FYAASO 22
22
1Ni kyeni iva na ngaa shisha ngota masaa meengyi.
2Masimba na ngwera mmbo vakuwakye kindony kyimwi:
Nndumi mmbwe muumbi waao woose.
3Nndu wa waarya nnyalolyaa ukasha kaiyama;
indi matondo ng'u nyaserikyaa akavonisa ngapo.
4Indya Nndumi, kunyiise; mmbo kuvessyoo,
kwiindyo na muu mwaasha.
5Shia ya varavi iishwe miinga na mireiyo;
mwikunda ikira muu wakwe ashiiyamaa.
6Lela mwana ngaa shisha,
nawe nnyasherekywa-fo kutani avaa nndu nkuu.
7Nndu isimba mmbo ashilyaa ngwera,
mwiakkwa ni ishinga lya mwiakuya.
8Mwiilanga ilamya masaa a vandu ashewoyoo nrenga,
wiidimi lwakwe lwa itana makasha lushefishwaa.
9Nndu atiri maako a iwarya vandu ashevikywa mbora,
mashika elyi aavia ngwera shoonga takwe.
10Umbuta nndu atiri kiila na mwaandu usiaa,
yaararo na firumu-o.
11Nndu nsaari mmbo areraa marero mesha
kava mbuya ya mangyi.
12Nndumi Iruva mmbo aringaa kisomyi kya dede,
indi kasarya marero a varavi.
13Nndu nroko mmbo aamba,
“Nshiidimaa isomuka boo-fo kwiifo miiso mmbo ishiwaa!”
14Kana ka ntuusi ni irina yaasha,
nndu asuuyo ni Nndumi Iruva ashewaa-fo.
15Mwana mmbo alangaa mbony ta urung'ani ngoony yakwe,
indi umbiiri lwa wiikimbi lusheuta-fo urung'ani yelo.
16Mwilamya ngwera ashemwekaa navesyo numa
mwiniinga masimba findo fya pya asheindukyaa iva ngwera.
Mirerye ya varango makumi araru
17Loota kuri kuaranyi mareroa yevo vatira urango usha;
olonngya ngoo yafo kumanyi miloshe yakwa.
18Yewe kushefuraa kwakooya kwaavika nrimin wafo,
na ikwiishiwira wo kyeeri.
19Nndu shilangye ilosha inu ni yewe,
naambo ikusirya lyafo lyive kwa Nndumi Iruva.
20Shankureiya mbyaa makumi araru,
mbyaa ta wiikimbi na umanyo.
21Naambo nkuloshe fya usumanu na dede;
Na nndu kankuvesa kuwoni kindo kunrouwaa kya usumanu.
Nrerye wa mbee
22Kulalamyi ngwera mashika elyi akee ngwera-fo,
Nta kulaimi nndu nalatiri kindo usumanu lwakwe-fo.
23Mashika Nndumi Iruva ashevataramaa.
Na ivasoka muu valya vevalamyaa.
Nrerye va Kavii
24Kulatire mbuya na nndu atiri unyafi,
Nta kularwe na mwirooywa nnu nngoo,
25Naambo kulasheisora ngaa yakwe,
Kuwarwa ni nreyyo.
Nrerye wa kararu
26Kulasheva umwi wa vevika kyaasa,
Vandu vekuvikya veelyaa sye.
27Kwakooya kulatiri kindo kyetaa,
Naakwaa ni kiri kyafo kushesokwaa.
Nrerye va Kaana
28Kulakillye nnyanu wa kasha,
Wevikwa mmbakuu.
Nrerye wa karaanu
29Ndesa eefo nndu atiri umanyo mashoreny akwe?
Yeto asherundyaa vamangyi;
Nnasherundyaa vandu valavaa-fo.
Currently Selected:
FYAASO 22: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
