MIKA 1
1
1Kyeeri kya vamangyi Yotam, Ahasi na Ezekia valya vekee vamangyi va Yuda, llyo Nndumi Iruva alefitya nkisuku Mika nrumi yei. Mika mmbo awonikye muriny wa Moresheti. Nndumi Iruva kaora Mika efyo fyoose fikwaani na Samaria na Yerusalemu.
Kiiyo Kimaruma kya Samaria na Yerusalemu
2A ranyiny-te yeni vandu va masanga, yeni mutiri muu, aranyiny, Nndumi Iruva mwishillya mmbo ashemooraa paa. Aranyiny, mmbo arera ekee kitiminy kyakwe 3Nndumi Iruva mmbo asheshaa ooka ando kwakwe kweele, nasheenda uwe ya mafumbu 4Nang'u mafumbu yoo asheeka sha muya weetwa mmuro. Nang'u asheekyaa efo mamungony, sha mura wasoka wuuka ifumbu-u 5Efi fyoose mmbo fishesheyaa vandu va Israeli mashika elyi valyamarye vakalema Iruva. Mmbi yeto asheutyoo uvingo kya efyo? Mmbandu va Samaria veni. Ni vi akee mwiindya maruva a wongo? Nshi vandu va Yuda veni? Yerusalemu sheni. 6Nkyo Nndumi Iruva kaamba, “Mmbo nsheallwa Samaria nrapu, kuve mbata yevaaya miri ya misabibu. Neeny mmbo nshesammbwa mawe akwe nabirimitwa neende imungony. 7Mafwanu yoo akwe a wuuru mmbo ashefishwa-fishwaa, neefyo fya maruva awo a wongo fyookywa na muro. Neefya Samaria ilefisanyirya fyelema Iruva fishemamitwa, na usimba lwa Samaria lusheepowa ni vakiduva fyeende kwa maruva engyi kundo kungyi.” 8Naasa nkisuku Mika kaamba, “Mmbo nshekaa kiiyony neeting'wa kimaruma kya vayo. Naambo shoore ting'wa yakwa nshekaa-fo mbereto shilaree nta fyaaru, shiffwe sha iparwe na iiya sha nyaa. 9Fyaasha fya Samaria mfivaa ivavara-fo, na Yuda nawe ashevaa indo. Mashika urumato mmbo lwankooya Yerusalemu yoo vandu vakwa vakai.”
Nkiduva Aserikkya Afii na Yerusalemu
10Mulashevia vandu va Gati mbony teru shaasa lulevingwa-fo, valulollye lwishiyaa-fo. Efo Bet-le-Afra mwikwaalalaa si kya yoora ifwa nrima. 11Yeni vandu va Shafir, rishyeny uruka lungyi, mularee soori nta fyaaru. Neewo vakee Zaanan mulasomuke efo muriny. Mukeeta vandu va Betezel veekapaa kiiyo, llyo mumany, mmbatiri ando kweekapa mungo-fo. 12Vandu va Marot wo mmbo vavereye iviiryo muu, kimmba Nndumi Iruva anrika urumato kufii deny na Yerusalemu. 13Neeni va Lakishi, deesyeny frasi tany ta fira. Mmbo mulesora Israeli kya ilyamara mukaambutya na Yerusalemu ulyamari. 14Kyasiany yeni vandu va Yuda, mmbo musheviaa muri wa Moresheti-Gadi nakwafo. Nawo vamangyi va Israeli mmbashewonaa ngarami efo muriny wa Akisibu-fo.
15Na vandu va Maresha Nndumi Iruva mmbo ashemurambikyaa kwa vakiduva vany na muri wany utirwa. Na vandu va Israeli vandeovya mbangeny kulya Adulamu. 16Vandu va Yuda, uteny fii ta mirwe mukae kiiyony kimaruma kya vana vany muvakundye. Uteny fii ta mirwe muvake ngoru, mashika vana vany vankamarwa mifungwa kundo kwaasha.
Currently Selected:
MIKA 1: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
