MEEKYENA 32

Ngyufyari ta Taari ya Ngama ya Yordan

(Nku 3:12-22)

1Vana va Ruben na va Gadi mmbo veetiri findo fya mmba fiingyi nnu, nawo llya valelola vakakooya uruka lwa Yeseri na lwa Gileadi ni usha nnu kwa yiisa findo; 2vana ewo va Gadi na va Ruben vakasora Mose na nkohani Eliaseri na vasongoru vawo, vakavavia, 3Ataroti na Diboni, Yezeri na Nimra Heshboni na Elieale, Sebamu na Nebo na Beoni 4llyo uruka elo Nndumi Iruva, alelukaba vana va Israeli veelollye, nalo ni usha kwa yiisa findo, na yese mashinga afo mmbo lukee veesa findo. 5Vakaamba, Kwakooya kwalwiirikya yese luniingwa uruka elo luve lweru lure lulakillya Yordan. 6Mose kavavia vana yewo va Ruben na Gadi, A vana va maye vany mmbo vashendaa fireny neeni mwiimuye yaa? 7A nkikyi elyi mukunndye iwaa vana va Israeli nrima vare valaruuka Yordan indetira uruka yelo Nndumi Iruva alevaniinga? 8Ni indo-da na vande valya vany valetana kyeeri shilevaruma vauka alya Kadesh-barnea naambo vandesaiya uruka. 9Llya valerwa vakakooya imungo lya Eshikoli vakalollya uruka lulya, vakawaa vana va Israeli mirima, naambo valasheerwa neendetira uruka yelo Nndumi Iruva alevaniinga. 10Llyo unyafi lwa Nndumi Iruva lukarwa nawe kalya mboo, kaamba, 11Ni kya dede nkwiifo nta nndu umwi wa valya valeuka Misri, bookya yewo va myaaka makumi avii enda na mbee asheangaa urukeny yelo shilevikya Abrahamu na Isaki na Yakobo kyaasa-fo, ni elyi kulore valeshiirikya na nrima moose; 12lyo we Kalebi mwana wa Yefune Mkenazi na Yosua mwana wa Nuni, kimmba wo valeirikya Nndumi Iruva na nrima deny, wo vashefikaa-fo. 13Unyafi lwa Nndumi Iruva lukarooya vana va Israeli, kavaruuta-ruta kulya kasa veenyanyakaa, ando a myaaka makumi aana, kutani irika elyo lyilelyamarya Nndumi Iruva lyilemaa isiiya-fo. 14Lola ulaalu neeni mmbo mwawuya alya a vande vany, nnyo mikaaye ya vandu varavi, naambo mwaante-se unyafi lwa Nndumi Iruva lusheye Israeli. 15Mashika lyo mukammeeveka nawe mmbo ashemuraa musiiye kunu kasa, na vandu yeva woose vamamitwa kimaruma kyany. 16Naasa vakasembeya kufii nawe vakaamba, Yese mmbo lutanaa miri ya findo fyeru fya yiisa yaa, lutannyeu na miri kimaruma kya vana veru; 17lyo yese luveni mmbo lushiipoo fisha fyeru lwiire mbee ya vana va Israeli woose kutani lwavafita efo vakeenda lyo vana veru wo mmbo vakaa miriny yeyo luiringityaa na turuve, varingwa nisha kya vandu va uruka elo. 18Yese lluwuyaa kwerufo, kutani vana va Israeli woose vamaa iwonisa ando awo efo. 19Mashika yese llushetiraa ding'u amwi nawo efo kwakulya ya Yordani-fo, mashika ding'u yeeru mmbo ikee taari ya ngama ya Yordan. 20Naasa Mose kawuya ivavia, “Lyo kwankooya mushiboo fisha fya fira mwiire nafyo mbee mwiisalallyo ni Nndumi Iruva,” 21na lyingyi kwankooya womi vany woose vashiiboo fisha varuuke Yordan kutani Nndumi Iruva amaa yuumbuta vakiduva veru woose, 22na vandu yewo vamaa ivingwa yoo mbee ya Nndumi Iruva llyo yeni muwuyeny kwany mulakitiri mbese mbee ya Nndumi Iruva ao kwa vana va Israeli llyo na Nndumi Iruva asheirikya uruka yelu luve lwany. 23Lyo mwanra mulatana indo, mmbo mulyamaryaa Nndumi Iruva nnu, neeni manyiny ulyamari yelo nkuti lumuwoye. 24Kyasia songosieny miri kimaruma kya vana vany, na miri ya moonri any, lyo muveinutya neefyo mwavikya kyaasa. 25Naasa vana yewo va Gadi na Ruben vakarera na Mose vakammbia, Yese varundi vafo mmbo lutanaa shaasa yewe Nndumi Iruva weeru kwaluvavasya. 26Vana veru na vaka veru na moonri eru, na ng'umbe teru toose mmbo vakaa yaa miriny ya uruka lwa Gileadi; 27lyo yese varundi vafo luruuke, wo nndu na fisha fyakwe, fya fira, mbee ya Nndumi Iruva, lweende fireny shaasa yewe Nndumi Iruva weeru kuryeyaamba.

28Kyasiany Mose kavavasya nkohani Eliasari na Yosua mwana wa Nuni na vaniini va mmba ta ngyufyari ta Israeli kya mbony ta vandu yewo. 29Mose mmbo alevavia indi “Kwakooya vana va Gadi na vana va Ruben mmbo varuuka mura Yordan ando amwi neeni, wo nndu na fisha fyakwe veere mbee ya Nndumi Iruva, neeni muvinge uruka elo llyo mushevaniingaa uruka lwa Gileadi luve ding'u yaawo; 30lyo vakallema iruuka ando amwi neeni veerye fisha fyawo, ding'u yaawo mmbo ishevaa efo kweni Kanaani.” 31Llyo vana va Gadi na va Ruben vakarouwa, vakaamba, Shaasa Nndumi Iruva aleluvavasya yese varundi vafo, niindo lushetanaa. 32Mmbo luruukaa lurye fisha fyeru mbee ya Nndumi Iruva, lwaange Kanaani, neese ding'u yeeru mmbo ishevaa kunu Yordan. 33Naasa Mose kaniinga vana va Gadi na va Ruben na kyenga kya ufyari lwa Manase mwana wa Yosefu uruka lwa mangyi Sihoni wa Vaamori, na Ogu wa Bashani na miri yaawo myoose yekee miringitye turuve. 34Vana va Gadi vakatana miri ingyi nnyo Diboni na Ataropti na Aroeri, 35na Atiroli-shofani na Yaseri na Yogbeha, 36na Bet-nimra na Bet-harani, mmiri itiri turuve, na miri ya moonri. 37Vana va Ruben vakatana muri wa Heshboni, na Eleale, na Kiriatiaimu; 38na Nebo, na Baal-meoni, (marina awo mmbo alealashwa,) na Sibna, na miri yeyo valeitana vakaifishya marina engyi. 39Nawo vana va Makiri we mwana wa Manase vakeenda vakatira Gileadi vakasoka Vaamori yewo veefo. 40Naasa Mose kaniinga Makiri mwana wa Manase uruka elo lwa Gileadi nawe kakaa-fo, 41Na Yairi we mwana wa Manase kandetira fyuungo fya Gileadi, kafivaanga Hawot-yairi, 42Nawe Noba kandetira Kenat na fyuungo fya vayo, neefifishya Noba, kweelatya irina lyakwe muni.

Currently Selected:

MEEKYENA 32: MAS2

Highlight

Compare

Copy