MEEKYENA 33
33
Kyaaro kya Misri Kundefika Moabu
1Kyaaro kya vana va Israeli mmbo kileva indi, kyeeri valeuka Misri na maronda awo veeriwa ni Mose na Aron. 2Mose mmbo alereiya mbony ta kyaaro kyawo shaasa valenkaa Misri shaasa Nndumi Iruva alevavasya, Fyaaro yefyo fyawo mmbo fileva indi. 3Wo mmbo valepookya Ramesesi mwiiri wa mbee, nkonu ikumi na karaanu. Elyi lya nkonu wa kavii Pasaka immiira Vaisraeli vakauka-fo veeteterwaa ni woko lwa finya lwa Iruva nawo Vamisri veelollye indi, 4kyeeri ekyo llyo Vamisri veetiri ishora lyeerika vana vawo va mbee, llya Nndumi Iruva alevakapa, ando amwi na maruva awo.
5Vana va Israeli veekyuuka Ramesesi vakandemannya ulale alya Sukoti. 6Kuuka Sukoti vakafika Etamu, yoo kasa koomu kamandi. 7Vakauka Etamu vakawuya numa fika Pi-hahiroti kufii na Baal-sefoni, vakamannya ulale alya Migdoli. 8Veekyuuka-u yoo Hahiroti vakeera nnang'ani ya yeeve vakaanga kasa, llyo vakeenda kyaaro kya mikonu iraru yoo kasa ka Etamu vakamannya ulale ando avaangwaa Mara. 9Veekyuuka Mara vakafika Elimu, yoo Elimu mmbo kweeiyo ngyusoka ta mira ikumi na ivii, na miri ya myaangashi makumi mfungare, yoo vakamannya-u ulale. 10Vakauka Elimu vakandemannya ulale kufii na yeeve lya Samu, 11Kuuka-u vakafika Sini, 12Kuuka yoo kasa ka Sini vakafika Dofka vakamannyau ulale. 13Numa vakafika Alushi. 14Kuuka Alushi vakafika Refidimu, andu kulatiri mura uniwaa mmbandu. 15Vakamannya ulale alya kasa ka Sinai, 16veekyuukau vakafika Kibrot-hataava. 17Veekyuuka-u vakandemannya ulale Heseroti. 18Heseroti vakafika Ritma. 19Ritma vakafika Rimon-peresi. 20Uka-u vakafika Keheleta 21Woolea Libna vakafika Risa, vakamannya-u ulale. 22Woolea Risa vakafika Kiheleta, vakamannya-u ulale. 23Kuuka-u vakanndemannya ulale alya ifumbuny lya Sheferi. 24Kuuka yoo ifumbuny lya Sheferi vakafika Harada. 25Harada vakafika Makeloti. 26Makeloti vakafika Tahati, 27Uka yoo vakafika Tera. 28Ukau vakeenda Mitka. 29Uka Mitka vakafika Hashmona, 30kuuka-u vakafika Moseroti. 31Veekyuuka-u vakafika Bene-yakoni. 32Uka Beneyakani vakeenda Hor-hagidgadi 33Kuuka-u vakafika Yotbata, 34Veekyuuka-u vakafika Abrona. 35Uka-u vakafika Esion-geberi. 36Kuuka-u vakafika Kasa ka Sini. 37Vauka-u vakafika Kadeshi, vakamanya ulale yoo ifumbuny lya Hori yoo nnyanuny wa uruka lwa Edomu. 38Nkohani Aron kavavasyo-u ni Nndumi Iruva nasaami neefo ifumbu lya Hori, kandifiyya-fo, wiikee mwaaka wa makumi aana uka vana va Israeli vamuuka Misri. 39Nawe Aron mmbo eetiri myaaka iyana na makumi avii na iraru kyeeri alefiyya efo Hori. 40Naasa mangyi ya Aradi we Mkanaani ekee taari ya Negebu ya uruka lulya lwa Kanaani keeta mbony ta isha lya vana va Israeli. 41Nawo llya valeuka alya ifumbuny lya Hori vakashefika Salmona vakamannya-u ulale. 42Kuukau vakafika Pinoni. 43Kuuka-u vakafika Oboti. 44Kuuka Oboti vakafika Iye-abaramu alya nnyanuny wa Moabu. 45Kuuka yoo vakafika Dibon-gadi. 46Kuuka Dibon-gadi vakafika Alimon-dibilataim 47Kuuka yoo vakafika fidoorony fya Abarimu kufii na Nebo 48Kuuka-u vakafika fyaandeeny fya Moabu, yoo kufii na mura wa Yordan, alya Yeriko. 49Vakamannya ulale kufii na Yordan yoo nnang'ani ya Bet-yeshimoti na Abel-shitimu fyaandeny fya Toabu.
Uramba lwa Iruuka Kanaani
50Naasa alya fyaandeeny fya Moabu Nndumi Iruva karera-u na Mose, kufii na Yordan, yoo Yeriko, kammbia, 51Rera na vana va Israeli, kuvavie indi, “Kyeeri mukillyaa Yordan na yaanga urukeny lwa Kanaani, 52mmbo mushuumbutaa-fo vandu va uruka yelo, mmbo mubabaraa mawe yoo awo akee mareiye mafwanu mulyamare na mafwanu awo, na ando awo a miindye mufishefishe deny,” 53llyo mutireny uruka yelo neekaa-fo, mashika mmbo shamuniinga uruka yelo luve ding'u yaany. 54Neeni mmbo mushetiraa uruka kweekaba kura kweelatya ngyufyari tany, ufyari uniini luwonise mmwasi, na ufyari udu indo shaasa vafye, shaasa kura ivaa niindo nndu yeto ashetiraa yoo, mutire uruka shaasa ngyufyari tany tikai. 55Lyo mwanra mulaumbuta vandu va uruka yelo neevarishisa deny, yewo muvasaaraafo mmbo vashevaa sha mbashwe misony any na miinga mbafuny tany, vamusaveese efo urukeny elo mukai. 56Mwanra mulavaumbuta-fo, mmbo nshemukabaa yeni shaasa shekunndye ivakaba wo.
Currently Selected:
MEEKYENA 33: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
