FYAASO 24
24
Nrerye wa Ikumi na Kyeenda
1Kulalange vandu varavi;
Nta kulatingwa ikaa amwi nawo,
2mashika makusaro awo moose ni uwe ya uriiti,
Nkwiifo usha nta lumwi lushuuka kaninyy kawo-fo.
Nrerye wa Makumi Avii
3Mmba mmbo itanwaa na urango
Na ivangiswa na utele.
4Kwa umanyo firya fya vayo fikaishurwa
Findo fya uuru fisennyi.
Nrerye wa Makumi Avii na Lyimwi
5Iva na urango usha ni kyeni ngota itira finya,
Ee, umanyo ngota finya.
6Mashika na usongoru usha kushiidimaa ikapana fira;
Kimaruma kya veolonngya veengyi uvingyi lukawonika.
Nrerye wa Makumi Avii na Kavii
7Kwa nrunng'ani urango usha ni kyuumu iimanya.
Ando kukee ikwaanu, nnyatarambwaa kana-fo.
Nrerye wa Makumi Avii na Karaaru
8Mwikusara itana maravi wo kyeeri
Ashevangwaa nndu nriingyi.
9Uramba nndu nrung'ani akusaraa ni ulyamari;
Nndu wa kiila mmbo asuwoo mbwo nndu.
Nrerye wa Makumi Avii na Kaana
10Kwamfwa nrima kyeeri kya ukyiva
Naasa yewe mmbo kukee nnana deny.
Nrerye wa Makumi Avii na Karaanu
11Kira nndu akeendewaawa kya ruu;
12Kulasheamba numa, “Llulemanya-fo.”
Mashika Iruva mwiesa mirima ya vandu alollyaa;
We mmbo akweesaa kyuuka na mitanyi yafo.
Nrerye wa Makumi Avii na Karindaru
13Mwanakwa, lya ukyi kimmba ni usha;
Irana lya ukyi llirolaa kaniny.
14Ni indo lukee urango usha muuny wafo.
Kwanluwona kuvaa na nsia nsha,
Nta kindo kuvikkye nsia nkifwaa pala-fo.
Nrerye wa Makumi Avii na Mfungare
15Kulalaaye sha nravi awoyaa kyeny kwa nndu nsaari.
Nta kulakare ilyamara mmba yakwe.
16Mashika nndu nsaari mmbo awee keengyi kavekupoo,
Indi nndu nravi mmbo amamitwaa nrenga.
Nrerye wa Makumi Avii na Nyanya
17Kulakape nndoro elyi nkiduva wafo awa-fo.
Kulafure nriminy wafo kyeeri akapa urende lwakwe.
18Mashika Nndumi Iruva mwilollya efyo nnyasennywa-fo
Kishiidimikaa nare nalamworota.
Nrerye wa Makumi Avii na Kyeenda
19Kulasavaa kimaruma kya vetana makasha-fo;
Nta kulatirye vandu varavi kififi.
20Mashika nravi nnyavaa na usha numa-fo;
Taa ya muu wakwe mmbo irumywaa.
Nrerye wa Makumi Araaru
21Mwanakwa inndya Nndumi Iruva na itirya mangyi vio,
Nta kulatarannyi na valya ve raaraa.
22Mashika umamito lwawo lluvasheyaa tiny.
Nkwiifo nndu eeshi renga vashendee-fo?
Mbyaa Tingi-se
23Yeti tikesora yaa-da ni mbyaa ta vandu vatiri urango usha:
Ikunndya vandu mirumbuyeny ya myaandu nshi kindo kisha-fo.
24Mwilotorya nndu atannyi kikasha,
Mmbo adengwaa na isuwa ni vandu.
25Indi veorota varavi vakooya ifura,
Na mbora shisha tivasheyaa.
26Kirouwo kya usumanu
Nsha kimimindo kya mbuya.
27Runda mbele mashora afo poo,
Kwadesya wo kindo nndeny,
Numa kwatana mmba yafo.
28Kulafinngye nndu wafo wa nnyanu kindo kya ruu,
Nta kulaambe wongo uwe yakwe.
29Kulaambe, “Mmbo shitanaa shaasa aleshitannya!
Ni kuti shitaiye kiduva!”
30Mmbo shileira kufii na nnda wa nndu nroko;
Nnda wa misabibu wa nndu nrung'ani.
31Mmbo shiletingwa ilolya shaasa lyimiyye miinga,
Usoka lwa vayo lukasikkya koose,
Na isimamba lyakwe lya mawe lliwoiye si.
32Shalola, shakusara,
Numa shawona ufundo:
33Lala kinnywa-da, rengea-u kinnywa,
Lema maako afo kukooye iimuya:
34Indi kummbwa sheelyi kyeeri kukee rony,
Ungwera lwafo mmbo lukeekusheya sha nsoki,
Uturi lwafo sha nndu arye fisha.
Currently Selected:
FYAASO 24: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
