MIKA 2

Ngapo ya Yewo Veefota Vakiva

1Oshiny lwa yewo valalalaa rony veshokyaa vengyi mitambo. Neelyi kwakya vakavina nnu iinutya kilya valedeesya itana. 2Vakakunda marema vakakooya. Vakakunda mmba, vakatiwonisa. Kulefoo mmba ao masaa alakee a ilama. 3Nkyo Nndumi Iruva kaamba, “Neeny shandeesya imweengye urumato, na mmushekuuta-fo. Mmbo mushewoywaa ni ukiva na ukushobi lwany lusye.” 4Elyi kyeeri ekyo kifikaa, vandu vengyi mmbo vashereraa kyany kive kiringisyo kya iwa, nawo vashemwiimba yeni sha kiimbo kyeteenda, vaambe,

“Lwammisya deny!

Nndumi Iruva allusoka uruka lweru

Kaniingya valya valelukamara mifungwa.”

5Na elyi kyeeri kifikaa kyeviirya vandu va Nndumi Iruva uruka lwawo, yeni mmusheonisaa-u nta kindo-fo. 6Vandu mmbo vakeshirerya vakashivia, Kulalurerye yese-fo. Kulaambe mbony eto-fo. Iruva nnyashelutanyaa nta ukasha-fo. 7Mmbo mukusarye vandu va Israeli mmbo vakee vadenge? A Nndumi Iruva mmbo atura usisiryo? Alutannyaa indo dede? A Nndumi Iruva nshi arerya vandu vakwe na ufoo yewo veetana mesha? 8Nndumi Iruva karouwa kaamba, Mmbo mwawoya vandu vakwa sha vakiduva. Vengyi mmbo vawuya wooka fireny veekusarye kyeny ni ufoo, kyeendi vakakooya nshi indo kyikai-fo. 9Mukafuna vaka va vandu vakwa efo mmbeny tawo na vana vawo mukavasoka mbora tawo. 10Ukeny yaa, mashika nkukivaa ikaa-fo. Ngyulyamari tany mmbo tammengye ando yaa urumato lwa llung'anu.

11Vandu yeva mmbo valangye vakisuku va wongo vavalembaa veshaambaa, “Mmbo shamuvia mushewonisaa mfinyo na wari mukuniiye?” 12Lyo yeni moose va Israeli musaayeu mmbo mmumbyaa ando amwi, sheelyi nndu asanyirya moonri akwe. Muve sha moonri awuya mmba, nalo uruka lwiishwe vandu shapu.

13Iruva mmbo ashevaruyaa shia wooke efo vakee varishisye. Mmbo vashefishaa ngiri ta muri wooke efo vakee varaye, valekwa. Llyo Nndumi Iruva yeu akee mangyi yaawo ashevasongoyaa.

Currently Selected:

MIKA 2: MAS2

Highlight

Compare

Copy