Valevi 14

Isangyo lya Nndu Eetiri Woye

1Naasa Nndumi Iruva karera na Mose kammbia, 2Elyi llyo ivavasyo lya nndu atirwa ni ivave, elyi mikonu ya yeeremutwa lyakwe, mmbo asheendwaa kwa nkohani, 3na nkohani nasomuke efo ulaleny nkohani nalole, kwankooya kishavere kya ivave kiwovye, 4llyo nkohani navavasye kweendwa ndeye ivii kimaruma kya yeto asheeremutwa, ndeye ilatiri teve, na nri wa mweresi na mafwaa a yoonri adodorye, na ikongye; 5nkohani navavasye ndeye yeyo imwi ishishwa ivikwa kiiyeny kya uteri kikee kivike mura wa usoka; 6naasa natire ndeye yeyo ikee na muu na kiri ekyo kya kirevellya, na mafwaa yoo adodorye na ikonge, nawe nafyoolote efo samuny ya ndeye ilya yashishywa mureny wa mureny; 7nafwallye nndu yeto ateeremutwa kamfungare, naambe amba nsha, numa narumbute ndeye ilya ikee na muu ikweengye. 8Neeto eeremutwa nasangye masara na yuuta nrwe deny, neesamba neele deny, naasa naangeny neefo ulaleny, lyo nakae yoo poo ya yeema lyakwe ando a mikonu mfungare. 9Numa nkonu wa mfungare noote fii toose ta nrwe, na nguyo, noote fii toose, nasangye soori toose, neesamba deny, neeremukeny. 10Nkonu wa nyanya neepoo ngurana ivii ta suva shisha, na uruvi usha lwa mwaaka umwi, na fyenga firaru fya ikumi fya kibaba kya nswa mmamiri, uve kiraso kya nswa, nsasandwa na mafura kikombe kyimwi na mafura maangu, 11Naasa nkohani yeto asheeremutaa nndu yeto nansaleese ando amwi na findo efyo fyoose yoo mbee ya Nndumi Iruva yoo mbee ya yeema lyeekwaanannya; 12naasa nkohani nauteu suva imwi, neenserisa ive kiraso kya urekwa ando amwi na mafura kikombe kimwi, nawe nafiringise five ni kiraso kyeeringiswa mbee ya Nndumi Iruva; 13numa aishishye suva yeyo yoo tishishywa eto ta kiraso kya ulyamari na firaso fyeekora na muro, yoo mmba ando eele, mashika shaasa kiraso ekyo kya ulyamari kikee kya nkohani, niindo-do kivekee kiraso ekyo kya urekwa, mmbo kikee kyeele deny; 14naasa nkohani nooteu samu yoo kirasony ekyo kya urekwa naambe kuri ka woko usha ka nndu yeto akeeremutwa yoo mbai, na nni yeto nniini wa woko usha, na nni nniini wa urende elo usha. 15Naasa nkohani mmbo ashiipoo kikombe ekyo kya mafura neeletya yoo wokony lwakwe umuso, 16numa nkohani navike nni wa woko usha efo mafureny ka mfungare mbee ya Nndumi Iruva, 17na mafura yoo asaau naambe yoo mbai ya kuri ka woko usha ka nndu yeto akeeilyiswa, na yoo nniny nniini wa urende usha na nni nniini wa woko usha yoo uwe ya samu ya kiraso kya urekwa; 18na mafura yoo asaau akee yoo woko lwa nkohani naletye yoo nrwen wa nndu yeto akeyiilyiswa, na nkohani navike usandi kimaruma kyakwe mbee ya Nndumi Iruva. 19Naasa ukohani naserisyeu kiraso kya ulyamari, neevika usandi kwa nndu yeto akeyiilyiswa kimaruma kya utefusu lwakwe, numa nashisheny kiraso kyeekora na muro; 20numa nkohani naserisyeu kiraso ekyo kyeekora, na kiraso kya nswa, yoo uwe ya kitara ekyo kyeerasya, na nkohani navike usandi kimaruma kyakwe, nawe nailyiswany.

21Na kwankooya ni nkiva nalawonisaa findo efyo, lyo asheende Suva imwi, ive ndalai ya kiraso kya urekwa kyesisika, naambo navike usandi kimaruma kyakwe, na kyenga ikumi kya kibaba kya nswa mmamiri, ukee nsasande na mafura kive kiraso kya nswa, na kikombe kya mafura; 22na mbeta ivii, ao mabore avii a mbuku, shaasa shiidimaa iwonisa; yeyo imwi ive kiraso kya ulyamari yeyo ya kavii ni kiraso kyeekora na muro. 23Kufike nkonu wa nyanya mmbo aveendee kwa nkohani, yoo mwaangony wa yeema mbee ya Nndumi Iruva, kimaruma kya yiilyiswa lyakwe. 24Na nkohani mmbo awaryaa suva yeyo ya kiraso kya urekwa na kikombe ekyo kya mafura nawe nkohani nafisisike five kiraso kyeesisika kwa Nndumi Iruva; 25naasa nashishe suva yeyo ya kiraso kya urekwa na kuhani neepoo samu ya kiraso kya urekwa neeyaamba yoo mbai ya kuri kya woko usha kya yeto akeeyiilyiswa, na efo nniny nniini wa woko usha, na nni nniini wa urende usha; 26naveletya mafura maata yookidawuny kya woko umoso; 27numa nalete mafura yoo akee wokony lwakwe umuso na nni wakwe wa woko usha ka mfungare mbee ya Nndumi Iruva; 28naasa nkohani navike mafura engi wokony lwakwe naambe kuri kya woko usha yoo mbai ka yeto akeeyiilyiswa, na yoo nni nniini wa woko usha na nni nniini wa urende usha, yoo uwe ya samu yeyo ya kiraso kya urekwa; 29na mafura yoo asaa yoo wokony lwakwe naaletye nrwen wa yeto akeeyiilyiswa naambo navike usandi kimaruma kyakwe yoo kwa Nndumi Iruva. 30Naasa naserisyeu mbeta yeto, imwi ya vayo ao mabore yoo a mbuku lyimwi lya vayo, shaasa ashiidimaa iwonisa; 31shaasa ashiidimaa, imwi ive kiraso kya ulyamari, na ya kavii ive kiraso kyeekora na muro, ando amwi na kiraso kya nswa; na nkohani yeto navike usandi kwa yeto akeyiilyiswa mbee ya Nndumi Iruva. 32Yeto alwee ivave, nalashiidima iwonisa ekyo kikwaani yiilyiswa kwakwe ivavaso lyakwe llyo elyo.

