Valevi 17

Weele lwa Samu

1Nndumi Iruva kavia Mose, 2Rera na Aron na vasero vakwe, na vana va Israeli woose, kuvavie indi, elyo llyo irero Nndumi Iruva alevavasya, eshambaa, 3Nndu moose wa mmba ya Israeli kashisha ng'umbe ao ngurana ya ishonri ao suvana, efo ulaleny, ao poo ya ulale, 4nta nalayendee yoo mwaangony wa yeema, naambo nayuute kiraso kwa Nndumi Iruva yoo yeemeny lyakwe, nndu yeto mmbo awonaa urekwa lwa samu, mmbo apuswa samu, na nndu yeto navikwa kwaasha na vandu vakwe; 5naambo vana va Israelivaende firaso fyawo, yeto vashishyaa kyenyi, yee, veengye Nndumi Iruva, yoo yeemeny, ka nkohani, nashisheny five firaso fya ufoo kwa Nndumi Iruva, 6nawe Nkohani mmbo ashenanatyaa samu ya vayo yoo kitareny kyeerasya kya Nndumi Iruva, mwaangony wa yeema neekora mafura a vayo, uveu nrungo nsha kwa Nndumi Iruva. 7Nta mbakiutaa firaso fyawo kwa varumu-fo, yewo vavasora naambo vatuuse nawo. Ivavaso elyi mmbo lyivaa lya llung'anu kwa marika moose.

8Neewe vavie indi, Nndu moose wa Israeli, ao veny vawo, yeto ashuutaa kiraso kyeekora, 9nalakifitaa yoo mwangony wa yeema lyeekwanannya, naserisye Nndumi Iruva, nndu yeto narauwa na vandu vakwe.

10Na nndu moose wa mmba ya Israeli, ao veny vawo, kalya samu, neeny mmbo nshemuumbutyaa kwaasha na vandu vakwe. 11Mashika muu mmbo ukee efo samuny, neeny mmbo shamuniinga samu yeyo yoo kitareny kyeerasya, naambo muvike usandi kimaruma kya ulyamari lwany, mashika samu yeyo nnyo ivika usandi kimaruma kyany. 12Nkyo shilevia vana va Israeli, “Kulave nta nndu ana samu kwany, nta muny akee kwany”

13Nndu yeto akee wa ufyari lwa Israeli, ao wa veny vawo, yeto atiri ifisi ao ndeye yeyo ilyiwaa, mmbo apuswaa samu ya vayo nalyikye uteriny, 14mashika muu wa wo kyuumbe ukee efo samuny. Nkyo kimaruma shilevia vana va Israeli, “Mulani samu-fo ya kindo kyoose-fo mashika mfo muu ukai, yeto ana navikwa kwaasha. 15Na nndu yeto alyaa kindo kyafwa, ao nyama kindo kyaaratuwa niifisi, kava waany ao muny, nasangye soori takwe, nasambe mureny, naveva ntefusa fika nkwaany, neeleny. 16Lyo anra nalatisangya neesamba mwiili, mmbo akurikaa uravi lwakwe.”

Currently Selected:

Valevi 17: MAS2

Highlight

Copy