MIKA 3
3
Mika Asakira Vasongoru va Israeli
1Arannyiny-te, yeni vasongoru va Israeli, Kimusumannyi-se itana fya nsumanu? 2Mmbo musuuye fya usumanu mukakunda efyo fya uravi. Mmbo mwashisha vandu vakwa neelya nyama yaawo mukarau maffwa aruu. 3Mmbo mwalya vandu vakwa. Mukavaambo shoony neefisha-fisha maffwa awo, mukavavyaa-vyaa sha nyama teekora na nungu. 4Lyo fyeeri fiifo fishaa efyo mushefuyaa Nndumi Iruva lyo nnyashemwaaranyaa-fo, mashika elyi mutannyi fya uravi. 5Nndumi Iruva mmbo avia vakisuku, Vandu vakwa mmbo valembwaa mmbakisuku valya vaniingwa kindo naambo vavavie mbony shisha, lyo vakisuku ewo veni vakeerese valya kulore vavaniinga kindo. 6“Vakisiku, fyeeri fyany fyansia ulaalu, na mwi kwany mmbo wifoo usholokyaa. Kimmba mwareta vandu vakwa mmukionaa-se myoorye ya ukisuku-fo, nta mmukiidimaa-se yaawuya fisuku-fo. 7Yewo vashengeraa yaawuya mmbo vashesukaa kimmba ekyo vaawuya kishevaa ruu. Mmbo vashenyiswaa nnu kimmba Iruva alemaa ivaarannya.” 8Kyeendi yeny Nndumi Iruva mmbo ashiishura mumuyo wakwe na finya yakwe, kashisimba ngata ya ilanga usumanu na wiidimi lweevia vandu va Israeli kya ulyamari lwawo. 9Shaaranyiny-te yeni vashilyi va Israeli, yeni musuuye usumanu, murevetaa usumanu, kisha kyikava nkyo kikasha. 10Mmbo mukeetana muri wa Nndumi Iruva to Yerusalemu uvasha lwa vayo mukaluvika uwe ya uwai na uravi. 11Vashilyi vany va muri mmbo vashillya vakawarya findo fya vandu vakapwa ng'unde. Vakohani nawo vakakunda itawa ilyi vatambashwa mavavaso. Vakisuku nawo-da vakaawuya fisuku vawonise-fo fesa. Yewo woose vakaamba vai Nndumi Iruva akee nawo. “Nkitiri mwaandu-fo, Nndumi Iruva akee neese,”
12Naasany kimaruma kyafo yewe, Sioni mmbo asheremwaa sha sumbai. Yerusalemu ushelyamarwa uve nrapu. Nalyo ifumbu lya mmba ya Iruva lyisheva nsito.
Currently Selected:
MIKA 3: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
