NAHUMU 3

1Woshiny lwafo muri wa iwaa

Mmbo kwiishwe ulembi na usokyi

Kulakee imanda isoka vandu.

2Arannya yoona lya ngova,

Ndirimu ya ngalyi,

Ntiri va frasi na mitika idinaa.

3Veesaama frasi mbakee ikuteesya,

ngyusu na mafumu mmbo akeemika-mika;

Minying'a mmiingyi nnu ilavaa yekyeena,

Vandu mmbo vakee ikukapafo kyeeri vakee iira.

4Kyimaruma kya usonga lwa isonga,

Mmbo kwallemba vandu yewe nka nsavi,

Nkulekumba masanga akava mashinga kya usonga lwafo

Na vandu va masanga na usavi lwafo.

5Lolaany; Yeny Nndumi Iruva wa matorito mmbo nkapana neewe;

Mmbo shikwaammbwa irinda lyafo lyifike nrweny,

Naambo masanga moose akulollye kwikee mbereto,

Ngyumangyi toose tilole na miso usutu lwafo.

6Mmbo shikweerya mbulula kutefuke,

Shikutannyaa kiila,

Shikwaale kuve weeting'isa kuminwa.

7Numa vandu vakulollyaa vakurishe veeshaamba,

“Ninavi kwarumatwa,

Mmbi akaa rembo nakulyilye ukiva?

A nkwi shikuruuyya mwivirya muu?”

8A ndesa yewe mmbo kukee nsha ngota Tebesi,

Muri ntane mbaambaa ya mura wa Naili?

Uringitywa ni mura,

Yeeve mmbo lyeekee usiro lwa vayo mura ukava isimamba.

9Isopia mmbo yeekee finya yakwe,

Kyiwo na Misri kulaifo umando,

Vandu wa Puti na Valibya mmbo veemwekyaa.

10Naakwa ni indo ukaipowa ushinga,

Vandu vakarawa usamirony.

Naakwa mmbana vakwe mmbo vekonindwa

Veraratwa yefo mbai ya shia,

masiinngo akakapyo mbusha,

Vaniini va uruka woose vakafingwa mise.

11Naakwa ni yewe kunangwaa-da, kusurumwa

Nkurishaa nkiduva naambo kukusurumi.

12Turuve tafo mmbo tikee sha makuu avikye nisha, atiri ndunda mbiiri ta mbee

Akasisikwa mmbo awoyaa kaniny kya mwiilya.

13Lola matorito afo, ni vaka vakee nnang'ani yafo,

Ngyiri tafo ntikeetiruye vakyiduva vafo,

muro vameimamita deny nsiria ya vayo.

14Raiyeny mura mulale shoovi kya isheringitywa.

Tumariseny turuve yaany.

Posheny mapwashi na marende,

Deesyeny iriko iniini lya ikorya matofwalyi.

15Yoo nng'u muro ushekurumatyaa,

Usu lushemumamityaa kwaasha;

Lumurumate shaasa nre ilyee.

Kweengereny sha shondo,

Kweengereny sha nre!

16Veekapa-mbusha vafo mmbo veengereka ngota nyinyiri, kya indi ulaalu mmbo weera veru sha shondo tarumbuka. 17Vaniini va uruka lwafo nsha nre, vasongoru wafo nsha ironda lya shondo, kyeeri kya mbyo mmbo likaa masimambeny kya indi mwi ukammbaa nkwiifo amannyaa kundo teera nafo-fo. 18Yewe mangyi ya Ashuru, veisa-finda-fyafo mmbo vakee ipara rwe, vaniini va uruka vafo mbakee irengeya. Vandu vafo mmbo vantarakannya yefo mafumbuuny kulaore kwiifo nndu wa ivasangirya. 19Nkwiifo nndu wa ivavara fishavere kutiri-fo, fishavere fyafo fya ufu. Vandu vakeeiita mbony tafo mmbo vakakakapa maako. Mashika mmbi kulaore aleovya uvishwa lwafo lulatiri umando?

Currently Selected:

NAHUMU 3: MAS2

Highlight

Compare

Copy