YUDA 1
1
1Yeny Yuda shikee ishinga lya Yesu Kristo, nkee mwanamaye wa Yakobo, mmbo shamwiidikira yeni Vakristo mukee vakunde kyeendwa ni Iruva Nde, na iringwa kimaruma kya Yesu Kristo. 2Shamukundya mwengerywa ilyillyo na urilalyi na ikundana.
Velosha va wongo
3Vakunde vakwa, kyeeri shekee ikutakura deny imureiya kya ukiro yelu lweru yese loose, mashika shilewona kuti shimureiye, naambo shimwiitike mulalakye iirikyo llya siri sheele ilerambikywa. 4Mashika kwiifo vandu valeanga siriny veshoovyaa, vakee vautye uvingo uka kipooka. Nawo ni vandu valaishi Iruva, vakee vealasha isarya lya Iruva lyikava kindo kya tangalu. Nawo mmbo valema Iruva yeto muni akee mmbwe wa dede, na Nndumi weeru Yesu Kristo.
5Lyingyi mmbo shikunndye imukumbura, lla elyi mwammaa imanya efi fyoose, sheelyi llya Nndumi alemaa iwouwa vandu vauke kulya Misri, mmbo alerumata valya elyi numa valera iirikyo lya dede. 6Naakwa ni vasu va iruveeu valya valera valaringa itumbe lyawo veni, vakakillya nnyanu wawo ulya ukwaani nawo, mmbo alevafinga llung'anu vakae ireeminy vavere uvingo lwa nkonu ulya nniini. 7Kimwi sha Sodoma na Gomora na miri ilya ya minyanuny shaasa valeva veetuusa vakavaka yeva, velatyaa ngaa ya mwiili ilya ya kasha, vakavaka yeva, nawo mmbo valelyamarwa ni muro wa llunganu. 8Na yeva nikiwo-da, vakee sheelyi vashooryaa mmbo vakatefusa mwiili, vakalema kindo vavioo na imina ngaa sheele. 9Kyaindi Mikaeli, we nsu yeto nniini, llya alewaana na Mmbishwa, na iwakyana nawe kya mwiili wa Mose, nnyaleidima yaamba-u kikasha kyakwe-fo, lyo mmbo aleamba, “Nndumi nakukyeemyi.” 10Indi vandu yeva mmbo vakeeyaarara kindo valakiishi nta, na filya vafiishi uka mbee vakakutefusa nafyo na ivaka mafisi alatiri nta urango. 11Oshiny lwawo! Mashika mmbo valevaka Kaini, na irenga sha Balaamu na kindo valetawa kya efyo ni irumatwa sha Kora. 12Vandu yeva mmbo vaeresye nnu mashika elyi mwavika mirumwa yaany misha mmbo vashelyaa na yeni shoongeny, nta kulaore vereiye isanga na yeni. Vakavaka mafishi alatiri mura avivitwaa ni uraato, na miri yammaangara mamburu, ilakivikaa ndunda, yammaa ifwa kavii na iiluwa tushu. 13Vakawuya ivaka matundulu a yeeve alavaa isiika, na irosa maffwe akee nng'u sony yaawo, vakavaka nyinyiri tirekye shia, vakawoywa ni ireema lyiveemyaa fika llung'anu.
14Enoki yeto akee wa mfungare kuuka Adamu, mmbo alerera kyawo sha nkisuku, kaamba, “Lola-te, Nndumi mmbo alesha eriyani na veele vakwe, fiku na fiku. 15Naambo naidimi irumbuya vandu vakwe mwaandu, na yuutya valya valashinndyaa Iruva uvingo, kyeendwa ni mashora awo maravi valeatana valariyani na Iruva. Kimaruma kya marero awo maravi valyamari yewo valearera alakee a iindya Iruva. 16Vandu yeva mmbo vakunung'unaa, vakasora lango tawo, na kana kyawo kakarera marero maroo ekurosa, vekundyaa valya vatiri uniini naambo vawoni-fo mbusha yaawo.”
Wiikyimbi na mavavasyo
17Kyaindi yeni, vakunde vakwa, kumbweny marero alya alererwa uka llya mbee ni varumi valya va Nndumi weeru Yesu Kristo. 18Mmbo valemmbia, “Fyeeri fya ifurumya mmbo kushekaa-fo vandu vetatala, vesoraa lango tawo veni yeto tiretaa. 19Vandu yewo mmbo vakeende mirauko, mmbo vakee va kiulana vakatura Mumuyo wa Iruva.” 20Kyaindi yeni vakunde vakwa, mukankutira na iirikyo lyany lyikee yeele nnu, na itereva mukee na Mumuyo Mweele. 21Kutireny na ikunda lya Iruva, mwivereyaa ulyilyi lwa Nndumi weeru Yesu Kristo, kutani mwawona muu wa llung'anu. 22Lyillyeny vengyi yewo vatirwa nnyinyira. 23Na vengyi muvakire mwiivaraakwaa efo murony. Na vengyi valyillyeny na usau, musue naakwa ni isara lyitiri kyuuna kya mwiili.
Kiterewo kitiri Nnduma
24Na yeto ashidimaa imuringa mulawoni nsindara, na imurwaa itumbeny lyakwe mukee na ifura iniini, 25mmbwe Iruva umwi nsi, na Mwikira weeru we Yesu Kristo Nndumi weeru. Nnduma ni wakwe, na ulyimbi, na wiidimi na finya, uka llung'anu, na enu, na fika llung'anu. Amen!
Currently Selected:
YUDA 1: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
