MEEKYENA 31
31
Fira Sheele na Vamidian
1Naasa Nndumi Iruva karera na Mose, kammbia, 2Vana va Israeli vataiye mbele vamidiani kiduva, llyon yewe kufwaa neesanga na vandu vafo. 3Naasa Mose karera na vandu, kavavia, Niinngyeny vandu yewo vakee neeni veende fireny, indekabana na Vamidian. 4Uteny-fo vandu kyiku kyimwi veende fireny wooka wo ufyari lwa vana va Israeli. 5Naasa vakautwa-fo fiku, kiku kimwi wo ufyari, womi fiku ikumi na fivii valesauwa veende fireny. 6Naasa Mose kavaruma veende fireny wo ufyari kiku kimwi, wo na Finehasi akee mwana wa nkohani Elieseri, nawo veende fireny na fiiya fya ando eele, na maranda yoo a yiivya, timattwaa vandu. 7Naasa vakakabana na Vamidian shaasa Nndumi Iruva alevavasya Mose, vakawaa womi woose. 8Vakawaa vamangyi va Vamidian na vandu vengyi, Evi, na Rekemu, Suri na Huri, na Reba, mmbo vamangyi varaanu va Midiani, na Balaamu mwana wa Beori nawe kawaawa. 9Vana va Israeli vakakamara vaka va Midiani mfungwa amwi na vana vawo, na ng'umbe tawo na mburu, na findo fingyi vakafikamara. 10Na miri yaawo myoose, na ngyulale tawo toose vakatimamita na muro, 11Nawo vakeeboo findo efyo fyoose, na mifungwa yeyo, ya vandu na findo fikee na muu. 12Nawo vakafyeende mbee ya Mose na nkohani Eliasari na mbee ya ironda lyoose lya Israeli yoo ulaleny imungony lya Moabu, kufii na Yordan yoo Yeriko.
Iwuya Wooka Fireny
13Naasa Mose na nkohani Eliasari na vasongoru va ironda elyo vakasomuka efo ulaleny indevaammbya. 14Naasa Mose kasua na vasonguru vaniini va itorito, yewo veekallya fiku fiku, neewo va mayana, mayana, valenkaa fireny. 15A mmbo mulevara na muu vaka woose? 16A yeva nshiwo valelemba vandu veru Israeli kyeendwa m'Balaamu, vakalyamarya Nndumi Iruva alya Peori naasa ngapo ikakooya ironda lya Nndumi Iruva. 17Naasany ulaalu weeny vana woose va kyuumi, na wo nka alenkaa na nndumi. 18Kyeendi vaka na vana va kyika valandemanyi nndumi, vareny na muu kimaruma kyany. 19Neeni wo nndu alewaa nndu ao alebaana nnying'a nakae poo ya ulale, mukwiilyise ando a mikonu iraru, na nkonu wa mfungare na mfungwa waany. 20Na soori toose, na kindo kya shonyi, na kya mafwaa a mburu, na fiiya fyoose fya kiri mufiilyise, neeni muveni. 21Na Eliasari kavia womi woose valenka fireny Elyi llyo ivavaso Nndumi Iruva aleniinngya Mose; 22wo kindo kyoose kishiidima isisirya muro, mmbo mukyeesaa na muro, kyeeremuke, numa kyiilyiswa mmura usheekaa, 23na kyoose kilashidimaa isisirya muro kiveitwa efo mureny yeto. 24Neeni mmbo musangyaa soori tany elyi nkonu wa mfungare, mweeremuke, llyo mwaangeny efo ulaleny.
