Valevi 12

Isangya Mfee

1Naasa Nndumi Iruva karera na Mose kammbia, 2Rera na vana yewo va Israeli kuvavie, “Kwakooya nka akufinga na yiira mwana wa kyuumi, mmbo asheva ntefusu ando a mikonu mfungare, shaasa kikai kyeelollya mikonu yakwe ya mwiiri, niindo avaa ntefusu. 3Nkonu wa nyanya mwana yeto narinwa. 4Na nka yeto mmbo ashekaa indo ando a mikonu makumi araru na iraru kimaruma kya samu yakwe, nalapane kindo kyeele, nta nalaange ando eele, kutani mikonu yeyo ya yiilyisa lyakwe yasia. 5Lyo kwakooya mmbo awona mwana a kika, mmbo ashevaa ntefusu ando a mfungare ivii, llyo irauwa lyakwe nawe nakae indo ando a mikonu makumi arindaru kimaruma kya samu yakwe.

6“Mikonu yeyo ya yiilyiswa lyakwe ikamisia, elyi aleira mwana wa kyuumi ao wa kika, llyo ashendee ngurana ya suva ya mwaaka umwi ive kiraso kyeekora na muro, na iwore lya mbeta ao mbuku, kive kiraso kya ulyamari, neende yoo mwaangony wa yeema Yeele, naniingye nkohani; 7nawe nasheserisya Nndumi Iruva, neevika usandi kimaruma kyakwe nawe nailyiswa kya samu yakwe. Elyi llyo ivavaso lya yeto aira mwana, kava mwana wa kyuumi ao kava wa kika. 8Kwakooya nka yeto nalatiri kindo kimaa ngurana ya suva llyon aruyaa mbeta ivii, ao mawore avii a mbuku, lyimwi lyive kiraso kyeekora na muro neelyo lyingi lyive kiraso kya ulyamari, nawe nkohani navike usandi kimaruma kyakwe, nawe nailyiswany.”

Currently Selected:

Valevi 12: MAS2

Highlight

Copy