VAFILIPI 4
4
Mavavaso mave na mave
1Naasany vanavama vakwa, mukee vakunde vakwa, shimulangye nnu, mukaveva ifura lyakwa na ureto lwakwa, salaleny indo shumu mwiikutiri na Nndumi, ee-te vakunde vakwa. 2Mmbo nkeetereva Euodia, shooka-fo shatereva Sintike, vave na nrwe umwi-nsi vekee na Nndumi. 3Ee-da, shikundye na yewe, ishinga uroye wakwa wa dede, kweekye vaka yewo, mashika mmbo valekapannya Nrumi ya Nsia ando amwi neeny, ando amwi na Klementi, ando amwi na yewo vengyi valeakana neeny nawo marina awo akee efo kyitabuny kya muu.
4Fureny na Nndumi mikonu myoose, shaamba-se, fureny. 5Ufoo lwany lulollyo ni vandu woose, mashika Nndumi nkufii nashe. 6Mulakwaatare na kindo nta kimwi-fo, lyo wo kindo kimuting'aa mmbo muterevaa Iruva, ando amwi neemwaana, Iruva nakooye imanya yefyo fyamwaanguya. 7Na urilalyi lwa Iruva lwiilanyi urango lweru, lo lumweekye iringa mirima yaany na makusaro any kyeendwa ni Kristo Yesu.
8Na kya ifurumya vanavama vakwa, kwakooya kwiiyo mbony shoose ya dede, fyoose fikee fya waarya, fyoose fya usumanu, fyoose fikee fya usha na fisenyi, neefyo fyoose fikee fya nnduma nsha, kwakooya kwiiyo usha loose, kwakooya kwiiyo nnduma nsha, langeny nnu mikaye ya ngata yeyo. 9Findo filya mulewarya kwakwa neekulosha, na iita na ifilollya kwakwa, fitaniny, na Iruva yeto wa isarya nakae neeni.
Kyaanu kimaruma kya simbo
10Nndumi mmbo aleshiniinga ifura nnu, mashika elyi ulaalu mwammaa ivangisa mirima yaany kimaruma kyakwa, shaasa llya mwekeekusara kyakwa, lyo mulawonise mwaanya. 11Nshi nkeerera indo mashika elyi shaanguywa nkindo-fo, mashika shilemmaa iishivya na iirikya ikaa na mwiina yeto wakwa. 12Shiishivye yaanguywa, shavemanya na iwonisyo, ngata shoose na kya findo fyoose, mmbo shiishi iwuura na itirwa nshaa, itira fiingyi na yaanguywa. 13Neefyo fyoose mmbo shaidima kyeendwa ni yeto mwiishisimba finya. 14Lyo mmbo muletana kyisha nnu elyi muleakana neeny efo ngatareny takwa. 15Na yeni-da, yeni Vafilipi mwiishi muveni, sheelyi kyeeri shileuka Makedonia llya mapookyony a ivambisa Nrumi ya Nsia, nkwiifo nta siri ingyi ileakana neeny kunu urundiny yelu lwa iningya neewarya kuuta yeni muveni-fo. 16Mashika fika kulya Tesalonike mmbo muleshirikya ngarami naambo shilaanguyo, na nta nshi lyimwi da-fo. 17Nta nshi shilangye mweengere ishitannya indo-fo, lyo mmbo shifurye kimaruma kya simbo yeto tany tikeengera ifumbuka efo kwany. 18Lyo yeny mmbo shitiri findo fyoose na mmwasi, shaishwa shapu; findo filya fileuka kwany mmbo shilefityo ni Epafradito fikava nrungo nsha, kikaveva kiraso kyikee kiirikye kikasennya Iruva. 19Nawe Iruva yeto wakwa mmbo ashemweengeryaa wo kindo ekyo kyamwaanguya kiinani na usimba lwakwe na efo itumbeny lyakwe kwi Kristo Yesu. 20Ulaalu Nndumi we Nde weeru nang'aniswa, akee wa llung'anu na llung'anu. Amen!
Fiidikiro fyeefurumya
21Idikireny veele woose na irina lya Kristo Yesu. Wooroye vany yeva vakee neeny vamwiidikira nnu. 22Veele woose vamwiidikira, mmwasi yewo vakee va mmba ya Kaisari.
23Isarya lya Nndumi Yesu Kristo lyimukaye efo miriminy yaany.
Currently Selected:
VAFILIPI 4: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
