MIKA 4
4
Nndumi Iruva Asheshillya koose kwa Urilalyi
(Yes 2:1-4)
1Mikonuny yeyo ya ifurummya ifumbu lya mmba ya Iruva mmbo lyishelollywa uwe ya engyi moose. Vandu va masanga woose vasheirishya nawo vaambe, 2“Nndeny lusaami na ifumbuny kwa Nndumi Iruva mmba ya Iruva wa Israeli. Mmbwe asheluloshaa efyo fisumani itana, lushesora shia alooraa. Mashika ufundo lwa Nndumi Iruva nnyoo Yerusalemu lukai. Mmbo arera na vandu vakwe ekee alya Sioni.” 3Mmbo asherumbwaa myaandu ya vandu va masanga, na ya vaafinya yewo va kufii na va kwaasha. Ngyusu tawo vashetanaa-fo makumbi, na mafumu awo nave makasi ao finndo. Vandu va masanga mmbakyeenda-se fireny-fo, nta ideesya ikapana-fo 4Wo nndu mmbo ashekukayaa na ufoo ekukaye sindeny ya nsabibu wakwe na nkuu wakwe, kuleefo kindo kimweresee. Ni Nndumi Iruva muni matorito aamba indo. 5Wo nndu mmbo eendya iruva lyakwe, lyo numa yese loose mmbo lusheindyaa Iruva Nndumi Iruva llung'anu na llung'anu.
Israeli Ashewuyaa Kyeny
6Fyeeri fiifo fishaa, kyeeri vandu yewo shilevakaba vakakamarwa ushingeny nshevaumbya-se ando amwi, ni Nndumi Iruva aamba. 7Mmbo vakee vabobore vakakamarwa kwaasha na kwawo, lyo mmbo nshevaviraa wiiya vasange na valya valesaafo vashevaa ufyari uniini. Neeny mmbo nshevashilya yoo Sioni uka kyeeri ekyo fika llung'anu. 8Neewe Yerusalemu Nndumi Iruva akekwiisa sha mburu takwe mmbo kushewuyaa iva kirembo kya ushilyi sha llwa lwekee mbee. 9A nkiki elyi kukeefiira nnu indo? Nkiki elyi kukevavio sha nka alyiwaa ni usu? Ndesa mmashika elyi kulatiri mangyi nawo varingyi vafo valemmisya? 10Kukaarise neevavyo yewe Yerusalemu sha nka akeewona, kimmba ulaalu mmbo kusamaa muri yeu kundesomuka na poo. Kweende Babilony kwiitikyo, lyo kulya Nndumi Iruva ashekukiraa vakiduva vafo. 11Vandu veengyi va masanga vankudeesya ikushingillya. Vakaamba, Yerusalemu nkuti ulyamarwa! Nkuti lure muri yeu wikee nrapu! 12Kyeendi lyo vandu yewo mmbeeshi kindo Nndumi Iruva arye nrony-fo. Mmbalemanya mmbo vakeyuumbyo ando amwi vasewa shaasa nganu yatannyo-fo. 13Nndumi Iruva mmbo aamba, “Vandu va Yerusalemu, endekapeny vakiduva vany! Mmbo nshemukaarisaa muvake shau itiri mbembe ta minya na mbungashu ta yaambo moomu. Mmbo mushekakasha vandu va masanga meengyi, na masaa yoo valesoka vandu vengyi na finya musheyeengye, yeny Nndumi Iruva wa masanga moose.”
Currently Selected:
MIKA 4: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
