Valevi 13

Ndwari ya Fishavere

1Naasa Nndumi Iruva karera na Mose na Aron kavavia, 2“Kwakooya nndu afumbye yuure, ao kishavere ao kiso kya mwiiliny wakwe, llyo asheendwaa kwa nkohani Aron ao kwa vana vakwe, umwi waawo-da; 3nawe nkohani nashelola waarya kindo ekyo kya mwiili wakwe, na kwakooya malulwi yoo ampaluka, na yoo kulwee kulalolywa, naasany elyo ni ivave, naasa nkohani mmbo allolaa naambe yeu ni ntefusu. 4Na kishavere ekyo kibalukye, kwakooya kibalukye lyo kulore kidovye si, na malulwi nalabalukye, llyo nkohani ashevikaa nndu yeto alwee mbai ando a mikonu mfungare; 5nkohani nallole ando a mikonu mfungare, naasa kalollya kishavere ekyo kyansalala kilakeeng'ana, llyo nkohani ashellolaase ando a mikonu mfungare, 6naasa nkonu wa mfungare nkohani nallolese, naasa kwankooya kishavere ekyo kyamaangwa, kilakeeng'ana, llyo nkohani ashaambaa nndu yeu ni nsha, nasangye soori takwe, naasa mmbo ailyiswa. 7Kyeendi kwakooya kiswa ekyo kyankwaana efo mwiiliny na yoora nkohani mwiili wakwe neewona yiilyiswa, mmbo ashooraa nkohani lyingi; 8Nkuhani nalole, kwakooya kishavere ekyo kyankwaana, llyo nkohani naambe yelyi ni ivave, ni ntefusu.

9“Ndwari ya ivave ikantira nndu, neendwa kwa nkohani; 10nkohani nallole, na kwankooya kwiiyo kindo kyaa kifumbye, na malulwi ammeepaluka akava maa, na kwakooya kwiiyo nyama shaa imie yoo kufumbye, 11yelyo ni ivave lya kasha lyikee yoo kishong'uny lya mwiili wakwe, na nkohani naambe yo ni ntefusu. 12Naasa ivave elyo lyikee yoo kishong'uny nalyo lyikakwaana koose, uka nrwe fika marendeny, shaasa nkohani alollya, 13llyo nkohani nalole, kallollyaa ivave mmbo lyikwaani mwiili moose, llyo ashambaa yeu ni nsha ra elyi alwee, mmbo lyammalashika lyikaila, mmbo akee nsha. 14Kyeendi lyo ando koose ikoyoo nyama mbisi, nndu yeto ni ntefusu. 15Nkuhani mmbo alolaa nyama yeyo na yaamba, yeu ni ntefusu, na nyama yeyo shivisi nnyo ivave. 16Na kwakoya nyama yeyo shivisi yaalashika lyingi, neeva shaa, llyo ashesoraa nkohani, 17nawe nkohani nallole, na kwakoya yoo kulwee kwamba kwaa, llyo nkohani ashambaa nndu yeu nisha.

18“Na kwakooya mwili wa nndu ulwee yuure lyiwovye, 19na yoo lyeekai kukafwana kwaa kwiifumbye, ao kukava kiswa kimikaa, kyaa kyeendi kikadodoraa kyaangu, noore nkohani ando yoo. 20Neelyi nkohani alolaa kwankooya kudovye, na malulwi akapaluka, llyo nkohani ashaambaa nndu yeu ni ntefusu, yeyonndwari ya ivave lyilesheya yoo yuuren. 21Lyo kwakooya nkohani alola, kalollya malulwi nnyaalashikye nta nkudovye, kyeendi mmbo kukeewova, llyo nkohani ashembikaa mbai ando a mikonu mfungare; 22na kwakonkooya kikwani mwiiliny, llyo nkohani asheamba nndu yeu ni ntefusu, yelyi ni ivave. 23Kyeendi kwankooya kiswa ekyo kyaa mmbo kimandi yoo kweni, naasa yeyo n ngoru ya yuure, nkohani naambe nndu yeu ni nsha mmweeremutu.

24“Ao kwakooya mwiili wa nndu utiri ando kukeeya muro, ukavekaau kiswa kidodorye kyaangu, ao kyeelwa, 25nkohani naloleu, na kwankooya malulwi a vayo ammalashika akapaluka nang'u kukadovya, yelyo ni ivave, nkohani naambe ni utefusu yei ni ndwari ya ivave. 26Kyeendi elyi nkohani alola-u kakooya malulwi nalaalashikye, na nta ando yoo kuladoovye, kyeendi kukoora idovya, llyo nkohani ashembikaa mbai ando a mikonu mfungare; 27nallole mikonu mfungare, kwakooya kikwaani mwiiliny, llyo nkohani naambe ni ntefusu, yeu ni ndwari ya ivave. 28Na kwakooya kiswa ekyo kimandi yoo kweni kilakwaani, kikavedovya, lyo mmbo kifumbye alya kweni muro ukai, nkohani mmbo ashambaa yeu ni nsha n ngoru ireraa da.

