FYAASO 21
21
1Makusaro a mangyi mmbo avakkye mura ushekaa;
Nndumi Iruva mmbo auteteraa wo kundo akundye.
2Mitannnye ya nndu ni songosiny misony akwe,
Indi Nndumi Iruva mmbo aesaa mirima.
3Itana mashora mesha na a songosiny,
Mmbo fisenyaa Nndumi Iruva ngota firaso.
4Miso a ngoo shuu na nrima va ukushobi,
Mmbo fyoora deny ulyamari lwa nravi.
5Vika uramba usha kuvonise masaa meengyi,
Indi kwarunda kwishuung'anaa nkuvonisaa nta kyeni-fo.
6Masaa awonikaa kwa ulembi
Ni nsu ushiira na nsoori wa ufu.
7Uriiti lwa valyamari mmbo lwavamamitya kwaasha,
Mashika elyi vakeelema itana fya usumanu.
8Shia ya valyamari mmbo irekye kulu;
Indi meengye ya nndu nsaari mmbo yoorokkye.
9Ni kyeni ikaa kai ka mmba,
Ngota ikaa poo na nka wa kyaanu.
10Kindo nndu nkasha alangye itana ni uravi;
Naakwaa nkwa nndu wakwe wa nnyanu nnyatiri ilyilya-fo.
11Kwalosha nndu mpalolo, ntondo mmbo awona urango;
Kwalosha nndu ndango mmbo akooya irango mmwasi.
12Iruva nsaari eeshi findo varavi vatanaa efo poo kwawo;
Nawe ashevatulaa na ivamamita.
13Nndu alema yaaranya kiyyo kya ngwera,
Nawe nta nnashearannywaa nkonu aruuya ngarami-fo.
14Simbo ya pya mmbo ifweerisaa Unyafi;
Kindo nndu aningwa kya pya kikee kisurumyi mmbo kifweraa unyafi.
15Usumanu lukansorwa vandu vesha mmbo vafuraa,
Indi valyamari mmbo valollya ukasha.
16Mwiraaraa kwaasha na shia ya urango
Mmbo amatukkya ammbwa ando a vafu.
17Mwilanga unangwa mmbo avaa ngwera;
Nndu akusaraa ilya na ina tupu ashevaa ngwera.
18Valyamari mmbo vakweengye ngapo veni,
Veekulumbaa na vandu vasaari.
19Ni kyeni ikaa kasa nng'alo,
Ngota ikaa na nka ntariti ashaatarisaa.
20Kyeny kwa nndu ntele nkwiifo masaa a uuru,
Indi nrung'ani mmbo ararata masaa moose.
21Mwiinanavya usumanu na ilyilya,
mmbo awonaa muu mwaasha na iindywa.
22Nndu atiri urango usha mmbo ashiidimaa ikamara mifungwa muriny utiri finya
Na iwunndwa turuve vativikye nsia.
23Nndu aringa kana kakwe na ulumi lwakwe,
mmbo aiyamaa renga.
24Nndu atiri ukushombi ni nndu wa kiila;
Na ngaa yakwe mmbo iishwe ukushombi lwa utiilyi lwakwe.
25Nndu nroko mmbo afwee kulaore awona nta kindo kyimwi alanngye,
Mashika maako akwe a mfile nnyakunndye irunda mashora-fo.
26Nsanyiny moose nravi nnyalangaa iwona kindo,
indi nndu nsaari mmbo aniingyaa, lyingyi na lyingyi maako a ukundi.
27Kiraso kya nndu nravi ni kindo kya ituurwa,
ni kituurwa mmwasi kanniingya na ngoo shuu.
28Nkureekyi wa wongo amamikaa,
Indi mwii-itumuso marero akwe mmbo akaa llung'anu.
29Nndu nravi mmbo akwaallwaa nkaari,
indi nndu nsaari mmbo arundaa wo kindo kikasongova.
30Nkwiifo urango usha, umanyo nta makusaro moose a nndu,
Ashiidimaa ivinga Nndumi Iruva-fo.
31Frasi nnyidesywa kwa fira,
indi uvingi mmbo llukaa kwa Nndumi Iruva.
Currently Selected:
FYAASO 21: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
