MEEKYENA 35
35
Miri valeniingo Valevi
1Naasa Nndumi Iruva karera na Mose alya kyaandeeny kya Moabu, kufii na mura wa Yordan, kufii na Yeriko kammbia, 2Vavasya vana va Israeli vaniinge Valevi miri naambo vaonise ando kweekaa ando amwi na ando kwe yiisa kuleringitya miri yeyo Valevi valeningwaa. 3Miri yeyo mmbo vaningwaa vakeefo na ando kwe yiisa vawonise, na findo fyawo fya mmba. 4Na yoo kwa yiisa muninge Valevi, kuuka muriny mmbo kuvaa marende iyana taari toose. 5Nkyo mmbo musheesaa marende kiku kyimwi kuuka yoo nnangani ya muri taaritoose indo, 6Na miri yeyo musheningaa Valevi ni miri irindaru ive ando awo eekusuruma kwakooya nndu ashewaa ungyi nasherishya-u, muvevaniinga na miri ingyi makumi aana naivii ya mmwasi. 7Miri myoose musheningaa Valevi ni makumi aana na nyanya ando amwi na kundo kwa yiisa findo. 8Miri yeyo musheningaa vana va Israeli, yewo veengyi mmbo vawonisaa mmwasi neewo vaangu vaonise miri myaangu, wo nndu kiinani nawe.
Miri ya Veerishiswa
(Nku 19:1-13; Yos 20:1-9)
9Kyasia Nndumi Iruva kyerera-se na Mose, kammbia, 10Rera na vana va Israeli kuvavie, Elyi mushekillyaa Yordan mwaange Kanaani, 11mmbo mushetiraa miri yeerishya, naambo kwakooya nndu awaa nndu kya nrenga nanderishya-fo. 12Miri yeyo mmbo ishemuviiya nnyeerishya, kimaruma kya mwiitaiya kiduva, naambo mwiiwaa nalawaawa kutani ashesalala yuutyo uvingo ando a vayo. 13Miri yeyo yeerishya mmbo ishevaa irindaru. 14Miri iraru ikae kwakulya ya Yordan na ingyi iraru Kanaani kweni. 15Miri yeerishya nkimaruma kya vana va Israeli na kimaruma kya veny, na muny akee kwany, naambo yeto moose awaa nndu kikee kya nrenga narishye-fo. 16Lyo kwakooya nndu akaba ungyi na kiiya kya minya, yeto mmbo akee mwiiwaa, nawe nkuti nawaawa. 17Na kwakooya mmbo alenkaba na iwe lyishiidimaa iwaa nawe kafwa, naasa yeto mmwiiwaa nawe nkuti nawaawa. 18Ao kwakooya mmbo alenkaba na kiiya kya kiri kishiidimaa iwaa nndu, nawe kafwa, yeto mmwiiwaa nawe nkuti nawaawa. 19Yeto asumani iwaa mwiiwaa mmbwe yeto muni ashemmbwaa. 20Kwakooya nndu akuna ungyi kya imuswa ao kamweerya kindo, ao kammbereya ando kammbwaa, 21ao kankaba na maako kya ukiduva kafwa, yeu mmbo ashewaawaa, yeto asumani mmbwe ashemmbwaa kyeeri ashenkooyaa. 22Lyo kwakooya mmbo alenkuna kipashuka nalansuuye nta ao kamweerya kindo nalammbikye kiduva, 23ao iwe, nawe keedima ifwa nalakee nkiduva wakwe nta nalankunndye makasha, 24llyo ikwaanu lyisherumbuyaa yeu alewaa neeto asumani naambwae shaasa usumanu lukai; 25nalyo ikwaanu mmbo lyishelatyaa nndu yeto lyimwaauwe efo maakony a yeto eesumani immbwaa, ikwaanu lyimmbiire neefo muriny wakwe weerishya, nandekaa-fo fika ufu lwa nkohani wakwe akeemwaambe mafura meele. 26Lyo kwakooya nndu mwiiwaa andeukaa efo muriny wakwe weerishya 27neeto eesumani immbwaa kashenkooya eekee boo ya muri yeto weerishya, neeto eesumani immbwaa kammbwaiya-fo, we nnyasheekennyoo uvingo-fo. 28Mashika yeto mwiwaa mmbo kyenkooye nakae kulya muriny wakwe weerishya kufikye ufu lwa nkohani nniini, nawe kammaa ifwa llyo mwiiwaa yeto nandewuyany na kyeny kwakwe muni. 29Mavavasyo yaa mmbo musheatanaa fyeeri fyany fyoose ando mukai. 30Nndu mwiwaa kammutyo ukureeki mmbakureeki nkuti nawaawa, lyo nkureeki umwi nnyamaa yuuta ukureeki lwa nndu lweewaa-fo. 31Mulawarye kindo kyoose kyeetaa elyi nndu awaa-fo, mwiiwaa nkuti nawaawa, 32ntamulawarye kindo kyoose kimaruma kya yeto arishya muriny naambo nawuye kyeny kwakwe, nakae-fo kushefikya ufu lwa nkohani nniini. 33Kwakooya mwatana indo mmushetefusa uruka lwany-fo, mashika ipuswa samu ta vandu mmbo lyitefusaa uruka, nankukaa-fo kiraso kimaa isanngya uruka elyi samu yapusuyo-fo, kuuta ya yeto muni apuswa samu. 34Kimmba niindo loleny nnu mulashetefusa uruka lwany neeny shiiyo, mashika yeny Nndumi Iruva mmbo shikee na vana va Israeli.
Currently Selected:
MEEKYENA 35: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
