Valevi 16

Nkonu va Ivikwa Mweele

1Nndumi Iruva karera na Mose kya ifwa lya vana valya vavii va Aron, llya valeserikya Iruva, vakafwa; 2Nndumi Iruva kavia Mose, “Rera na mwanamau Aron kummbie, sheelyi nalaange nta kyeeri kimwi ando eele yoo, mbee ya kiri kya ulyilyi yekyo kikee uwe isanduku elyo nalasheefwa, mashika yeny mmbo nshelollywa efo nsuny yoo kiriny yekyo kya ulyilyi.” 3Aron mmbo ashangaa ando eele na findo efi; ng'umbe shikoo ya shau ya kiraso kya ulyamari, na suva ya kiraso kyeekora. 4Nasheu aree kansu ilya sheele ya soori, na suruale tilya ivii ta kitani nakufingye nkanda ulya wa kitani, naraa na kofia ilya ya kitani, yoo ng'u masara meele, nakusangye mbele mureny, naraany. 5Numa efo kwa Vaisraeli nawarye-fo ndafu ivii kive kiraso kya ulyamari, na suva imwi ive kiraso kyeekora. 6Na Aron nepoo ng'umbe ilya ya kiraso kya ulyamari, yeyo ya kimaruma kyakwe, navike usandi kimaruma kyakwe muni, na kya mmba yakwe. 7Numa neepo mburu tilya ivii neende mbee ya Nndumi Iruva mwaangony wa yeema Yeele. 8Aron nakape kura kya mburu yeto ivii, kura imwi ni ya Nndumi Iruva na ingi ya Azazeli. 9Na Aron nawarye mburu ilya yawoywa nkura kya Nndumi Iruva, nayuute ive kiraso kya ulyamari. 10Kyeendi mburu ilya yawoywa nkura kya Azazeli irewa na muu mbee ya Nndumi Iruva, imbikye usandi, naambo irawa kasa kimaruma kya Azazeli.

11Na Aron naserisyeu ng'umbe ya kiraso kya ulyamari, yeyo ikee ni kimaruma kyakwe muni, na ivika usandi kimaruma kyakwe muni, na kya mmba yakwe, nawe nashisheny ng'umbe yeyo ya kiraso kya ulyamari ikee ya kimaruma kyakwe muni. 12Numa nepoo ndeeva wiishwe makaa a muro ooka alya kitareny kyeerasya mbee ya Nndumi Iruva, na ng'umbe ivii ta miri yeefwaamira ikee mikoninde deny, naate neefo kari. 13Naasa neende miri yeyo uwe ya muro yeto wa Iruva naambo nsu wa miri ilya uringitye kiri kya ulyilyi yoo mbee, naambo nalasheefwa. 14Numa nepoon samu ya ng'umbe ilya na nni na yiishoshotya kiri ekyo kya ilyilya taari ya ngameny, nakishoshotye samu yeyo ka-mfungara. 15Naasany nashishyeu mburu ilya ya kiraso kya ulyamari, kimaruma kya vandu, na yeende samu efo kari, natane nayo shaasa aletana na samu ya ng'umbe n yiishoshotya yoo kiriny kya ilyilya na, yoo mbee ya vayo, 16nawo mmbo ashevikaa usandi kya ando yoo kweele, kimaruma kya uravi lwa vana va Israeli, kya urekwa lwawo, yee kimaruma kya ulyamari lwawo, navetana indo kya yeema lyeekwanannya, yelyi lyikee nnang'ani yaawo. 17Nta nalakaefo nndu efo yeeminy-fo kyeeri ashaangaafo ivika usandi yoo ando kweele, kutani asomukafo elyi ammaa ivika usandi kwakwe muni, na mmba yakwe, na kya vandu woose. 18Naasa nasomuke neende yoo kitareny kya Nndumi Iruva kyeerasya neevika usandi kyakwe muni, neebou samu ya ng'umbe ilya, na samu ya mburu ilya neevika kitaren tari toose. 19Nashoshotye kitara ekyo samu na nni ka-mfungare, na iyeeremuta, naambo noote uravi loose lwa vana va Israeli.

Woro ya Asaseli

20Kammaa ivikaa usandi kimaruma kya ando kweele, na yeema lyeekwanannya, na kitara kyeerasya, llyo neende mburu yeyo ikee na muu. 21Na Aron neekere maako akwe yoo nrwen wa mburu yeyo, neekushau ulyamari loose lwa vana va Israeli, na ukasha lwawo, yee, ulyamari lwawo naluvike nrwen wa mburu yeyo, numa narike nndu nairetye kasa. 22Na mburu yeyo mmbo ishipoo ulyamari lwawo loose, fika urukeny lulatiri vandu, nare mburu yeyo efo kasa. 23Na Aron naange efo yeemeny, nawe nootefo alya a kitani, yoo aleraa llya aleanga ando kweele, naarefo; 24nawe mmbo asangyaa mwiili wakwe yoo ando eele, naraa masara akwe, nasomuke, neeserisa kiraso kyeekora kyakwe muni na kya vandu, 25na mafura a kiraso kya ulyamari naakorye yoo kitareny ekyo. 26Na nndu ulya alelekeya mburu ilya ya Azazeli yeende, nasangye soori takwe, neekusangya na mura, numa naangeny ulaleny. 27Na ng'umbe ilya ya kiraso kya ulyamari, na mburu ilya ya kiraso kya ulyamari, eyo samu ya vayo ileendwa naambo ivike kyeekumbwa, mmbo vasomutwaa efo ulaleny, shony ta vayo tikorwa, na nyama na mura wa vayo. 28Neeto afikora na muro nasangye soori takwe neekusangya na mura, numa naange nyulaleny.

Nkonu va Ivikwa Mweele

29Neelyi llyo lyivaa ivavaso lya llung'anu kwany, elyi mwiri wa mfungare, nkonu wa ikumi mmbo mushaatarikaa nriminy, mmbarundaa nta kindo, yeni muveni ao muny. 30Mashika nkonu yeto mmbo mushiilyiswa kya ulyamari lwany mbee ya Nndumi Iruva. 31Ni sabato shisha kwany, neeni mukuvinise indo; ni ivavaso lya llung'anu kwany. 32Na nkohani yeto asheambwaa mafura na yiilyiswa ando a ndeye, mmbo avikaa usandi elo, masara a kitani, ng'umasara meele. 33Nawe mmbo ashevikaa usandi kimaruma kya ando kweele, nawe navike usandi kya yeema lyeekwanannya, na kya kitara kyeerasya, na kimaruma kya vakohani, na kya vandu woose. 34Na ivavaso elyi mmbo lyishevaa lya llung'anu kwany ivika usandi kya vana va Israeli woose kimaruma kya ulyamari lwawo loose, lyimwi wo mwaaka. Nawe katana indo da shaasa Nndumi Iruva alevavasya Mose.

Currently Selected:

Valevi 16: MAS2

Highlight

Copy