VAFILIPI 3
3
Usumanu lwa dede
1Numa ya efyo vanavama, fureny mukee na Nndumi. Imureiya mbony tilya sheni nkishirovyaa yeny-fo, mashika kyivaa mbusha kwany.
2Kwiiseny na vandu vavakye fite, kwiiseny na veetana maravi kevekwiiseny na vekurumbwa mwiili. 3Mashika vandu vakee varini kya dede ni yese, lukaveva veinndya Iruva kyikee kya ngata ya Mumuyo neewona ifura nnu elyi lutiri Kristo Yesu, nta lluvikye findo fya mwiili yeu nsia-fo. 4Kulakooye yeny sheshiidima ivikya findo fya mwiili nsia. Kwakooya nndu moose alollya kuti yeevikya findo fya mwiili nsia, yeny ni mmwasi. 5Mashika mmbo sherinwa shiitiri mikonu nyanya, nndu wa ufyari lwa Israeli, va mmba ya Benyamini, Mwisraeli va Vaisraeli, efo kweeringa uvavaso shava Mfarisayo, 6efo kwa utakusu, shava mwiisisya siri, kya usumanu luwonikaa kimaruma kya iringa uvavaso, nsheetiri mbese-fo. 7Kyaindi lyo findo filya sheefilollye mmbusha kwakwa, mmbo shilefilollya nruu kimaruma kya Kristo. 8Ee, kyailanya yefyo, kwakwa yeny mmbo shilelollya findo fyoose ni ruu kwainanisa na usha yelo lwiilanyi kyeeso lweemanya Kristo Yesu, Nndumi wakwa, yeto kimaruma kyakwe shilelollya findo fyoose ni ruu neefyaallwa sha mando naambo tupu shiwoni Kristo. 9Na lyingyi shilollyo shikee nawe, naambo shilasheetira usumanu lwakwa shimuni yelo lushuka uvavasony, kyaindi shiwoni usumanu yelo lushaa na kyikusiryo kwa Kristo, llo usumanu luukye kwa Iruva, kyeendwa nkikusiryo. 10Naambo shimmanyi we na wiidimi lwa iruka lyakwe na kya iitana nawe kya makyiva akwe, naambo shivakaniswa na ifwa lyakwe. 11Naambo na kyikakyi shiidimi ifikya iruka lya vafu.
Itamballya na mbee kya ivika nsia
12Lyoony nshi sheelyi shammaa ifika-fo, ao shammaa isongovika-fo, oode, mmbo shikeengera iwaana naambo shikooye iwara kilya Kristo Yesu ashikunndya llya aleshivaanga. 13Vanavama, nshikusarye sheelyi mmbo shammaa itira-fo; lyo shitiri irero lyimwi nsi, fingyi fyoose shafiviira numa, shatamballya yefyo fikee mbee yakwa; 14mmbo nkeyaangusya, nambo nshewonisa ureto lwa simbo yeyo ya uvaango lwa kiiruveu lwa Iruva luukye kwa Kristo Yesu. 15Kyasiany, yese lukee vasongovisi lusoongye yefyo; naakwa mwakusara ngata ingyi kya kindo kyoose, Iruva mmbo ashemusukuyaa neekyo. 16Lyo yaa lufikye ulaalu lweende lwikee indo.
17Vanavama vakwa, shilatyeny yeny, muvelola na valya vakeesora kyaaso kilya lulemoora. 18Mashika lyo kwiifo vengyi shaasa shilemmaa imuvia mbony tawo na ulaalu shimuvye lyingyi na misoru, sheelyi mmbo vakee vakyiduva va nsalaba wa Kristo. 19Yewo mmbo vashefurumyaa na urumato, mashika iruva lyawo nndeu, na itumbe lyawo ni usutu elo lwaawo, valangye findo fya ulana. 20Lyo yese kweru kwekaa ni iruveeu, na yoo nng'u luvikye nsia ilollya Mwikira, we Nndumi Yesu Kristo; 21mmbwe yeto ashealashaa miili yei yeeru ifwaa, ivake mwiili yeto wakwe wa itumbe, na wiidimi yelo lwakwe lushevikaa findo fyoose yoo si ya marende akwe.
Currently Selected:
VAFILIPI 3: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
