VAKOLOSAI 1
1
1Ni yeny Paulo shikee nrumi wa Kristo Yesu kyeendwa ni isarya lya Iruva shikee na Timoteo mwanamaye weeru. 2Shamureiya yeni vanavama mukee veele, vasaari va Kristo mukee muriny wa Kolosai. Isarya lyimukaye na urilalyi yelo luukye kwa Iruva Nde weeru.
Kiterewo na kyaanu
3Mmbo lukeyaana Iruva, Nde wa Nndumi weeru Yesu Kristo wo nkonu lwiimuterevyaa. 4Kipookya kyeeri luleita mbony ta kyikusiryo kyany kwa Kristo Yesu, na kya ikunda elyo lyany kwa vandu va Iruva woose. 5Kyeendwa ni ivika nsia eto mulesurummyo iruveeu, eto mbony ta vayo muleita llya mbee efo dedeny ya irero lya Nrumi ya Nsia. 6Nnyo yeyo ilemufikya shaasa ivekee ulaniny koose, ikavevika ndunda tilollyo, shaasa ikeeng'ana efo kwany uka llya muleiita na imanya nnu isarya elyo lya Iruva kya dede. 7Shaasa Epafra akee ishinga urooye wany na nkunde waany alemulosha. Kaveva mwifurukannya Kristo akee nsaari kimaruma kyany. 8Mmbwe yeto aleluvia kya ikunda lyany lyikee lya ngata ya Mumuyo.
9Kimmba ni indo naakwa ni yese, uka nkonu ulya lulepooka iita llukeederya itereva kimaruma kyany-fo, naambo mukooye iishurwa urango lwa ikunda lyakwe na waarya na imanya lya efo nriminy. 10Naambo mukee shaasa kimusumannyi mbee ya Nndumi mukooye insennya deny, muvevika ndunda shisha efo mashoreny mesha moose, na yeengera urango lweemanya Iruva. 11Mwishidimisywaa deny, kiinani na finya ya itumbe lyakwe, muvewona usisiryo lwa wo ngata muvereyaa mukee na ifura; 12mwishanaa Nde yeto alemuniinga iwarya waavi lwa ding'u ya veele efo seny yeyo. 13Nawe mmbo aleluuta efo finyiny ta ireema, kalusamisa-fo kalwaata efo umangyiny lwa Mwana yeto muni ikunda lyakwe. 14Na efo kwakwe mfo lutiri iwowowa na llyo ifwaayo ngyulyamari.
Kristo na ishora lyakwe
15Nawe mmbo avakye Iruva yeto nalavaa ilollya na miso, kasongoya fyuumbe fyoose ikaafo. 16Mashika fyuumbe fyoose mmbo fileumbwa mmbwe, yefyo fikee iruveeu na efyo fikee uwe ya uruka efyo filollyo na miso na filalollyo, fikava fitima fya itumbe, ao umangyi, ao wiidimi, findo fyoose mmbo fileumbwa kyeendwa mmbwe, na kimaruma kyakwe. 17Nawe mmbo asongoye findo fyoose ikaa-fo, na fyoose ni efo kwakwe fikutiri. 18Nawe mmbwe nrwe wa mwiili, nnyo siri, nawe ni mapookyony, na wa mbee yuuka kwa vafu, naambo nave nsongoru wa findo fyoose. 19Mashika mmbo alekunda findo fyoose nafyo mmbo fishefurumyaa yoo kwakwe. 20Nawe nashesanda findo fyoose nafyeende yoo kwakwe, elyi alemaa yeende urilalyi na samu yakwe alya nsalabeny, yoo kwakwe ni indo, kwakoya ni kya findo fya yaa ulaniny ao fya iruveeu. 21Na yeni elyo mbee mwekee vatarakanise mukavikyana fiduva, mukatana filasumani, ulaalu mmbo ammaa imusanda; 22kyeendwa mwiili wakwe llya alefwa, naambo namoomwi na yoo akai, muve veele, mulatiri kiteve nta mbese; 23mukaarye efo kikusiryony ekyo mwiikee uvasheny, muvangiswa, nta mulashiindutwaa mure ivika nsia lya Nrumi ya Nsia ilya muleeta mbony ta vayo, ilya ileongoyo fyuumbe fyoose fikee kwasi ya ngina, nnyo yeyo yeny Paulo shileva mwiifurukannya.
Urundi lwa Paulo efo Siriny
24Ulaalu mmbo shikeefura nnu kya makyiva yaa ashitiri kimaruma kyany, neeny shaveinutya-u filya filewiika-u fya makiva a Kristo efo mwiiliny wakwe, nnyo siri yakwe. 25Nayo mmbo shilevikwa shive mwiifurukannya kiinani na ungari lwa Iruva shilerambikywa kive mbusha kwany, naambo shiinutye irero lya Iruva. 26Kyama ekyo mmbo kyekee kirike uka mbee ya marika moose, kyaindi ulaalu mmbo kilesukuyo veele vakwe. 27Nawe Iruva kakunda iwoora shaasa usimba na itumbe lya kyama ekyi efo vanduny va masanga, nawo ni Kristo akee nnang'ani yaawo, ivika nsia kya itumbe elyo. 28Nawe mmbwe yeto lukee ivambisa mbony takwe, lwishiikimbaa wo nndu, neelosha wo nndu lukee na waarya loose, naambo lweende nndu asongovikye kwa Kristo. 29Neeny mmbo shikeekuvinisa nnu kimaruma kya irero elyo yeni, shavekutakura kiinani na iidimisywa ni yeto mwiirunda na finya nnang'ani yakwa.
Currently Selected:
VAKOLOSAI 1: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
