa.
23Ura dede nta kulaikumbe;
Ura urango usha, ufundo na utele.
24Ndeye wa mwana nsaari ashevaa mwifura.
Mwiira mwana atiri urango usha ashemfuryaa.
25Furisa ndoo na mau!
Mau mwikwiira nafure.
Nrerye wa Ikumi na Mfungare
26Mwanakwa, shaarannya na nshushwa.
Warya ngaa ya muu wakwa.
27Isonga ni irina yaasha lya iwara vandu;
Nka muny mmbo avakkye kirori kisiise.
28We mmbo alaayaa sha veala shya,
Mmbo alembaa womi veengyi itura usaari.
Nrerye wa Ikumi na Nyanya
29Mmbaki vakee ffwa?
Mmbaki vawoywaa mfyoova?
Mmbaki vatiri myaandu?
Mmbaki vatiri nndiiyo?
Mmbaki vatiri fyaasha filatiri kimaruma?
Mmbaki vatiri miso adodorye?
30M mbalya valalakanaa waryiny,
Valya valalaa shoowi ishosha wari nsha.
31Kulalange wari kimaruma kya fwana ya vayo,
Nta kwakooya ukemika mika upateny,
Na isoka vyaa kyeeri kukeena.
32Masiiyo a vayo mmbo umaara sha shoka;
Ukaasa sha shoka itiri kireeyo.
33Miso afo ashellaa ng'alu ng'alu,
Ngoo yafo isheutaa findo firavi.
34Kushevaa sha nndu mwilala n nang'ani ya yeeve,
Sha nndu mwilala uwe ya ngo ya ngalava.
35Kushaambaa, “Mmbo valeshisaara nta nshilevavio-fo,
Vakashikapa nta n shilemanya-fo.
Ni indii shikupoo lyingyi?
Ra shiruuye kyeena kingyi te?”
Currently Selected:
FYAASO 23: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