Yaava Mifungwa
25Naasa Nndumi Iruva karera na Mose, kammbia, 26Ekyena vandu yewo valekamarwa mfungwa, na findo yefyo fya ivika, yewe na nkohani Elieseri, na vasongoru va mmba tawo; 27kwaave findo efyo kavii, kwa yewo valeuka fireny, na kwa ironda lyoose. 28Numa kuwarye kwa vandu yewo valeenda fireny waavi lwa Nndumi Iruva nndu umwi nnang'ani ya mayana araanu, na ng'umbe, na mishungu, na moonri; 29numa uta-u kyenga kya nnang'ani kukiniinngye nkohani Eliasari, kive kiraso kyakwe kwa Nndumi Iruva 30Na yoo kyengeny ekyo kya vana va Israeli mmbo kuwaryaa-fo kimwi kya makumi araanu uka efo vanduny, ng'umbe, mishungu, moonri, findo efyo kuniinge Valevi yewo veeringa ando eele. 31Naasa Mose na Eliasari vakatana shaasa Nndumi Iruva alevavasya Mose. 32Na yefyo filesaa filakee fyaave ni moonri fiku mayana arindaru makumi mfungare na araanu, 33ng'umbe fiku makumi mfungare na ivii, 34mishungu fiku makumi arindaru na imwi, 35na vandu vakava fiku makumi araru na vavii, mmbo vaka yewo kulore veeshi womi, 36na kyenga kya nnang'ani kya yewo valeenda fireny yeekyena ni moonri fiku mayana araru makumi araru na mfungarena mayana araanu; 37na waavi lwa Nndumi Iruva lwa moonri yoo ni mayana arindaru makumi mfungare na firaanu. 38Na ng'umbe ni fiku makumi araru na irindaru, nang'u waavi lwa Nndumi Iruva ni ng'umbe makumi mfungare na ivii, 39na mishungu fiku makumi araru na mayana araanu, waavi lwavayo lwa Nndumi Iruva ni mishungu makumi arindaru na imwi. 40Na vandu fiku ikumi na firindaru, waavi lwa Nndumi Iruva vandu makumi araru na fivii. 41Naasa Mose kaniingya nkohani Elieseri waavi yelo, nkiraso kisha kwa Nndumi Iruva shaasa Nndumi Iruva alevavasya Mose. 42Neefo kyengeny yekyo kya nuang'ani kya vana va Israel Mose mmbo aleirauwa na vandu yewo valeenda fireny, 43naasa kyenga yekyo kya vandu kyekee moonri fiku mayana araru makumi araru na mfungare mayana araanu, 44na ng'umbe fiku makumi araru na firindaru kya vana va Israeli Mose kootau kimwi kya makumi araanu, 45na mishungu fiku makumi araru na mayana araanu 46na vandu fiku ikumi na firindaru, vandu na findo fikee na muu, kaniingya Valevi valya veeringa ando eele, shaasa Mose alevavasyo ni Nndumi Iruva, 47uka kyengeny kya vandu va Israeli, Mose keebo nndu umwi nnang'ani ya wo vandu makumi araanu, a vandu naakwa ni a mafisi, kaniingya vana va Levi yeto akeensimbe mashora a yeema ya Nndumi Iruva; shaasa Nndumi Iruva evavasa Mose. 48Na veekallya itorito fikufiku, na vashilyi fikufiku, na va mayana, vakasheya Mose, 49vakammbia, Yese mashinga afo mmbo luleekyena vandu va fira yewo vakee kwasi yeeru, na nkwiiyo nta umwi alereka-fo. 50Neese lukeende waavi lwa Nndumi Iruva luuka kwa wo nndu, lwa findo fya saabu, na findo fya ngata shiingyi, ivika usandi lweru na Nndumi Iruva. 51Mose na nkohani Eliasari vakawarya saabu yeyo na fia filya filesongosyo fyoose. 52Na saabu yeyo valeengye Nndumi Iruva ya vashilyi yewo va fiku na va mayana, mayana yekee shekeli fiku ikumi na firindaru na mayana mfungare na makumi araanu, 53(mashika vandu yewo va fira mmbo valetira mifungwa yakwe, wo nndu.) 54Naasa Mose na nkohani Eliasari vakawarya saabu yeyo kwa vashilyi yewo va fiku fiku na va mayana, mayana vakayeende efo yeemeny yeele, naambo ive kindo kyeekummbwa kwa vana va Israeli mbee ya Nndumi Iruva.
Currently Selected:
MEEKYENA 31: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