29“Na lyingi kwakooya nndu Nndumi ao nka alwee yoo nron, ao yoo kyeeri, 30llyo nkohani naloleu, kwakooya kudovye, na kwakooya tiiyo fii tidodorye shifwafwa, llyo nkohani naambe yeu ni utefusu, mashika yelyi niivave lya nrwen ao lya kyeeriny. 31Kyeendi kwakooya nkohani alola yoo kulwee kakooya nkudovye nta nkwiiyo fii shuu, llyo nkohani ashevikaa nndu yeto mbai ando a mikonu mfungare, 32na nkonu wa mfungare nkohani mmbo alolaa ando yoo, na kwankooya kulakwaani, nta kulaiyoo fii tidodorye, nta kuladovye, 33llyo nndu yeto nootwa fii, kuvewau yoo kulwee, na nkohani navike nndu yeto mbai ando a mikonu mfungare, 34nkonu wa mfungare nkohani naloleu-se, kwankooya yoo kulwee kulakeengera, nta idovya, llyo nkohani ashaambaa yeu ni nsha, nasangye masara akwe kyekweeremuta. 35Lyo kishavere ekyo kwakooya kikee kwaana mwiiliny elyi emmaa yeeremuka; 36llyo nkohani nallole, na kwakooya kikwaani efo mwiiliny, nta nnyakilolaafo fii tidodorye-fo, yeto mmbo akee ntefusu. 37Lyo kankooya kishavere ekyo kiwovye na fii tiiyo shuu, mmbo kyambova, nave ni nsha, na nkohani naambe ni nsha.

38“Kwakooya nndu Nndumi ao nka atiri fiswa fivaramaa efo mwiiliny, fifwani fyaa, 39nkohani nafilole, kwakooya fiswa efyo fiillye kinywa, efyo mmbuva ilentira, ni nsha. 40Kwakooya fii tasia nrwen wa nndu, yelyo niiwoya, ni nsha. 41Kwakooya fii ta nndu tasia nrwen, kisanguny ni iwoya lya mbee nawe ni nsha. 42Kyeendi yoo nrwen yeto utiri iwoya ao yoo iwoyeny elyo lya kisanguny kukankaau kishavere kyeelwa kikadodora kyaangu, yelyo niivave, lyikeesha yoo iwoyeny ao iwoyeny lya kisangu. 43Llyo nkohani nallole na kwankooya kishavere ekyo kikee kyaa needodora-dodora, yoo iwoyeny lya mbee ao lya numa, shaasa kilollyoo efo mwiiliny; 44yeto ni nndu atirwa niivave, ni ntefusu; na nkohani naambe indo, kishavere kyakwe mmbo kikee nrwen.

45“Na nndu atirwa ni ivave eree soori tirandukye, na fii ta nrwe tirewa indo, nave asikyaa kiromu kya uwe, naongore eshaambaa, shikee ntefusu, nyira. 46Kyeeri kyoose ekyo alwee, mmbo akee ntefusu, mmbo akaa muni, ando akwe ni efo poo ya ulale.

Ndwari ya Woye

47“Na soori yeyo isikyaa kishavere kya ivave, kakooya nsoori ya sufu ao kitaani, 48ikaokwa ao ikafumwa ao kwakooya ni ya shony ao ya ngata ya shony, 49kwakooya kishavere ekyo kifwani mare ao kidodorye, lyikasikywa ni isara lyafumwa ao lyaokwa ao lya shony ao lya ngata ya shony, elyo ni ivave da, nkuti nkohani naorwa, 50na nkohani nalyilole, na ulya alwee nashembika mbai ando a mikonu mfungare, 51nkonu wa mfungare nalole kishavere ekyo, na kwankooya kikee yoombora elyi kisikywa ni isara elyo lya yooka, ao lyeefumwa ao shony ao ngata ya shony, yelyo ni ivave ikasha, 52isara elyo lyikorwa na muro.

53“Na kwakooya nkohani alola kakooya llyikeeyoombora efo sooriny, 54llyo nkohani ashevavasyaa soori yeyo nsikye isangyo nawe nambike mbai ando a mikonu mfungare; 55numa nkohani nalole, elyi ammaa isangya kishavere ekyo, na kwankooya kulore kyaalashikye fwana, nta yoombora, ni kitefusu, lyikorwa na muro. 56Nkohani kallola neekoya kishavere ekyo kyambooka iwovyo lyo ashekisisaa kyuuke yoo sooriny, ao shonyiny, yeyo ikeeshooke ao shifume. 57Kankooya mmbo lyikee indo da efo sooriny, ikeshifumi, ao yookwa, ao ya ngata ya sheni, ni ndwari shikasha, isara yeyo ikorwa. 58Na isara elyo lyikeeyooke ao lyifume, ao lya ngata ya shony, kulyisangye, 59Na kishavere kya ivave kikee sooriny shooke ao shifume, ao lya mgata ya shony, ivavaso lya vayo ni elyi, niisha, ao yaamba niikasha.”

Currently Selected:

Valevi 13: MAS2

Highlight

Copy