FYAASO 1
1
Mbusha ya fyaaso
1Efyi ni fyaaso fya Solomon mangyi ya Israeli, ekee mwana wa Davidi. 2Fyaaso efyi nfyeninga vandu urango usha na ngaa ya songosiny; fyevaninga vammanyi utele. 3Fevaninga iva na ngaa ya songosiny, uramba usha, wiitanu usha, usumanu na ikunda kya witanu. 4Fyeniingya matondo urango. Na vandu vakoo waarya na ilala shoovi. 5Nndu nrango nafiite na yeengera umanyo lwakwe, nawe yeto akee ntele awoni isongoywa. 6Nndu namanyi fyaaso na fivakaniso, marero a vandu vatiri urango usha na ngyuraawe tawo.
Wiikimbi kwa Vakoo
7Iindya Nndumi Iruva llo uvasha lwa utele.
Kyaindi varung'ani mmbaminaa urango usha na wiindi.
8Mwanakwa, arannya kindo kushongoywaa ni ndoo,
Nta kulaipale ufundo lwa mau;
9Mmbo fivaa sha ureto nrweny wafo,
Na nse wa utore singony yafo.
10Mwanakwa, kulairikye ilembwa ni vandu valyamari-fo.
11Kyeeri vashaamba, “Ndifo lundelaaya nndu lummbwae;
Osho lukape vandu valatiri mbese!
12Luvamire sha varumu vekee na muu,
Vave sha valya vooloka irininy.
13Lukamare masaa awo a uuru,
Mmba teru lutiishure masaa.
14Osho akannya neese,
Wo kindo luwonisaa lukwaavye.”
15Yewe mwanakwa kulatarannyi nawo!
Kwiimi urende lwafo kulaende nawo.
16Mashika wo vakee irishya itana findo fivishwa.
Usau lwawo ni ipuswa samu.
17Nsoori ureiywaa ndeye ilollye,
Nsoori yeto mmbo wareiywa kya ruu.
18Wo mmbo valaaya na ikulyamara wo veni.
19Nnyindo tikee shya ta vandu variiti.
Uriiti llurumataa muu wa vandu variiti.
Urango Usha Lukevaanga
20Urango usha lluvaanga na unyanga waasha efo shia niini,
Lukalyeesa unyanga efo singireny
21Lluvaanga uwe ya isimamba
Llukapaa weele moongony wa muri
22“Eni varung'ani! Kumandi indii musheengera iva varung'ani?
Kumandi indii vandu va kiila vafuryaa kiila kyawo na matondo isua utele?
23Aranyiny mavavaso akwa!
Shimupusuye makusaro akwa,
Shimuvye marero akwa.
24Kimmba shilemuvaanga,
mukalema ishaarannya.
Shamusinnya mushe mukalema.
25Mukaipala kindo shilemuvia kyoose
Nta mulairikye kindo shilemwiikimba.
26Na yeny da shishesekyaa ngatara yaany!
Shishemwipalaa elyi muwoyoo mbwerei
27Kyeeri mushewoyoo mbwerei sha iruruma,
Ngatara ishemuwoyaa sha kitita si,
Kyeeri ukiwa na ngapo fimuwoyaa.
28Llyo meendi musheshivaangaa kyaindi nshimuirikaa-fo.
Musheshiruuya na sina nta mmushiwonaa-fo.
29Kimaruma mmbo mulelema utele
Nta mulasauwe iindya Nndumi Iruva.
30Kimmba mulelema makusaro akwa
Mukaipala wiikimbii lwakwa loose.
31Naasa mushelyaa ndunda ta ngaa yaany
Mushefummbywa ndeu kya ntambo wany muveni.
32Mashika matondo mmbo akuwaa kya umbafu lwawo
Varung'ani mmbo akumamitaa kya ikuvika nsia lyawo.
33Kya indi wo nndu asharannya ashekaa kippwa,
Ashemalallya sau nta nyashiiryaa ukasha-fo.”
Currently Selected:
FYAASO 1: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