Ivave lya Mmba

33Nndumi Iruva karera na Mose na Aron, kavavia, 34Kyeeri mushangaa urukeny lwa Kanaani, elo shamuniinga luve lwany, na yeny nsheende ivave isimambeny lya mmba shive, 35llyo muni mmba yeyo nkuti avie nkohani, sheelyi kwiifo ivave efo mmba yakwe; 36llyo nkohani ashevavasyaa findo fyoose fikee efo mmba fisomutwa-fo, nkohani eelollye kulore ammaanga mmba ilola naambo efyo fikee efo mmba valesheeva fitefusu; numa nkohani naange mmba yeyo nailole; 37nawe nalole kindo ekyo, na kwankooya kikee efo isimambeny lya mmba, nakyo kisumikye-mikye, kikafwana mare ao kidodorye, nakyo kirekye si efo isimambeny; 38llyo nkohani ashesomukaa efo mmba fika mwaangony naraye mmba yeyo ando a mikonu mfungare; 39Nkonu wa mfungare nkohani mmbo ashendaa lyingi, nalole, kwankooyaa kindo ekyo kikwaani efo isimambeny lya mmba; 40llyo nkohani ashevavia vautefo mawe a ndwari yeyo naeerye poo yoo findo fyeerywa poo ya muri; 41nawe naambe mmba yeyo yaaruwa taari toose na yeela yelyo vashuutaafo valyipusuye poo ya muri ando kwa yeerya findo; 42numa woote-fo mawe engyi naavike ando a mawe yoo, nawe neepoo yeela lyingi na yaamba mmba yeyo yeela. 43Na kwakooya ndwari yeyo yawuya neesha efo mmba kyeeri ammaa yuutafo mawe yoo na yaarwa mmba, na yaamba yeela; 44llyo nkohani ashaangaa mmba nalole, kwankooya kindo ekyo kikwaani efo mmba, ni ivave lyikeelya mmba yeyo, ni shitefusu, 45Nawe mmbo asambwa mmba, mawe a vayo, na mboshiki ta vayo, na yeela lya mmba yeyo, nawe nasomute findo fyoose efo mmba fika yoo findo fyeerwa. 46Na nndu moose yeto ashaangaa mmba yeyo kyeeri ikee shiraye, mmbo avaa ntefusu fika nkwaany. 47Na nndu yeto alolaa efo mmba yeyo nkuti nasangye soori takwe, neeto alyiiyya-fo shoonga kuti nasangye soori takwe. 48Naasa kwakooya nkohani aanga efo mmba neekoya ndwari nnyilekwaana, llyo mmbo ileambwa yeela; llyo nkohani ashambaa mmba yeyo nshaa, mashika ivave lyambova. 49Nawe nkohani mmbo awaryaa ndeye ivii, na nri wa mweresi na mafwaa a yoonri adodorye na ikongye, kya yiilyia mmba yeyo, 50nawe mmbo ashisshaa ndeye imwi nndeeveny uteeri utiri mura wa usoka, 51numa naipoo kiri ekyo kya nri wa mweresi, na ikongye na mafwaa a yoonri adodorye na ikongye, ando amwi na ndeye yeyo nafyoolote fyoose samuny ya ndeye ilya yashishwa neefo mureny yeto, nafwallye mmba yeyo ka mfungare; 52nawe neeremute mmba yeyo na samu ya ndeye, na mura wa mureny, na ndeye yeyo ikee na muu, na nri wa mweresi, na mafwaa a yoonri adodorye na ikongye; 53kyeeri ndeye yeyo ikee na muu mmbo asheira yeende yuuke efo muriny, niindo ashevikaa usandi kimaruma kya mmba yeyo nayo yeeremuke.

54Yelyo llyo ivavaso lya ndwari ya ivave lya wo ngata, 55na lya ivave lya soori; 56neekyo kifumbye na kishavere kyelwa; 57naambo noore elyi ikee shitefusu, na elyi yeeremukya; yelyo llyo ivavaso lya ivave na itaambo.

Currently Selected:

Valevi 14: MAS2

Highlight

Copy