MIKA 5

1Yeni va Yerusalemu kusanyiryeny-te, lwansheywa mmisa. Mmbo varye ikaba nsongoru wa Israeli!

Iruva Avika Kyaasa kya Nshilyi Auka Betlehemu

2Nndumi Iruva mmbo aamba indi, Ewe Betlehemu ya Efratha, mmbo kukee n-du deny ngota miri myoose ya Yuda, lyo kwafo yewe nsheutaa-fo nshilyi wa Israeli, nawe mmbwa ufyari lwa elyo kasha. 3Nndumi Iruva mmbo ashereeya vandu vakwe vakiduva kutani elyi nka yeto asheiraa mwana wakwe wa kyuumi. Numa lyo vandu vakwe vakee vakamare ushingeny vasheumbyoo-se vawuye kwa vandu vawo. 4Kyeeri ekyo nshilyi yeto ashaa mmbo asheshillyaa vandu vakwe na wiidimi luukye kwa Nndumi Iruva na itumbe lyuukye kwa Nndumi Iruva muni. Vandu vakwe mmbo vashekaa na ufoo mashika vandu va ulana woose mmbo vasheirikyaa ushilyi lwakwe, 5naveengye ufoo.

Ukiro na Ngabo

Kyeeri Vasirya vashelushingillya neemaa finya yeeru, mmbo lushekapanaa nawo na finya shoose. 6Veeke na finya indo vashevinga Vasirya, na uruka lwa Nimrod, nawo vasheluauwa maakony a Vasirya kyeeri vashelushingillyaa urukeny kweru

7Na vandu va Israeli yewo vasherewaa-fo mmbo vashevaa sha laura iviryaa vandu woose mmu yooka kwa Nndumi Iruva, ivevaka mmbwa yanisa mooro ukeemya. Mmbo vashekusirya Iruva nta she nndu-fo. 8Na valya vasherewaa efo masangeny engyi mmbo vashevakaa miiso iruyaa kyeelya kyavayo kundo kwa nsitony. Nashekooya monri naaratwe-ratwe, kulakiaa-u kindo. 9Israeli mmbo ashevingaa vakiduva vakwe woose navamamite.

10Nndumi Iruva mmbo aamba, “Kyeeri ekyo mmbo nsammbwa mmba tany na ilyamara makari a fira 11Mmbo llyamara miri ya urukeny lwany na ifwafwala ngyulyamari tany. 12Mmbo llyamara mbengu eto murundaa nato shimure mulatiri kindo. 13Mmbo llyamara mafwanu a maruva any na ngo ta fitara fyerasya. Uka lyo mmusheindya-se findo musongosye muveni-fo. 14Mmbo nshefisha-fisha mafwanu a maruva a kika a Ashera efo urukeny lwany na ilyamara miri yaany. 15Llyony unyafi lwakwa unini lushetaiya masanga moose yoo aleshiindya yeny.”

Currently Selected:

MIKA 5: MAS2

Highlight

Compare

Copy